టాలీవుడ్ యువ కథానాయకులలో విజయ్ దేవరకొండకి వున్న క్రేజ్ అంతా ఇంతా కాదు. విజయ్ దేవరకొండ బాడీలాంగ్వేజ్ .. ఆయన డైలాగ్ డెలివరీ ప్రత్యేకంగా ఉంటాయి. అందువలన యూత్ లోను .. మాస్ లోను ఆయనకి మంచి ఫాలోయింగ్ వుంది. ఆ మధ్య వరుస హిట్లతో దుమ్మురేపేసిన ఈ హీరోకి, ఆ తరువాత పరాజయాలు పలకరించాయి. ‘డియర్ కామ్రేడ్’ .. ‘వరల్డ్ ఫేమస్ లవర్‘ చిత్రాలు ఆయన అభిమానులను అంతగా ఆకట్టుకోలేకపోయాయి. దాంతో ప్రస్తుతం చేస్తున్న ‘ఫైటర్‘ సినిమాతో తప్పకుండా హిట్ కొట్టాలనే పట్టుదలతో ఆయన వున్నాడు. పూరి జగన్నాథ్ దర్శకత్వం వహిస్తున్న ఈ సినిమా, వచ్చే ఏడాది ప్రథమార్థంలో ప్రేక్షకులను పలకరించనుంది.
‘ఫైటర్’ సినిమాకంటే ముందుగా విజయదేవరకొండ ‘హీరో’ మూవీ చేయవలసి వుంది. మైత్రీ మూవీ మేకర్స్ వారి నిర్మాణంలో క్రితం ఏడాది ఈ ప్రాజెక్టు మొదలైంది. ఆనంద్ అన్నామలై అనే తమిళ దర్శకుడితో ఈ ప్రాజెక్టుకు కొబ్బరికాయ కొట్టారు. కొరటాల శివ క్లాప్ తో మొదలైన ఈ సినిమా, ఢిల్లీలో తొలి షెడ్యూల్ షూటింగును పూర్తిచేసుకుంది కూడా. విజయ్ దేవరకొండ బైక్ రేసర్ గా నటించే ఈ సినిమాలో, ఆయన జోడీగా మాళవిక మోహనన్ ను ఎంపిక చేశారు. ఆ తరువాత రెండవ షెడ్యూల్ మాత్రం మొదలుకాలేదు. ఈ నేపథ్యంలో ఈ ప్రాజెక్టు ఆగిపోయిందనే ప్రచారం జోరుగానే జరిగింది.
విజయ్ దేవరకొండ తనకి వెంటనే ఒక హిట్ పడాలనే ఉద్దేశంతో ముందుగా పూరి సినిమా ‘ఫైటర్’ కి ప్రాధాన్యతను ఇచ్చాడనీ, ఆ తరువాత ‘హీరో’ సెట్స్ పైకి వెళతాడనే టాక్ ఫిల్మ్ నగర్లో వినిపించింది. అభిమానులు కూడా నిజమే కామోసు అనుకున్నారు. బయట ప్రచారం జరుగుతున్నట్టుగా ‘హీరో’ ఆగిపోలేదనీ, వాయిదా మాత్రమే పడిందని ఒకానొక సందర్భంలో విజయ్ దేవరకొండ తన అభిమానులకు తెలియజేశాడు కూడా. దాంతో వాళ్లందరూ మరింత నమ్మకంతో ఆ సినిమా కోసం ఎదురుచూస్తున్నారు.
అయితే విజయ్ దేవరకొండ ‘ఫైటర్’ తరువాత, శివ నిర్వాణ దర్శకత్వంలో ఒక సినిమా చేయనున్నాడనే వార్త ఒకటి బయటికి వచ్చింది. మార్చి నుంచి ఈ సినిమా రెగ్యులర్ షూటింగ్ మొదలవుతుందనే టాక్ వచ్చింది. ఆర్మీ నేపథ్యంలో రూపొందనున్న ఈ సినిమాలో, విజయ్ దేవరకొండ ‘మేజర్’ పాత్రలో కనిపించనున్నాడని తెలుస్తోంది. యాక్షన్ తో పాటు సున్నితమైన ప్రేమకథాంశాన్ని టచ్ చేస్తూ ఈ కథ నడుస్తుందని అంటున్నారు. విజయ్ దేవరకొండ ‘హీరో’ గురించి ఏమీ మాట్లాడకుండా, శివ నిర్వాణతో సెట్స్ పైకి వెళ్లేందుకు సిద్ధపడుతుండటంతో అభిమానులు ఆలోచనలో పడ్డారు. అసలు ‘హీరో’ సినిమా వున్నట్టా .. లేనట్టా? అనే సందేహం వాళ్లను వెంటాడుతోంది. ఈ విషయంపై విజయ్ దేవరకొండ ఎలా స్పందిస్తాడో చూడాలి.
Must Read ;- హీరో విజయ్ దేవరకొండ చూపు బాలీవుడ్ వైపు
