రాహుల్ సిప్లిగంజ్ మంచి గాయకుడు .. తెలంగాణ యాసతో కూడిన పాటలను ఆయన బాగా పాడతాడనే ప్రత్యేకమైన గుర్తింపు వుంది. ఆయన ప్రైవేట్ ఆల్బమ్స్ కూడా జనంలోకి బాగా వెళ్లాయి. అలా ఆయన తన కెరియర్ ను స్పీడ్ పెంచుతున్న దశలోనే ‘బిగ్ బాస్ 3’లో అవకాశం వచ్చింది. ఆ సీజన్లో పాల్గొన్నవారిలో రాహుల్ ఒకడిగానే కనిపిస్తూ వచ్చాడు. ఆ తరువాత రోజులు గడుస్తున్నా కొద్దీ రాహుల్ మాత్రమే కనిపిస్తూ వచ్చాడు. అంతగా తన వ్యక్తిత్వంతో ఆయన ప్రేక్షకుల ఆదరాభిమానాలను అందుకుని ఆ సీజన్లో విజేతగా నిలిచాడు. తాజాగా ఒక టీవీ ఛానల్ కి ఇచ్చిన ఇంటర్వ్యూలో ఆయన తన గురించిన అనేక విషయాలను అభిమానులతో పంచుకున్నాడు.
*”నేను పాతబస్తీ నేపథ్యం నుంచి వచ్చాను. ఫిల్మ్ నగర్ చూస్తేనేమో అదో ప్రత్యేక ప్రపంచం. చిన్నప్పుడు ఫిల్మ్ నగర్ చూడటం కోసమే మా నాన్నతో కలిసి అక్కడికి వెళ్లేవాడిని. అలాంటి నేను సినిమా పాటలకి కోరస్ పాడటం .. ఆ తరువాత గాయకుడిగా గుర్తింపు రావడం .. అదే సమయంలో ‘బిగ్ బాస్ 3‘లో అవకాశం దక్కడం జరిగాయి. ఆ రియాలిటీ షో ద్వారా మరింత మంచి పేరు రావడం నా అదృష్టం.
*చిన్నప్పటి నుంచి నేను చిరంజీవిగారి సినిమాలు ఎక్కువగా చూసేవాడిని. అలాంటి ఆయన ‘బిగ్ బాస్ 3’ షో ఫైనల్ ఎపిసోడ్ కి గెస్టుగా రావడం .. ఆయన చేతుల మీదుగా షీల్డ్ అందుకోవడం నేను చేసుకున్న పూర్వజన్మ పుణ్యమనే అనుకుంటున్నాను.
*’బిగ్ బాస్ 3′ విజేతగా నిలిచిన తరువాత బయట కొన్ని అనుకోని సంఘటనలు జరిగాయి. వివాదాలను .. విమర్శలను ఎదుర్కోవలసి వచ్చింది. వాటి నుంచి బయటపడి మళ్లీ కెరియర్ ను దార్లో పెట్టుకోవడానికి చాలా కష్టపడవలసి వచ్చింది.
*ఆ చేదు సంఘటనను పదే పదే గుర్తుచేసుకుంటూ కూర్చోవడం కరెక్ట్ కాదనిపించింది. జరిగిన సంఘటనను ప్రస్తావించి, ఆ విషయాన్ని మళ్లీ మొదటికి తీసుకురావడం నాకు ఇష్టం లేదు. అందువల్లనే సాధ్యమైనంతవరకూ ఆ జ్ఞాపకాలను చెరిపేస్తూ ముందుకువెళ్లాను. ఒకసారి క్రేజ్ వచ్చిన తరువాత ఎంత జాగ్రత్తగా ఉండాలనేది నాకు అర్థమైంది. క్రేజ్ తెచ్చుకోవడం తేలికే, కానీ ఆ క్రేజ్ ను కాపాడుకోవడం ఎంత కష్టమనేది తెలిసొచ్చింది” అని చెప్పుకొచ్చాడు.
Must Read ;- బాలకృష్ణతో తలపడే విలన్ గా రాజశేఖర్?
