– స్కిల్ డెవలప్మెంట్ కేసులో సందేహాలకు దొరకని సందేహాలెన్నో
– నాపేరుతో కేసు పెట్టడం అసమంజసమంటున్న పివి రమేష్
– సీఎంను అరెస్టు చేయడం అసంబద్ధమని వాదించిన రమేష్
– శాఖల నిర్ణయాలతో సీఎంలకు ఏం సంబంధమన్న ప్రశ్న
– ఇంతకూ కుంభకోణం సొమ్ము ఏ అకౌంట్లలోకి వెళ్లిందో తేల్చరేం?
– చంద్రబాబు అకౌంట్‌లోకి వెళితే ఆ వివరాలు వెల్లడించరేం?
– షెల్ కంపెనీల అకౌంట్లు సీజ్ చేశారా?
– మరి షెల్ కంపెనీల యజమానులను అరెస్టు చేయలేదేం?
– సీమెన్స్ ప్రతినిధిని కేసులో ప్రతివాదిగా ఎందుకు చేర్చలేదు?
-ఐఏఎస్ ప్రేంచంద్రారెడ్డి, అజయ్‌కల్లంరెడ్డి ప్రస్తావనేదీ?
– వారిని సీఐడీ, ఏసీబీ అరెస్టు ఎందుకు చేయలేదు?
– ప్రేంచంద్రారెడ్డి లేఖలను సిట్ పరిశీలించిందా?
– కనీసం సాక్షిగా కూడా ఆయనను చేర్చలేదెందుకు?
– క్యాబినెట్ ప్రతిపాదన పంపిన అజయ్‌కల్లం రెడ్డిని విస్మరించారేం?
– స్కిల్ కేసులో వారిద్దరి పాత్ర లేదని ఎలా నిర్థారించారు?
– సెలక్షన్ కమిటీలోని రావత్, ఉదయలక్ష్మిని విచారించారా?
– అప్పటి స్కిల్ శిక్షణపై ఎంపీ అర్జా శ్రీకాంత్ ఇచ్చిన ప్రశంసపై విచారించరేం?
– తమకు పనిముట్లు రాలేదని ఏ శిక్షణా సంస్థలైనా ఫిర్యాదు చే శాయా?
– సీఎంపై కేసుపెడితే సీఎస్, అప్పటి సెక్రటరీలపైనా కేసు పెట్టరేం?
– జగన్‌పై ఏసీబీ కేసులో ఆయన న్యాయవాది అదే వాదించారు కదా?
– ఏఐఎస్‌లను బాధ్యులను చేయాలని జగన్ వాదించడం విస్మరించారా?
– అప్పుడు జగన్ కేసులో మంత్రి సబితా ఆదేశాలతోనే సంతకం చేశానన్న శ్రీలక్ష్మి
– అయినా శ్రీలక్ష్మినే అరెస్టు చేసి జైలుకు పంపిన కోర్టు
– ఆ సూత్రం స్కిల్ కేసులో అధికారులకు వర్తించదా?
– ఇంతకూ డీఐజీ రఘురామిరెడ్డి ఏ హోదాలో కేసు పర్యవేక్షిస్తున్నారు?
– ఆయన ఏ విభాగంలో ఉన్నారని ప్రశ్నించిన ఎంపి రఘురామకృష్ణంరాజు
– కేసు ఏసీబీదైతే.. సీఐడీకి సంబంధమేమిటి?
– సర్కారును ప్రశ్నాస్త్రాలతో ఉక్కిరిబిక్కిరి చేస్తున్న విపక్షాలు
– స్కిల్ కేసులో దొరకని జవాబులపై చర్చ లాంటి రచ్చ
ఇటీవల లండన్ పర్యటన ముగించుకుని వచ్చిన ఏపీ సీఎం జగనన్న.. వచ్చీరాగానే ఆగమేఘాలపై స్కిల్ డెవలప్మెంట్ కేసుపై సమీక్ష నిర్వహించారట. ఆ సందర్భంగా తన రాజకీయ శత్రువైన చంద్రబాబును జైలుకు పంపించిన, ఏఏజీ సుధాకర్‌రెడ్డి ఆర్య్గుమెంటు స్కిల్.. కేసును పకడ్బందీగా దట్టించిన నిఘా దళపతి స్కిల్‌ను తెగ మెచ్చేసుకుని, వారందరికీ వీరతాళ్లు వేశారన్నది మీడియాలో వచ్చిన ఒక వార్త. అంటే మొత్తంగా అధికారుల ‘స్కిల్’కు సీఎం జగనన్న ఫిదా అయ్యారన్నమాట.
బాగానే ఉంది. స్కిల్ కేసులో అవినీతికి పాల్పడ్డారన్న అభియోగంతో విపక్ష నేత, మాజీ సీఎం చంద్రబాబునాయుడును అరెస్టు చేసి, జైలు పంపించారు. ఆయన అందులో అపరాధి అని, తన ముందున్న సాక్ష్యాల మేరకు కోర్టు నమ్మితే, బాబును కచ్చితంగా శిక్షిస్తుంది. సరైన ఆధారాలు, డాక్యుమెంట్ ఎవిడెన్స్ చూపించకపోతే.. బెయిల్ ఇవ్వడమో, లేదా బాబు లాయర్లు వేసిన క్వాష్ పిటిషన్‌ను సమర్ధించి, కేసును క్వాష్ చేయడమో చేస్తుంది. ఇవన్నీ కోర్టులో తేలాల్సిన అంశాలు.
అవినీతికి పాల్పడిన ఎవరినైనా శిక్షించాల్సిందే. దానిని ఎవరూ వ్యతిరేకించరు. కానీ.. విచారణ సంస్థలు ఆ మేరకు చిత్తశుద్ధితోనే విచారణ నిర్వహించారా? లేక పైవారి కళ్లలో ఆనందం కోసం విచారించారా? అన్నదే ముఖ్యం. ప్రభువులను పరమానందపరిచే తొందరలో తప్పుకాలేస్తే, సహజంగా అది రచ్చ లాంటి చర్చ అవుతుంది. ఇప్పుడు ‘స్కిల్’ కేసులో సరిగ్గా అదే జరుగుతోందన్నది, విపక్షాలు, ప్రజాస్వామ్యవాదుల విమర్శ. ఆ మేరకు చంద్రబాబు అరెస్టు తర్వాత సంధిస్తున్న సందేహాస్త్రాలు.. ఇప్పుడు సోషల్‌మీడియాలో చర్చనీయాంశంగా మారాయి. ఆ చర్చలాంటి రచ్చేమిటో ఓసారి చూద్దాం.
