తమిళ్ సూపర్ స్టార్ హీరో అజిత్ ప్రస్తుతం ‘వలిమై’ సినిమాలో నటిస్తున్నాడు. అజిత్ సరసన హుమా ఖురేషి హీరోయిన్ గా నటిస్తోంది. బోని కపూర్ నిర్మిస్తున్న ఈ సినిమాకు హెచ్. వినోద్ దర్శకత్వం వహిస్తున్నాడు. ఇప్పటికే ఈ సినిమా షూటింగ్ పూర్తి కావాల్సింది. అయితే లాక్ డౌన్ కారణంగా ఈ సినిమా షూటింగ్ మధ్యలోనే నిలిచిపోయింది. తిరిగి ఈమధ్యనే షూటింగ్ ప్రారంభించిన చిత్ర యూనిట్ అజిత్ పై కీలక యాక్షన్ సన్నివేశాలను తెరకెక్కిస్తోంది.
ప్రస్తుతం ఈ సినిమా షూటింగ్ మన హైదరాబాద్ లోనే జరుగుతోంది. ఇందులో ఒక ఇంట్రస్టింగ్ బైక్ చేజింగ్ సన్నివేశం ఒకటి ఉంది. అందులో అజిత్ స్వయంగా పాల్గొంటున్నారు. ఎలాంటి డూప్ లేకుండా రిస్కీ స్టంట్స్ చేస్తున్నాడు అజిత్. దర్శకుడు డూప్ ను పెట్టి రిస్కీ స్టంట్స్ తీద్దామని చెప్పినా అజిత్ అందుకు ఒప్పుకోలేదని, తనే స్వయంగా ఈ రిస్కీ స్టంట్స్ చేయడానికి ముందుకువచ్చాడని కోలీవుడ్ లో టాక్ నడుస్తోంది.
స్వతహాగా అజిత్ మంచి బైక్ రేసర్. కొంత కాలంపాటు సినిమాలను పక్కన పెట్టి మరీ అజిత్ బైక్ రేసింగ్ లో పాల్గొన్నాడు కూడా. ఇప్పటికే అజిత్ అనేక సినిమాలలో బైక్ స్టంట్స్ చేయడం మనకు తెలిసిన విషయమే. ఇక ఈ సినిమా విషయానికి వస్తే అజిత్, డైరెక్టర్ వినోద్ కాంబినేషన్ లో వస్తున్న రెండో సినిమా కావడంతో అభిమానుల్లో మంచి అంచనాలు ఉన్నాయి.
వీరిద్దరి కలయికలో వచ్చిన ‘నెర్కొండ పారవై’ మంచి విజయం అందుకున్న విషయం తెలిసిందే. అందుకే ‘వలిమై’ సినిమాపై కూడా భారీ అంచనాలు నెలకొన్నాయి. ఇందులో ఆర్ ఎక్స్ 100 హీరో కార్తికేయ నెగిటివ్ రోల్ చేయడం ఒ విశేషం. ప్రస్తుతం ఈ సినిమా షూటింగ్ శరవేగంగా జరుగుతోంది. సినిమాను వచ్చే ఏడాది సమ్మర్ లో రిలీజ్ చేయాలని దర్శకనిర్మాతలు భావిస్తున్నారు. అజిత్ చేస్తున్న రిస్కీ స్టంట్స్ ఆయన అభిమానులను ఎంతవరకు అలరిస్తాయో చూడాలి మరి.
