తెలుగు హీరోల స్టార్ మామూలుగా లేదు.. పక్కన పాన్ ఇండియా అనే పదాలు కూడా చేరిపోతున్నాయి. కుప్పలు తెప్పలుగా డబ్బు వచ్చిపడుతున్నప్పుడు దాంతో కాస్తన్నా ఎంజాయ్ చేయకపోతే ఏంబాగుంటుంది. అందుకే ‘అనుభవించు రాజా’ అంటూ పాడుకోకపోయినా విలాసాల వైపు కన్నేస్తున్నారు.
సినిమాల్లోనే కాదు జీవితంలో కూడా మన హీరోల లైఫ్ స్టయిలే వేరు. విదేశీ ట్రిప్పులూ, విదేశీ కారులూ.. ఒక్కటని ఏమిటిలే ఆ లైఫే వేరు. వారు కొనే కార్లు చూస్తుంటే సామాన్యుడి కళ్లు బైర్లు కమ్ముతున్నాయి. మొన్ననే ఎన్టీఆర్ కొన్న కారు వార్తల్లో తెగ వైరల్ అయ్యింది. ఆ కారు ధర ఓ సినిమా బడ్జెట్ అంత ఉందని అంటున్నారు. ఈ స్పోర్ట్స్ కారు ధర రూ. 5 కోట్లు అని అంటున్నారు. జూనియర్ ఎన్టీఆర్ కు మొదట్నుంచీ కార్లన్నా, డ్రైవింగ్ అన్నా విపరీతమైన పిచ్చి.
నేటి తరంలో లగ్జరీ వస్తువుల వాడకంలో ఎన్టీఆర్ ముందుంటారు. ఇటీవల ఆయన వాడిన కరోనా మాస్క్ ధర రూ. 2300 అట. వామ్మో మాస్కే ఇంతా అని ఎవడో సెట్లో అంటే పక్కనున్నోడు మూస్కో అని వార్నింగ్ ఇచ్చాడట. ఆయన షూస్ ధర రూ. 70 వేల పైమాటేనట. ఇక ఎన్టీఆర్ రిస్ట్ వాచ్ ధర అయితే ఏకంగా రూ. 2.20 కోట్లు. రాజమౌళి కుమారుడి వివాహానికి వెళ్లిన సందర్భంలో ఈ వాచ్ ధరించారు. ఇప్పుడు కొన్న కారును ఇటలీ నుంచి దిగుమతి చేసుకున్నారు.
కారుల్లో మార్గదర్శి మెగాస్టారే
నేటి హీరోలు ఇలాంటి కారులపై మోజు పడటానికి మార్గదర్శి మన మెగాస్టార్ చిరంజీవే అనుకోవాలి. ఆయన తనకు స్టార్ డమ్ వచ్చిన తొలినాళ్లలోనే ఫారిన్ కారును దించేశారు. దాని అద్దాలు పైకి లేస్తుంటే జనం కూడా వింతగా చూసేవారు. అప్పట్లో ఆ కారును ‘చక్రవర్తి’ అనే ఓ సినిమాలో కూడా ఉపయోగించారు. అత్యంత ఖరీదైన ఆ కారు చిరంజీవి దగ్గర ఇప్పటికీ ఉంది. ఈ కారుల్లో వారు బయట పెద్దగా తిరగకపోయినా వారి షెడ్డుల్లో మాత్రం అలంకార ప్రాయంగా ఉంటాయి. ఏదైనా ఫంక్షన్ లు జరిగితే గానీ వాటిలో వెళ్లరు. అప్పట్లోనే అలాంటి కారును కొన్న చిరంజీవి ఇప్పుడు అంతకుమించి కారును కొనకుండా ఎలా ఉంటారు. చాలా కార్లను ఆయన కొన్నారు. ముఖ్యంగా రేంజ్ రోవర్ వోగ్, టయోటా ల్యాండ్ క్రూయిజర్, రోల్స్ రాయిస్ ఫొంటమ్ లాంటి కార్లు ఆయన దగ్గర ఉన్నాయి.
నాగ్ ను మించి చైతు
అక్కినేని ఫ్యామిలీలో కార్ల మీద మోజు నాగార్జునకన్నా ఆయన కుమారుడు చైతూకే ఎక్కువ. పైగా అతను చిన్నప్ప నుంచి గోకార్టింగ్ చేసేవాడు. ఇప్పటికీ బైక్ ల మీద కూడా తిరుగుతూ రోడ్లపై చైతూ కనిపిస్తుంటాడు. అతని దగ్గర ఉన్న కార్లయితే సరేసరి. ఎక్కువగా నిస్సాన్ జీటీఆర్ నడుపుతుంటాడు. ఇటీవలే ఓ లగ్జరీ బెంజ్ కారు కొనుగోలు చేసి సామ్ తో చక్కర్లు కొట్టాడు. అతని దగ్గరున్న కారులు చూసి తమ్ముడు అఖిల్ కూడా ముచ్చటపడుతుంటాడట. వీరిద్దరూ కలిసి కార్ల దగ్గర ఫొటోలు కూడా దిగుతుంటారు. కార్ల కొనుగోలు విషయంలో అఖిల్ కూడా తక్కువేమీ తినలేదు.
Must Read ;- కొత్త కారులో చైతూ సామ్ షికారు
ప్రతి హీరో దగ్గరా ఖరీదైన ఫారిన్ కారు తప్పనిసరిగా ఉంటుంది. హీరో రాజశేఖర్ దగ్గర కూడా ఓ ఫారిన్ కారుంది. దాన్ని అప్పుడప్పుడూ ఫిలిం ఛాంబర్ కు వేసుకొస్తుంటారు. రవితేజ దగ్గర ఒక మెర్సిడెస్ బెంజ్ ఎస్-క్లాస్ ఉంది. ఈ ఎగ్జిక్యూటివ్ కారునే రవితేజ ఎక్కువగా వాడుతుంటారు. అంతెందుకు హీరో శ్రీకాంత్ దగ్గర కూడా ఓ ఫారిన్ కారు ఉంది. శ్రీకాంత్ కు మొహమాటం ఎక్కువ. ఎవరైనా ఫ్రెండ్ కారు అడిగితే ఇచ్చేస్తుంటాడు. నటుడు సునీల్ అలా ఓ కారును అడిగి వేసుకు వెళ్లి యాక్సిడెంట్ చేసిన విషయం మనకు తెలుసు. పవర్ స్టార్ పవన్ కళ్యాణ్ మాత్రం మెర్సిడెస్ అభిమాని. మెర్సిడెస్ బెంజ్ జి 55 ఎఎమ్జి, మెర్సిడెస్ బెంజ్ ఆర్-క్లాస్, ఆడి క్యూ 7 కార్లు ఆయన దగ్గర ఉన్నాయి.
అల్లు అర్జున్ దగ్గర బిఎమ్డబ్ల్యూ ఎక్స్ – 6 ఉంది. ఇంకా చాలా కార్లు ఉన్నాయి గానీ ఈ మధ్య కాలంలో ఆయన కార్వాన్ ఎక్కువ వైరల్ అయ్యింది. ఇక బాలకృష్ణ విషయానికి వస్తే విదేశీ కార్ల మోజు బాలకృష్ణకు ఎక్కువే. మంచి కారుపై కన్ను పడిందంటే తన సొంతమై పోవాల్సిందే. అలా ఆయన దగ్గర చాలా కార్లు ఉన్నాయి. జర్మనీలో తయారైన కారు కూడా ఆయన దగ్గర ఉంది. సూపర్ స్టార్ మహేష్ బాబు 36వ పుట్టిన రోజున రూ. 1.5 కోట్లు విలువ చేసే రేంజ్ రోవర్ వోగ్ ను ఆయన భార్య నమ్రత కానుకగా ఇచ్చింది. అతను రేంజ్ రోవర్ అభిమాని. శ్రీమంతుడు ఘనవిజయం తర్వాత రూ. 4 కోట్ల ఖరీదు చేసే కారును కొనుగోలు చేశారు.
Also Read ;- సూపర్ స్టార్స్.. స్టయిలిష్ కార్వాన్ వార్స్
పాన్ ఇండియా హీరో కారు చూస్తే..
పాన్ ఇండియా స్టార్ ప్రభాస్ కారు చూస్తే కళ్లు చెదిరిపోవాల్సిందే. ఆయన రేంజ్ కి రేంజ్ రోవర్ సరిపోదనుకున్నాడేమో రోల్స్ రాయిస్ లో అత్యంత ఖరీదైన కారును కొనుగోలు చేశాడు. మెగాస్టార్ చిరంజీవి దగ్గర ఉన్న కారులాంటిదే ఇది కూడా. దీని ధర రూ. 8 కోట్లు అంటున్నారు. జాగ్వార్ ఎక్స్ జే, బీఎండబ్ల్యు ఎక్స్ 5 లాంటి కార్లు కూడా ప్రభాస్ దగ్గర ఉన్నాయి. రామ్ చరణ్ దగ్గర బ్రిటీష్ మోడల్ కార్లు ఉన్నాయి. పెళ్లికి బహుమతిగా వచ్చిన ఆస్టన్ మార్టిన్ కారు కూడా అతని వద్ద ఉంది. దీని ధర దాదాపు రెండు కోట్లు. వీరి దగ్గర ఇన్ని కార్లు ఉన్నా తిరిగేది మాత్రం తక్కువ. సొంతంగా చార్టర్లు ఫ్లైట్లే ఉన్నప్పుడు ఈ కార్తది పెద్ద లేక్కేం కాదు. కనీసం స్టేటస్ సింబల్ గా నైనా ఇలాంటి కార్లు వారి ఆవరణలో ఉండాల్సిందే. ఇదీ మన తెలుగు హీరోల కార్ల మోజు.
– హేమసుందర్ పామర్తి
