సొంతపార్టీ నేతలకే వెన్నుపోటు..!
తొమ్మిదేళ్ల నిరీక్షణ తరువాత వైసీపీ అధికారంలోకి వస్తే.. పార్టీలోని ఒకేఒక వర్గం తప్పా ఏ ఒక్కరూ ఆనందంగా లేరు అన్నది వాస్తవం! ఎందుకంటే నిత్యం సోషల్ మీడియాలో అధికార వైసీపీ బాధితులం అంటూ.. సొంతపార్టీ ఎమ్మెల్యేలు, మంత్రులపై దుమ్మెత్తపోస్తున్నారు కార్యకర్తలు. అంతేకాక ప్రజాప్రతినిధులు చేస్తున్న అవినీతిని బాహాటంగానే ఎండగడుతున్నారు. ఇలా ప్రజలతో పాటు రోజురోజుకు సొంతపార్టీలో కొత్తకుంపట్లు నిత్యం రగుతూనే ఉన్నాయి. గుంటూరు జిల్లాలో అధికార వైసీపీలో వర్గపోరు తారస్థాయికి చేరుకుంది. పెదకూరపాడు నియోజకవర్గంలో ఎమ్మెల్యే శంకరరావుపై సొంతపార్టీ నేతలే విమర్శలు గుప్పిస్తున్నారు. అమరావతి మండలం మల్లాది గ్రామానికి చెందిన దళిత నేత చిన్నా.. పార్టీ నేతలపై శుక్రవారం తీవ్ర స్థాయిలో విమర్శలు గుప్పించారు. వైసీపీ కోసం తాను రూ. 30 లక్షలు నష్టపోయానని, తనలా ఎవరూ మోసపోవద్దని తన సోషల్ మీడియాలో చిన్నా వాపోయ్యారు. పదేళ్లుగా పార్టీనే నమ్ముకున్న తనలాంటి వారిని ఎవరూ పట్టించుకోవడం లేదన్నారు. మనకు టైం వస్తోంది, అప్పుడు మనమేంటో చూపుదామంటూ అసంతృప్తులకు గల కారణాలను వివరించారు. ప్రస్తుతం చిన్నా అసంతృప్తి వ్యక్తం చేస్తూ తీసుకున్న సెల్పీ వీడియో సోషల్ మీడియాలో వైరల్ మారింది.
చిలకలూరిపేట, పొన్నూరు, వినుకొండలో బహిర్గతమౌతున్న వర్గపోరు..!
గుంటూరు జిల్లా వైసీపీలో ప్రజా ప్రతినిధులకు, కార్యకర్తలకు మధ్య అధిపత్యపోరు మిన్నంటుతోంది! పొన్నూరు ఈ మధ్య పెదకాకానికి చెందిన వైసీపీ నాయకుడు ఒకరు.. ఎమ్మెల్యే తీరును విమర్శిస్తూ.. వాట్సప్ సందేశాన్ని పోస్ట్ చేశాడు. దీనిపై అదే పార్టీకి చెందిన వేరే వర్గం వారు సదరు పోస్ట్ పెట్టిన నాయకుడిపై కేసుపెట్టారు. ఈ నేపధ్యంలో తనపై అక్రమంగా కేసు పెట్టి, హింసిస్తున్నారని బాధిత వైసీపీ నాయకుడు హైకోర్టును ఆశ్రయిస్తే.. పొన్నూరు ఎమ్మెల్యే కిలారి రోశయ్య, పెదకాకాని ఎస్ఐలకు నోటీసులిచ్చింది కోర్టు! అలానే చిలకలూరిపేటలో ఎమ్మెల్యే విడదల రజని, నరసరావుపేట ఎంపీ లావు శ్రీకృష్ణదేవరాయల మధ్య పచ్చగడ్డేస్తే భగ్గుమంటుంది. వీరి అధిపత్యంపోరు ఈ మధ్య శృతిమించితే.. అధికారపార్టీలో పెద్ద తలకాయగా వ్యవహరించే నేత ఒక స్థాయిలో జోక్యం చేసుకున్నట్లు తెలుస్తోంది. మరోవైపు వినుకొండలో కూడా ఎమ్మెల్యే బొల్లా బ్రహ్మనాయుడు పై శావల్యాపురం మండలం వైసీపీ నాయకులు కారాలు మిరియాలు నూరుతున్నారు. నరేంద్ర అనే వైసీపీ నేతపై ఎమ్మెల్యే బొల్లా చెప్పుతో కొట్టేందుకు ప్రయత్నించి అబాసుపాలయ్యాడు. చెప్పుతో కొట్టేందుకు యత్నించడమేకాక నరేంద్రపై అక్రమ కేసు బనాయించి, చివరకు రూరల్ సీఐ అశోక్ కుమార్ ను సస్పెండ్ అయ్యేందుకు కారణమయ్యాడు. ఇలా గుంటూరు జిల్లాలోనే కాదు.. రాష్ట్ర వ్యాప్తంగా అధికార వైసీపీలో ఆదిపత్య పొరపచ్చాలు ఆ పార్టీ పరువును రోడ్డుకీడుస్తున్నాయి!
