నిమ్స్ మాజీ డైరెక్టర్, ప్రముఖ రేడియాలజిస్ట్ కాకర్ల సుబ్బారావు కన్నుమూశారు. అనారోగ్యంతో బాధపడుతున్న ఆయన హైదరాబాద్లోని కిమ్స్ ఆసుపత్రిలో చికిత్స పొందుతూ శుక్రవారం ఉదయం తుదిశ్వాస విడిచారు. 1925లో కృష్ణా జిల్లా పెదముత్తేవిలో వ్యవసాయ కుటుంబంలో జన్మించిన కాకర్ల సుబ్బారావు విశాఖలోని ఆంధ్రా మెడికల్ కాలేజీ నుంచి డాక్టర్ పట్టా పొందారు. 1951లో హౌస్ సర్జన్ చేసిన తర్వాత ఉన్నత విద్య కోసం అమెరికాకు వెళ్లి రేడియాలజీ బోర్డు పరీక్షల్లో ఉత్తీర్ణత సాధించారు. 1954-56 మధ్య న్యూయార్క్, బాల్టిమోర్ నగరాల్లోని పలు ఆసుపత్రుల్లో పనిచేశారు. 1956లో స్వదేశానికి తిరిగి వచ్చిన ఆయన హైదరాబాద్లోని ఉస్మానియా మెడికల్ కాలేజీలో అసిస్టెంట్ ప్రొఫెసర్గా చేరారు. ఆ తర్వాత అదే కాలేజీలో చీఫ్ రేడియాలజిస్టుగా పదోన్నతి పొందారు. అనంతరం హైదరాబాద్ నిమ్స్ ఆసుపత్రి డైరెక్టర్గా సేవలందించారు.
ఎన్టీఆర్ విజ్ఞప్తి మేరకు
1970లో సుబ్బరావు మళ్లీ అమెరికా వెళ్లారు. 1986లో ఎన్టీ రామారావు ప్రవాస ఆంధ్రులకు చేసిన విజ్ఞప్తి మేరకు కాకర్ల స్వదేశానికి తిరిగి వచ్చి హైదరాబాద్ నిమ్స్ లో కీలక బాధ్యతలు చేపట్టారు. రాష్ట్రంలోని ప్రైవేటు, కార్పొరేట్ ఆసుపత్రులకు దీటైన స్థాయికి నిమ్స్ ను తీసుకొచ్చారు. వైద్యశాఖకు, మానవాళికి చేసిన సేవకు గుర్తింపుగా కేంద్ర ప్రభుత్వం నుంచి 2000 సంవత్సరంలో పద్మశ్రీ అవార్డు పొందారు.
Must Read ;- తెలుగు పాటలకు వెలుగులద్దిన హాసం రాజా ఇకలేరు
