విజయవాడ ఉత్సవ్ వేదికగా ఏపీ సీఎం చంద్రబాబు నాయుడు నడుపుతున్న కల్చరల్ డిప్లొమసీపై ప్రముఖ జాతీయ దినపత్రిక ది ఎకనామిక్ టైమ్స్ ఇంట్రెస్టింగ్ కథనాన్ని ప్రచురించింది. దేశంలోనే అత్యంత సీనియర్, అనుభవజ్ఞుడైన సీఎంగా ఉన్న చంద్రబాబు, రాజకీయ విభేదాలను పక్కనబెట్టి దక్షిణాది దళపతి పాత్రని పోషిస్తూ ప్రాంతీయ సమన్వయానికి సరికొత్త దారులు వేస్తున్నారని ది ఎకనామిక్ టైమ్స్ కొనియాడింది.
దేశరాజధాని ఢిల్లీలో కేంద్ర ఎన్నికల సంఘం ప్రధాన కమిషనర్ అంశంపై వివాదాలు, రాజకీయ నిరసనలు వెల్లువెత్తుతున్న తరుణంలో, ఇటు చంద్రబాబు నాయుడు అత్యంత వ్యూహాత్మకంగా వ్యవహరిస్తున్నారు. కేంద్రంలోని బీజేపీ నేతృత్వంలోని NDA కూటమిలో తాను కీలక భాగస్వామిగా ఉంటూనే, ప్రతిపక్ష (Non-NDA / INDIA Bloc) ముఖ్యమంత్రులతోనూ మమేకమవుతూ దక్షిణాది రాష్ట్రాల ఉమ్మడి ప్రయోజనాల కోసం దక్షిణాది కూటమికి బాటలు వేస్తున్నారని ఎకనామిక్ టైమ్స్ కథనం వెల్లడించింది.
దక్షిణాది రాష్ట్రాల మధ్య తరతరాలుగా కొనసాగుతున్న నదీ జలాల వివాదాలకు స్వస్తి పలకడమే లక్ష్యంగా చంద్రబాబు ముందుకుసాగుతున్నారు. గోదావరి – కావేరి నదుల అనుసంధానం వంటి క్లిష్టమైన ప్రాజెక్టుల ద్వారా నీటి ఎద్దడికి పరిష్కారం చూపుతుందని చంద్రబాబు ప్రతిపాదిస్తున్నారు. జాతీయ వాటర్ గ్రిడ్ ఏర్పాటుపై ప్రధాని నరేంద్ర మోదీకి విజ్ఞప్తి చేసిన కొద్ది రోజులకే, పొరుగు రాష్ట్రాల ముఖ్యమంత్రులను విజయవాడ ఉత్సవ్కు ఆహ్వానించి నీటి పంపిణీపై ఉమ్మడి అవగాహన తెచ్చే ప్రయత్నం చేయడం గమనార్హం.
రాజకీయాలు, పారిశ్రామిక పెట్టుబడుల ఆకర్షణలో ఆంధ్రప్రదేశ్కు ప్రధాన పోటీదారుగా ఉన్న తమిళనాడు ముఖ్యమంత్రి సి. జోసెఫ్ విజయ్ ఈ ఉత్సవానికి హాజరుకావడం హైలెట్. ఉత్సవాల్లో పాల్గొనడంతో పాటు, చంద్రబాబుతో జరిగిన ప్రత్యేక భేటీలో చెన్నైకి కృష్ణా జలాల సరఫరా, ప్రతిపాదిత గోదావరి-కావేరి నదుల అనుసంధానంపై వీరిద్దరూ సుదీర్ఘంగా చర్చించారు.
ఈ వేడుకలకు కర్ణాటక సీఎం డి.కె.శివకుమార్ ఇతర అధికారిక కార్యక్రమాల వల్ల రాలేకపోతున్నట్లు ముందస్తు సమాచారం ఇవ్వగా, తెలంగాణ ముఖ్యమంత్రి రేవంత్ రెడ్డి మాత్రం చంద్రబాబు ఆహ్వానాన్ని అంగీకరించారని కథనంలో పేర్కొన్నారు. దసరాకు ముందే రేవంత్ రెడ్డి విజయవాడ వచ్చి చంద్రబాబుతో సమావేశమయ్యే అవకాశం ఉందని సమాచారం.
గతంలో మామూలుగా సాగిన విజయవాడ ఉత్సవాలు ఈసారి రంగులమయంగా, చాలా అట్టహాసంగా జరుగుతున్నాయి. ఈ ఉత్సవాల్లో రాష్ట్రపతి ద్రౌపది ముర్ము, చైనా రాయబారి శు ఫేహాంగ్, మధ్యప్రదేశ్ సీఎం మోహన్ యాదవ్ తదితర అగ్రనేతలు, ప్రముఖులు పాల్గొనడంతో ఈ వేదికకు జాతీయ, అంతర్జాతీయ స్థాయిలో గుర్తింపు లభించింది. కేంద్రంలో బ్యాలెన్సింగ్ పాలిటిక్స్ చేస్తూనే, దక్షిణాది రాష్ట్రాలను ఒకే తాటిపైకి తెచ్చేందుకు ఒక రీజినల్ కాన్సెన్సస్ బిల్డర్గా చంద్రబాబు వ్యవహరిస్తున్న తీరును జాతీయ మీడియా ప్రత్యేకంగా ప్రశంసించింది.











