పోలీసు డ్రస్కు ఒక గుర్తింపు ఉంది. ప్రజల్లో ఆ డ్రస్ పట్ల ఒక విలువ ఉంది. అటువంటి డ్రస్ మామూలు ఉద్యోగులు కూడా వేసుకుంటే ఏమవుతుంది? అప్పుడు పోలీసులకు, మామూలు వాళ్లకు తేడా ఏముంటుంది? పోలీసు ఉద్యోగం తెచ్చుకోవాలంటే అంత తేలికైన పని కాదు.. అందుకోసం శారీరికంగా దృఢంగా ఉండాలి.. పరీక్షలు దాటాలి.. ఇలా ఎంతో ప్రక్రియ ఉంటుంది. కానీ ఇకపై గ్రామ, వార్డు సచివాలయాల్లో పనిచేసే మహిళా సంరక్షణ కార్యదర్శులను ‘మహిళా పోలీసులు’గా గుర్తించిడమే కాకుండా.. వారికి పోలీసు డ్రస్ కూడా ఇవ్వాలని నిర్ణయించింది ఏపీ ప్రభుత్వం.
ఇకపై పోలీసు యునిఫాంతో డ్యూటీ..
రాష్ట్ర వ్యాప్తంగా గ్రామ, వార్డు సచివాలయాల్లో పనిచేసే మహిళా సంరక్షణ కార్యదర్శులు మహిళల సంరక్షణ కొరకు నియమించారు. విధుల్లో భాగంగా పాఠశాలలు, కాలేజీల స్త్రీల సంరక్షణ, సైబర్ క్రైం, రోడ్ సేఫ్టీ వంటి బాధ్యతలను నిర్వహిస్తారు. ఏపీ మొత్తం మీద 11,162 గ్రామ సచివాలయాలు.. 3,786 గ్రామ వార్డులు ఉన్నాయి. వాటిలో 14,978 పోస్టులకు గాను.. 13,677 పోస్టులను 2020 జనవరి నాటికి ఎంపిక పూర్తి చేసింది ప్రభుత్వం. మిగిలిన వాటిని భర్తీ చేయడానికి ప్రభుత్వ ప్రక్రియ కొనసాగుతుంది. ఆపై వీరందరినీ ‘మహిళ పోలీసులు’గా గుర్తించడంతోపాటు యునిఫాంని అందించే ప్రయత్నాలు మొదలెట్టింది ప్రభుత్వం. పోలీస్ యునిఫాంలో చేయడం వల్ల వారిలో బాధ్యత పెరగడంతోపాటు.. అందరిలో కాస్త భయం, గౌరవం ఉంటుందని ప్రభుత్వం ఈ నిర్ణయం తీసుకుంటున్నట్లుగా చెప్తుంది.
ఈ నిర్ణయం సరైనదేనా..
పోలీసు ఉద్యోగానికి ప్రత్యేక ట్రైయినింగ్ ఉంటుంది. వారెలా ప్రవర్తించాలి, నియమాలు, నిబంధనలు, పరిధిలు.. ఇలా ప్రతి ఒక్కదాన్ని వారికి ట్రెయినింగ్లో భాగంగా నేర్పుతారు. మరి మహిళా కర్యాదర్శులుగా ఎన్నుకోబడుతున్న వారికి ఎటువంటి ట్రెయినింగ్ ఇస్తుంది ప్రభుత్వం. పోలీసు నియమావళికి సంబంధించిన శిక్షణ లేకుండా పోలీసు కేడర్ ఇవ్వడం వల్ల దుష్పరిణామాలు ఎదురయ్యే అవకాశాలు ఎక్కువ. పోలీసు దుస్తుల్లో వారు అవినీతికి పాల్పడే అవకాశాలు, అధికారం చలాయించే అవకాశాల్ని ప్రభుత్వమే వారికి కల్పిస్తున్నట్టుగా ఉంది. గ్రామ వాలంటీర్ల విషయంలో ఎన్నో సమస్యలు ఎదురయ్యాయి. అన్ని అధికారాలు మావే అంటూ దుర్వినియోగం చేసినవారు.. చేస్తున్నవారు.. ఇప్పటికీ ఉన్నారు. మరి కొత్తగా తీసుకున్న ఈ సంచలన నిర్ణయం వల్ల ఎటువంటి పరిణామాలు చవి చూడాల్సవస్తుందో ఏమో?
Must Read ;- నాలుగో సింహానికి వైసీపీ రంగులు..!
