అజయ్ దేవ్ గణ్, అమితాబ్ బచ్చన్ ల కాంబినేషన్ లో సినిమా.. అంత ప్రత్యేకత ఏముందిలే అనిపిస్తోందా? ప్రత్యేకత ఉంది.. దర్శకుడు మరెవరో కాదు అజయ్ దేవ్ గణే. ఆయనకు మెగాఫోన్ పట్టాలన్న కోరిక ఉన్నట్టుంది అందుకే సినిమా ప్రకటించేశారు. శరవేగంగా ఈ సినిమా మీద కసరత్తులు ఆయన చేసేస్తున్నారు. ప్రస్తుతం ఆయన రాజమౌళి ట్రిపుల్ ఆర్ మూవీలో ఓ ప్రత్యేక పాత్ర పోషిస్తున్న సంగతి తెలిసిందే. ఇప్పటికే నిర్మాతగానూ ఆయన కొన్ని ప్రయోగాలు చేశారు. ఇంతకుముందు కూడా ఆయన డైరెక్షన్ చేసినట్టున్నారు. మరో సారి అలాంటి ప్రయోగమే చేయబోతున్నారు.
ఆయన దర్శకత్వం వహించే సినిమా పేరేంటో తెలుసా.. ‘మేడే’. ఇందులో అజయ్ దేవగణ్ హీరోగా నటిస్తూనే దర్శకత్వం కూడా చేస్తారట. ఈ సినిమాకు సంబంధించి మరో ఆసక్తికర విషయం అమితాబ్ బచ్చన్ నటించడం. ప్రస్తుతం ఈ సినిమా ప్రీ ప్రొడక్షన్ దశలో ఉంది. ఈ సినిమాకి నిర్మాత కూడా ఆయనేనట. డిసెంబరు నుంచి ఈ సినిమా షూటింగ్ ను ప్రారంభించి త్వరలోనే విడుదల చేసేస్తారని అనుకోవచ్చు. బహుశా మేడే రోజు విడుదల చేస్తారేమో. మొత్తానికి అజయ్ దేవ్ గణ్ మెగాఫోన్ చేతబట్టడమే విశేషమే కదా మరి.
