అమెరికా ఎన్నికలు ఈసారి మునుపెన్నడూ లేని ఆసక్తిని పెంచాయి. ఆనంద్ మహీంద్ర లాంటి పారిశ్రామిక వేత్తే ఓ జ్యోతిష్కుడు రాసిన అమెరికా ఎన్నికల ఫలితాన్ని తన ట్విట్టర్ అకౌంట్ ద్వారా షేర్ చేశారంటే ఈ ఎన్నికలపై ఎంత ఆసక్తి నెలకొందో అర్థం చేసుకోవచ్చు.
ఆనంద్ మహీంద్ర షేర్ చేసిన జ్యోతిష్కుడి ఫలితం నిజమైతే అతనికి ఎంత ప్రాధాన్యం లభిస్తుందోనని కూడా ఆయన కామెంట్ చేశారు. పైగా ఆ జ్యోతిషం సోషల్ మీడియా ద్వారా తెగ వైరల్ అయ్యింది. అమెరికా అధ్యక్షుడు రెండోసారి కూడా అమెరికా అధ్యక్షుడిగా గెలుపొందుతాడనేది ఆ జ్యోతిష్కుడి విశ్లేషణ. అమెరికా ఎన్నికలపై చాలామంది జ్యోతిష్కులు తమతమ జ్యోతిష విశ్లేషణలను అందించారు. దాదాపు అందరూ ట్రంప్ గెలుపొందుతారనే చెప్పారు. ఫలితాలు ఇంకా ఒక కొలిక్కి రాలేదనుకోండి.
కానీ ఒక్క ‘లియో న్యూస్’ మాత్రమే బైడెన్ గెలుస్తాడని జ్యోతిష విశ్లేషణను అందించింది. (also read: అమెరికా అధ్యక్ష పీఠం ఎవరిది? జాతకాలు ఏమంటున్నాయ్? )పైగా ట్రంప్ జాతకాన్ని విశ్లేషించి అతనిది ఓటమిని అంగీకరించలేని మనస్తత్వం అని కూడా పేర్కొంది. దాని కోసం అతను ఎంతకైనా తెగిస్తాడని విశ్లేషణను అందించింది. ‘లియో డెవోషనల్’ ఛానెల్ లో దీనిపై ఓ వీడియోను కూడా విడుదల చేసింది. ‘లియో న్యూస్’ తమ జ్యోతిష్కుల బృందంతో చర్చించి ఈ వీడియో చేయించింది.
ఎందుకీ భిన్న ధోరణులు?
జ్యోతిష్కులలోనే ఇలాంటి భిన్నధోరణులు ఈరోజు కొత్త కాదు. అసలు జ్యోతిష్కులతో ఈ తరహా విశ్లేషణలు చేయించడం కొంచెం రిస్క్ తో కూడిన పనే. ఎందుకంటే అసలు వారి పుట్టిన తేదీల వివరాలు కూడా ఒక్కోసారి లభించకపోవచ్చు. మనకు లభించిన డేటా నిజం కాకపోవడానికి అవకాశం కూడా ఉంటుంది. మరో విషయం ఏమిటంటే ఏ జ్యోతిష్కుడూ కరెక్ట్ ఫలితాన్ని విశ్లేషణ చేయలేరట. ఎంత బాగా జ్యోతిషం చెప్పగలిగిన వారైనా 60 నుంచి 70 శాతం మాత్రమే ఫలితాన్ని అంచనా వేయగలరు.
మిగతా ఫలితం కూడా వారి చేతుల్లో లేని అంశమట. దీనికి పార్వతీదేవి శాపం అనే కథను కూడా చెబుతుంటారు. అందుకే జ్యోతిష్కుల్లో రెండు రకాల గానూ ఫలితాలు వస్తుంటాయి. మన రాష్ట్ర అసెంబ్లీ ఎన్నికల్లోనూ కొందరు జ్యోతిష్కులు చంద్రబాబు నాయుడు మళ్లీ సీఎం అవుతారని చెబితే, ఇంకొందరు వై.ఎస్. జగన్మోహన్ రెడ్డి సీఎం అవుతారని చెప్పారు. అసలు జ్యోతిషమే ట్రాష్ అని కొట్టిపారేసేవారు ఇంకొందరు. అయితే దాని జోలికి మనం వెళ్లదలుచుకోలేదు. శాస్త్రపరమైన చర్చకోసమే ఇలాంటి విశ్లేషణ చేయాల్సి వచ్చింది.
ఈసారి అమెరికా అధ్యక్ష పీఠాన్ని ఎవరు అధిష్ఠించబోతున్నారనే అంశంపై ఇంగ్లీషు, హిందీలో కొంతమంది జ్యోతిష పండితులు తమ తమ విశ్లేషణలు అందించారు. దాదాపు అందరూ ట్రంప్ వైపే మొగ్గు చూపారు. కొంతమంది జ్యోతిష్కులు తమ పబ్లిసిటీ కోసం ఇలాంటి ఫలితాలు చెప్పి వైరల్ చేస్తుంటారు. అనంద్ మహీంద్ర షేర్ చేసిన జ్యోతిష విశ్లేషణ కూడా అలాంటిదే అనుకోవాలి. ఒకరకమైన జనన తేదీలు ఉన్న భిన్న ధోరణుల్లో ఆ జ్యోతిష పండితులు ఎందుకు విశ్లేషణ చేస్తున్నారో వారికే తెలియాలి.
– హేమసుందర్ పామర్తి
