ఏపీ ప్రభుత్వం సంచలన నిర్ణయం తీసుకుంది. కరోనా వ్యాప్తిని అడ్డుకునేందుకు కఠిన చర్యలకు ఉపక్రమించింది. ఇందులో భాగంగా డిసెంబరు 31, జనవరి1న రాష్ట్రం మొత్తం కర్ఫ్యూ విధించింది. జనవరి 15 నుంచి మార్చి 15 వరకు కరోనా రెండో దశ వ్యాప్తి చెందే ప్రమాదం ఉందని కేంద్ర నిపుణులు హెచ్చరించిన నేపధ్యంలో ఏపీ ప్రభుత్వం ఈ నిర్ణయం తీసుకుంది. డిసెంబరు 25వ తేదీ క్రిస్మస్ వేడుకలతోపాటు, పేదలకు సెంటుభూమి పంపిణీ, ఇళ్ల నిర్మాణాలకు శంకుస్థాపనలు మాత్రం యధావిధిగా జరగనున్నాయి. డిసెంబరు 25వ తేదీన గుంపులు పోగైనా కరోనా రాదని ప్రభుత్వం భావిస్తోందని విపక్షాలు విమర్శిస్తున్నాయి.
కట్టడి చర్యలు ఇలా ఉంటాయి
డిసెంబరు 26 నుంచే కరోనా కట్టడి చర్యలు ప్రారంభం కానున్నాయి. డిసెంబరు 26 నుంచి ప్రభుత్వం నిర్ధేశించిన సమయాల్లోనే వ్యాపార సముదాయాలు తెరవాలని ఆదేశించారు. ఇక విద్యా సంస్థలు కూడా ప్రత్యేక జాగ్రత్తలు తీసుకోవాలని అధికారులు సూచించారు. ప్రభుత్వ ఉపాధ్యాయులు, కరోనా లక్షణాలు ఉన్న విద్యార్ధులకు ఆర్టీపీసీఆర్ టెస్టులు తప్పనిసరి చేశారు. ప్రతి విద్యార్థికి గోరు వెచ్చని వేడి నీరు తాగేందుకు అందుబాటులో ఉంచాలని, మాస్క్ తప్పనిసరిగా ధరించాలని విద్యాశాఖ అధికారులు ఆదేశాలు జారీచేశారు. డిసెంబరు 31, జనవరి 1న విద్యాసంస్థలు కూడా పూర్తిగా మూసివేసే అవకాశం ఉంది. ఇక బార్లు, వైన్ షాపులు మాత్రం తెరిచే ఉంటాయని ప్రభుత్వం తెలిపింది. అయితే సాధారణ రోజుల్లో మాదిరిగా కాకుంకా కొంత సమయం తగ్గించి అమ్మకాలు జరపాలని ప్రభుత్వం నిర్ణయించింది.
Must Read ;- బార్లకు బ్యాండ్.. బ్రాండ్లకు బ్రాండ్ అంబాసిడర్ గా సర్కార్
కరోనా నిబంధనలు
డిసెంబరు మూడో వారం నుంచే కరోనా కట్టడి చర్యలు మరలా ప్రారంభించాలని ఏపీ ప్రభుత్వం నిర్ణయించింది. ఇందులో భాగంగా డిసెంబరు మూడో వారం తరవాత పెళ్లిళ్లకు వంద మంది, రాజకీయ కార్యక్రమాలకు 200 మందికే అనుమతి ఇవ్వనున్నారు. అంత్యక్రియలకు 20 మంది, పెద్దకర్మలకు 50 మంది వరకు అనుమతి లభిస్తుంది. ఫిబ్రవరి వరకు అన్ని క్రీడా కార్యక్రమాలు నిషేధించారు. డిసెంబరు 26 తరవాత 65 సంవత్సరాలు దాటిన వృద్ధులు, పదేళ్లు దాటని పిల్లలు బయట విచ్చలవిడిగా తిరగడానికి వీల్లేదని, అత్యవసరం అయితేనే బయటకు రావాలని ప్రభుత్వం ఆదేశించింది.
కరోనా కట్టడికా, నిమ్మగడ్డను కట్టడి చేయడానికా?
ఏపీలో కరోనా వైరస్ వ్యాప్తి తగ్గిపోయింది. ప్రభుత్వ గణాంకాలే ఈ విషయాలను వెల్లడిస్తున్నాయి. రోజుకు పది వేల కరోనా కేసుల నుంచి నేడు రోజుకు కేవలం 600 కేసులు మాత్రమే నమోదవుతున్నాయి. ఈ సంఖ్య రోజు రోజుకు తగ్గుతోంది. ఈ సమయంలో ప్రభుత్వం నూతన సంవత్సర వేడుకలు రద్దు చేయడం, కర్ఫ్యూ పెట్టడంపై ప్రతిపక్షాలు ఆందోళన వ్యక్తం చేస్తున్నాయి. డిసెంబరు 25న క్రిస్మస్ పండగతోపాటు, ప్రభుత్వం సెంటు భూమి పంపిణీ కార్యక్రమం భారీ ఎత్తున చేపట్టనుంది.
ఈ కార్యక్రమాల్లో కరోనా వ్యాప్తి చెందదా? అని ప్రతిపక్షాలు ప్రశ్నిస్తున్నాయి. కేవలం స్థానిక సంస్థలు ఎన్నికలను అడ్డుకునేందుకే ప్రభుత్వం ఈ చర్యలకు దిగుతోందని వారు అనుమానిస్తున్నారు. జనవరిలో కరోనా టీకా అందుబాటులోకి వస్తుందని చెబుతూనే ఇలాంటి చర్యలకు పాల్పడటం, కేవలం స్థానిక ఎన్నికలు అడ్డుకునేందుకేనని వామపక్షాల నేతలు విమర్శిస్తున్నారు. రాష్ట్ర ఎన్నికల కమిషనర్ ఫిబ్రవరిలో స్థానిక ఎన్నికలు నిర్వహించాలని ప్రయత్నిస్తున్నారు. అయితే కోవిడ్ టీకా రెండు డోసులు వేయాల్సి ఉన్నందున ప్రభుత్వ సిబ్బంది మొత్తం ఆ కార్యక్రమంలో ఉంటారని, ఫిబ్రవరిలో స్థానిక ఎన్నికలు సాధ్యం కాదని ఇప్పటికే ప్రభుత్వం హైకోర్టులో అఫిడవిట్ దాఖలు చేసింది. దీనిపై విచారణ జరగాల్సి ఉంది
రెండు వ్యవస్థల మధ్య పోరుతో జనం అవస్థలు
ఫిబ్రవరిలో స్థానిక ఎన్నికలు నిర్వహించాలని రాష్ట్ర ఎన్నికల కమిషనర్ నిమ్మగడ్డ రమేష్ కుమార్ చేయని ప్రయత్నం లేదు. కానీ ప్రభుత్వం మాత్రం నిమ్మగడ్డ పదవీ విరమణ చేసే వరకూ అంటే మార్చి చివరి వరకు స్థానిక ఎన్నికలకు సహకరించకూడదని నిర్ణయానికి వచ్చినట్టు తెలుస్తోంది. రెండు వ్యవస్థల మధ్య పోరుతో జనానికి కర్ఫ్యూ రూపంలో కొత్త కష్టాలు వచ్చిపడ్డాయి. దేశంలోనే కాదు ప్రపంచంలో ఎక్కడా కరోనా కారణంగా ప్రస్తుతం కర్ఫ్యూ పెట్టలేదు. కేవలం జాగ్రత్తలు పాటించాలని ప్రభుత్వాలు సూచిస్తున్నాయి. మనదేశంలో కరోనా అదుపులోకి వస్తోంది. ఏపీలోనూ భయంకరమైన పరిస్థితులు లేవు. కరోనా భయంతో ఇప్పటికే పేదలు, మధ్యతరగతి జనం ఉపాధి కోల్పోయి అనేక అవస్థలు పడుతున్నారు. మరలా కరోనా బూచి చూపి జనాన్ని కట్టడి చేయాలని చూస్తే తిరగబడే ప్రమాదం పొంచి ఉంది.
Also Read ;- వైసీపీ సర్కారు దృష్టంతా స్థానిక ఎన్నికలు తప్పించడం పైనే
