ఏపీ జీవనాడి పోలవరం ప్రాజెక్టు నిర్మాణం సందిగ్ధంలో పడింది. పోలవరం ప్రాజెక్టును జాతీయ ప్రాజెక్టుగా ప్రకటించడంతో నిర్మాణ, పునరావాస వ్యయం మొత్తం కేంద్ర ప్రభుత్వ భరిస్తుందని అందరూ భావించారు. అయితే 2014 రాష్ట్ర విభజనకు ముందు ప్రాజెక్టు అంచనా వ్యయాన్ని అంటే కేవలం రూ.20398 కోట్లు మాత్రమే భరించాలని కేంద్ర ఆర్థిక శాఖ నిర్ణయించింది. ఈ మొత్తానికి మించి ఒక్క రూపాయి కూడా ఇవ్వడానికి వీల్లేదని కేంద్ర ఆర్థిక శాఖ, జలవనరుల శాఖను ఆదేశించింది. అంటే 2014కు ముందు పోలవరం ప్రాజెక్టు అంచనా వ్యయాలను మాత్రమే పరిగణనలోకి తీసుకోవాలని కేంద్రం నిర్ణయించినట్టు తెలుస్తోంది. ఇదే జరిగితే పోలవరం పునరావాసానికి రావాల్సిన రూ.30000 కోట్లు నిలిచిపోయే ప్రమాదం ఉంది.
పునరావాసం కేంద్రానికి పట్టదా…
పోలవరాన్ని జాతీయ ప్రాజెక్టుగా ప్రకటించిన తరవాత దాన్ని పూర్తి చేసే బాధ్యత కేంద్రమే తీసుకోవాల్సి ఉంటుంది. అయితే కేంద్ర ప్రభుత్వం పోలవరం పనులు చేపడితే పదేళ్లకు కూడా పనులు పూర్తి కావని చంద్రబాబునాయుడు ప్రభుత్వం పనులు చేసేందుకు ముందుకు వచ్చింది. దీనికి అంగీకరించిన కేంద్ర ప్రభుత్వం పోలవరం నిర్మాణ, పునరావాస బాధ్యతలను రాష్ట్ర ప్రభుత్వానికి అప్పగించింది. గత ఆరేళ్లలో ప్రధాన ప్రాజెక్టు నిర్మాణ పనులు 73 శాతం పూర్తయ్యాయి. వచ్చే ఏడాది మే నాటికి నిర్మాణ పనులు పూర్తి చేసి జులై నుంచి సాగునీరు అందిస్తామని రాష్ట్ర ప్రభుత్వం ప్రకటించింది. అయతే పునరావాసం పూర్తి కాకుండా ప్రాజెక్టులో కేవలం 45 మీటర్ల వరకే నీటిని నిల్వ చేయడం వల్ల పెద్దగా ప్రయోజనం ఉండదని రైతులు ఆందోళన వ్యక్తం చేస్తున్నారు.
పోలవరాన్ని బ్యారేజీగా మారుస్తారా…
పోలవరం ప్రాజెక్టును పూర్తి స్థాయిలో నిర్మిస్తే 190 టీఎంసీల నీటిని నిల్వ చేసుకునేందుకు అవకాశం ఏర్పడుతుంది. ఇందుకు 273 గ్రామాలు ఖాళీ చేయించాల్సి ఉంది. 7 మండలాల్లోని 2 లక్షల మందికి పునరావాసం కల్పించాల్సి ఉంది. ఇందుకు తాజా గణాంకాల ప్రకారం రూ.30 వేల కోట్లు ఖర్చవుతుందని అంచనా. అయితే ఈ మొత్తం కేంద్ర ప్రభుత్వం చెల్లించేందుకు ఆసక్తి చూపడం లేదు. పోలవరం ప్రధాన డ్యామ్ ను పూర్తి స్థాయిలో నిర్మించినా, పునరావాసం పూర్తి చేయకుండే నీటిని నిల్వ చేసుకునే సామర్థ్యం కోల్పోవాల్సి ఉంటుంది. పోలవరం ప్రాజెక్టు పునరావాసానికి మరో రూ.600 కోట్లు ఖర్చు చేసి, కేవలం 45 మీటర్ల వరకే నీటిని నిల్వ చేయాలని రాష్ట్ర ప్రభుత్వం ప్రయత్నిస్తున్నట్టు తెలుస్తోంది. దీని వల్ల వరద నీటిని నిల్వ చేసుకుని వాడుకునే అవకాశాన్ని కోల్పోవాల్సి ఉంటుంది. కేంద్ర ప్రభుత్వం పునరావాసానికి నిధులు ఇచ్చేందుకు ముందుకు రాకపోయినా, పోరాడాల్సిన రాష్ట్ర ప్రభుత్వం చేతులెత్తేసింది. దీంతో ఏపీ జీవనాడి ఆగిపోయే ప్రమాదం ఏర్పడింది.
పోలవరం కుడి కాలువకు మరో ఎత్తిపోతల
పోలవరం ప్రాజెక్టు కుడి కాలువలోకి డెడ్ స్టోరేజీ నీటిని ఎత్తిపోసేందుకు రాష్ట్ర ప్రభుత్వం టెండర్లు పిలిచింది. రూ800 కోట్ల ఖర్చుతో కుడికాలువలోని పోలవరం డెడ్ స్టోరీజీ నీటిని ఎత్తిపోయాలని రాష్ట్ర ప్రభుత్వం భావిస్తోంది. ఇందుకు అవసరమైన ప్రక్రియను కూడా చురుగ్గా పూర్తి చేస్తోంది. అంటే పోలవరం నిర్వాసితులకు పునరావాసం కల్పించి పూర్తి స్థాయిలో నీటిని నిల్వ చేయాలనే తలంపు రాష్ట్ర ప్రభుత్వానికి కూడా లేనట్టు తెలుస్తోంది. అందుకే పోలవరం కుడి కాలువకు డెడ్ స్టోరేజీ నీటిని ఎత్తిపోసేందుకు మరో ఎత్తిపోతల పథకానికి సిద్దం అవుతోందని రైతు సంఘాల నాయకులు ఆందోళన వ్యక్తం చేస్తున్నారు. ఇదే జరిగితే పోలవరం ప్రాజెక్టు మరో బ్యారేజీగా మారే ప్రమాదం ఉందనడంలో ఎలాంటి సందేహం లేదు.
Also Read : ఉండవల్లి మాట : పోలవరం ప్రాజెక్టుకు కేంద్ర, రాష్ట్ర ప్రభుత్వాలు అన్యాయం
