తమిళ కమెడియన్ వివేక్ తీవ్ర అస్వస్థతకు గురయ్యారు. ఆయన ఆరోగ్య పరిస్థితి విషమంగా ఉందని సమాచారం. ఆయనకు గుండెపోటు రావడంతో చెన్నైలోని సిమ్ ఆస్పత్రిలో ఐసీయూలో చికిత్స అందిస్తున్నారు. గురువారం నాడు ఆయన మొదటి విడత కోవిడ్ వ్యాక్సిన్ తీసుకున్నారు. వివేక్ వయసు 59 సంవత్సరాలు. ఆయన ఆరోగ్య పరిస్థితిపై కొద్ది సేపట్లో వైద్యులు హెల్త్ బులెటిన్ విడుదల చేయనున్నారు. కొంత సమయం గడిస్తేనే కానీ ఆయన ఆరోగ్యంపై ఏ విషయం చెప్పలేమని వైద్యులు అంటున్నట్టు సమాచారం.
ఐసీయూలోనే ఆయనకు అత్యవసర చికిత్స అందిస్తున్నారు. ప్రత్యేక వైద్య బృందం ఆయనకు చికిత్స అందిస్తోంది. వార్త తెలియగానే తమిళ చిత్ర పరిశ్రమ షాక్ కు గురైంది. తమిళ నటులు మహేంద్రన్, వడివేలు తర్వాత ఆ స్తాయిలో పేరు తెచ్చుకున్న నటుడిగా వివేక్ ను చెప్పాలి. దాదాపు 250 చిత్రాల్లో ఆయన నటించారు. 2009లో కేంద్ర ప్రభుత్వం ఆయనను పద్మశ్రీ పురస్కారంతో సత్కరించింది. విక్రమ్ ‘అపరిచితుడు’, రజినీకాంత్ ‘శివాజీ’ సినిమాల్లో వివేక్ నటనకు జనం ఫిదా అయ్యారు. అజిత్, విజయ్, విశాల్ సహా దాదాపు తమిళ హీరోలందరి చిత్రాల్లోనూ వివేక్ నటించారు. హాస్యంలో ఓ ప్రత్యేకమైన టైమింగ్ వివేక్ సొంతం.
ఆయన నటించిన అనేక తమిళ చిత్రాలు తెలుగులోకి కూడా అనువాదమవడంతో తెలుగువారికి కూడా వివేక్ సుపరిచితులు. ఈ మధ్య ఆయన సినిమాలు కూడా తగ్గించారు. నిన్న కోవిడ్ వ్యాక్సిన్ తీసుకున్న వివేక్ కరోనాపై ప్రజలకు అవగాహన కల్పించే ప్రయత్నం చేశారు. వ్యాక్సిన్ తీసుకున్న కొద్ది గంటల వ్యవధిలోనే హార్ట్ అటాక్ రావడంతో అందరూ విస్తుపోతున్నారు.
Also Read:- ఐసీయూ లో బండ్ల గణేశ్.. కరోనా పాజిటివే కారణమా?