యువకథానాయకుల మధ్య ఇప్పుడు గట్టిపోటీ వుంది. ఎవరికివారు కొత్తదనంతో కూడిన కథలను ఎంచుకోవడానికి తమవంతు ప్రయత్నాలు చేస్తున్నారు. తమ ఇమేజ్ కి తగిన కొత్త పాత్రలతో మెప్పించడానికి కసరత్తులు చేస్తున్నారు. గతంలో ఎక్కువగా సక్సెస్ లను అందుకున్న కథలేమిటనే విషయాలపై దృష్టిపెట్టి, ఆ తరహా కథలను ఈ జనరేషన్ కి తగినట్టుగా ఆవిష్కరించడానికి ఉత్సాహాన్ని చూపుతున్నారు. టైటిల్ దగ్గర నుంచి .. లుక్ దగ్గర నుంచి ప్రతి అంశం పట్ల ఆసక్తినిపెంచే ప్రయత్నం చేస్తూ, అందరి దృష్టిని తమ ప్రాజెక్టువైపుకు తిప్పుకునే ప్రయత్నాలు చేస్తున్నారు. అలా కెరియర్ పరంగా పట్టుదలతో పరుగులు తీస్తున్న కథానాయకులలో బెల్లంకొండ శ్రీనివాస్ కూడా కనిపిస్తున్నాడు.
‘అల్లుడు శీను’ సినిమాతో బెల్లంకొండ శ్రీనివాస్ తెలుగు తెరకి పరిచయమయ్యాడు. మాస్ ఆడియన్స్ నుంచి మంచి మార్కులు కొట్టేయాలనే ఉద్దేశంతో రంగంలోకి దిగిన బెల్లంకొండ శ్రీనివాస్, తొలి ప్రయత్నంలోనే తాను అనుకున్నది సాధించాడు. మంచి పొడగరి కావడం .. అందుకుతగిన పర్సనాలిటీ ఉండటంతో, యాక్షన్ సన్నివేశాల్లోను మెప్పించాడు. మాస్ పల్స్ తెలిసిన వీవీవినాయక్ ఈ సినిమాకి దర్శకత్వం వహించడం .. సమంతకి గల క్రేజ్ ఈ సినిమా విజయంలో ప్రధానమైన పాత్రను పోషించాయి. అప్పటి నుంచి కూడా బెల్లంకొండ శ్రీనివాస్ తన ప్రాజెక్టుల విషయంలో వెనక్కి తగ్గకుండా వరుస సినిమాలు చేస్తూనే వస్తున్నాడు.
కొత్త హీరోగా ఎంట్రీ ఇచ్చినప్పటికీ బెల్లంకొండ శ్రీనివాస్ చిన్న చిన్న సినిమాలు చేస్తూ కాలక్షేపం చేయలేదు. దర్శకుల ఎంపికలోను .. కథానాయికల ఎంపికలోను .. భారీతనంలోను ఎక్కడా రాజీ పడలేదు. తన సినిమాల్లో స్టార్ హీరోయిన్స్ తో స్పెషల్ సాంగ్స్ ఉండేలా ప్లాన్ చేస్తూ వెళ్లాడు. అందుకు పెద్ద మొత్తంలో ఖర్చు అయినా ఆయన పట్టువీడలేదు. ఈ కారణంగానే బెల్లంకొండ శ్రీనివాస్ కొత్త హీరో .. చిన్నహీరో అనే ఆలోచన ప్రేక్షకులకు రాలేదు. అలా తెలివిగా తన కెరియర్ ను నడిపిస్తూ, లుక్ పరంగా .. బాడీ లాంగ్వేజ్ పరంగా .. డైలాగ్ డెలివరీ పరంగా తనని తాను మార్చుకుంటూ వెళుతున్నాడు.
Must Read ;- అల్లుడు శీను బాలీవుడ్ లో ఎంట్రీ ఇస్తాడా?
తాను చేసిన భారీ సినిమాలు ఆశించినస్థాయిలో ఆడకపోయినా ఆయన డీలాపడలేదు. సక్సెస్ తన కోసం ఎదురుచూస్తుందన్నట్టుగానే మళ్లీ రంగంలోకి దిగడం అలవాటు చేసుకున్నాడు. అలా ఆయన క్రితం ఏడాది ‘ రాక్షసుడు‘ సినిమాతో భారీ విజయాన్ని అందుకున్నాడు. ఆ తరువాత సినిమాగా ఆయన ‘అల్లుడు అదుర్స్’ చేశాడు. ‘కందిరీగ’ ఫేమ్ సంతోష్ శ్రీనివాస్ ఈ సినిమాకి దర్శకుడిగా వ్యవహరించాడు. ‘కందిరీగ’ తరహాలోనే ఈ సినిమా కూడా మాస్ యాక్షన్ ఎంటర్టైనర్ గా రూపొందింది. ఈ సినిమాతో తనకి తప్పకుండా హిట్ పడుతుందనే నమ్మకంతో ఆయన వున్నాడు.
‘అల్లుడు‘ అనే టైటిల్ తో గతంలో వచ్చిన సినిమాలు చాలావరకూ విజయాలను అందుకున్నాయి. ‘రౌడీ అల్లుడు’ .. ‘అల్లుడు గారు’ .. ‘అల్లరి అల్లుడు’ .. ‘పెద్దింటల్లుడు’ .. ఇలా చాలా సినిమాలు ప్రేక్షకుల ఆదరణ పొందాయి. అంతెందుకు బెల్లంకొండ శ్రీనివాస్ తొలి సినిమా ‘అల్లుడు శీను’ కూడా మాస్ ఆడియన్స్ మనసు దోచుకుంది. అందువలన అల్లుడుతో కూడిన టైటిల్ సెంటిమెంట్ బలంగా వుంది. కథాకథనాలతో పాటు ఈ సెంటిమెంట్ కూడా బెల్లంకొండ శ్రీనివాస్ లో నమ్మకాన్ని పెంచుతోంది. దాంతో ఆయన ‘అల్లుడు అదుర్స్’ సినిమాతో తనకి తప్పకుండా హిట్ పడుతుందనే పూర్తి కాన్ఫిడెంట్ తో వున్నాడు. మరి ఈ అల్లుడు థియేటర్స్ లో ఏ స్థాయిలో అదరగొడతాడో చూడాలి.
Also Read ;- టాలీవుడ్ లో సోనూకు సత్కారం ‘అదుర్స్’
