అమెరికా నూతన అధ్యక్షుడు జో బైడెన్.. బాధ్యతలు స్వీకరించిన తర్వాత.. తన అధికారిక నివాసంలో భారీగా మార్పులు చేసుకుంటున్నారు. ఈ క్రమంలో.. ఓ అరుదైన వస్తువును ఆయన ఏరి కోరి మరీ తెప్పించుకున్నారు. అదే.. చంద్రశిల (మూన్ రాక్). 1972లో అపోలో 17 మిషన్ ద్వారా చంద్రుడిపై నుంచి నాసా వ్యోమగాములు సేకరించి తెచ్చిన రాళ్ల నమూనాల్లో అది ఒకటి. ‘లూనార్ శాంపుల్ 76015.143’ అని పిలిచే ఈ మూన్ రాక్ ప్రస్తుతం నాసా ల్యాబరేలరీలో ఉంది. బైడన్ కోరిక మేరకు ప్రత్యేక అనుమతులతో ల్యాబోరేటరీ నుంచి వైట్ హౌస్కు తెచ్చించారు. దీన్ని ఏర్పాటు చేసిన స్థానం కూడా ప్రత్యేకమైనదే. బైడెన్ అంత ముచ్చటపడి మరీ తెప్పించుకున్నది కదా.. అందుకే అధ్యక్షుడికి అందుబాటులో ఏర్పాటు చేశారు ఆయన అధికార గణం. బైడెన్ కూర్చునే ప్రధాన డెస్కుకు పక్కనే ఉండే గోడకు బెంజిమిన్ ఫ్రాంక్లిన్ చిత్రపటం తగిలించి ఉంటుంది. దాని పక్కనే ఉండే బుక్ షెల్ఫ్ అడుగు భాగంలో ఈ మూన్ రాక్ ను అధికారులు అమర్చారు.
ఈ నెల 20న అధికారకంగా అధ్యక్ష పదవీ బాధ్యతలు చేపట్టిన బైడెన్, ట్రంప్ పాలనా సమయంలో తీసుకున్న నిర్ణయాలకు చెల్లు చీటి పలికారు. అంతేకాదు, వైట్ హౌస్ రూపురేకల్లో కూడా ఎన్నో మార్పులు చేపడుతున్నారు. అందులో భాగంగానే మూన్ రాక్ అధ్యక్షుడి చెంతకు చేరింది.
Must Read ;- భారతీయ అమెరికన్లకు కీలక పదవులు.. వైట్ హౌస్లో మనవాళ్లే 17మంది
