మాజీ మంత్రి ఈటల రాజేందర్ వ్యవహరం రోజుకో మలుపు తిరుగుతోంది. ఈటల తెలంగాణ మంత్రి వర్గం నుంచి వైదొలిగిన నాటి నుంచే తెలంగాణలో రాజకీయాలు ఆసక్తిగా మారాయి. అయితే ఈటల రాజేందర్ వరుస భేటీలు, చర్చలు, మంతనాలు జరుపుతుండటంతో తెలంగాణ అంతటా హాట్ టాపిక్ మారుతోంది. ఇప్పటికే పలు పార్టీల నేతలతో చర్చలు జరిపినప్పటికీ ఏ పార్టీలో చేరుతారో లేదోనని స్పష్టత ఇవ్వకపోడం కూడా చర్చనీయాంశంగా మారింది.
బీజేపీ నేతలతో భేటీలు, రహస్య చర్చలు
కేంద్ర హోం శాఖ సహాయ మంత్రి కిషన్రెడ్డిని తాను కలిసింది నిజమేనని మాజీ మంత్రి, టీఆర్ఎస్ ఎమ్మెల్యే ఈటల రాజేందర్ అంగీకరించారు. ఒక్క కిషన్రెడ్డినే కాదని, బీజేపీ రాష్ట్ర శాఖ అధ్యక్షుడు బండి సంజయ్నీ కలిసినట్లు తెలిపారు. అయితే ఈ పరిమాణాలన్నీ ఈటలను నిశితంగా పరిశీలిస్తే బీజేపీవైపు అడుగులు వేస్తారనే ప్రచారం జరుగుతోంది. ఎమ్మెల్యే పదవికి రాజీనామా చేయటం వల్ల హుజూరాబాద్ అసెంబ్లీ స్థానానికి వచ్చే ఉప ఎన్నికల్లో స్వతంత్ర అభ్యర్థిగా పోటీ చేస్తే, మద్దతు ఇవ్వాలని అడిగినట్టు ప్రచారం జరుగుతున్న.. అంతర్గతంగా మాత్రం ఈటల బీజేపీ చేరుతారనే వార్తలు వినపడుతున్నాయి. ఈటల బీజేపీలో చేరడమే ఖాయమని ఆ పార్టీ నేతలే చెప్తుండటం.. దాదాపు ఈటల చేరిక ఖాయమేనని తెలుస్తోంది. పార్టీ బీజేపీ అధిష్టానం గ్రీన్ సిగ్నల్ ఇస్తే కనుక ఎమ్మెల్యే పదవికి రాజీనామా చేసి, బీజేపీ తరుపున రంగంలోకి దిగుతారనే వార్తలు కూడా జోరుగా వినిపిస్తున్నాయి. అయితే ఈటల రాజేందర్ మాత్రం తన అనుచరులతో చర్చించిన తర్వాతే నిర్ణయం తీసుకుంటానని చెప్తుండటం విశేషం.
కేసీఆర్ ను ఢీకొట్టేందుకే…
ఈటల రాజేందర్ భూ కబ్జా ఆరోపణలు ఎదుర్కొంటుండటం.. తాజాగా ఆయన కుమారుడిపైనే ఆరోపణలు కూడా వస్తుండటంతో ఆయన బలమైన నాయకత్వం ఉంటేనే సాధ్యమని భావిస్తున్నాడు. హుజూరాబాద్ నేతలు టీఆర్ఎస్ లోనే ఉండేలా కేసీఆర్ పావులు కదుపుతున్నారు. ట్రబుల్ షూటర్ హరీశ్ రావును రంగంలోకి దించి.. ప్రధాన వర్గీయులను ఈటలకు దూరం చేయాలనే ప్రయత్నాలు సాగుతున్నాయి. దీనికి తోడు అక్రమ కేసులు కూడా ఈటలకు తలనొప్పులుగా మారాయి. ఈవన్నీ తట్టుకోవాలంటే కేంద్రంలో బీజేపీ సపోర్ట్ అవసరమని భావిస్తున్నారు ఈటల. ఈ మేరకు ఆయన బీజేపీ నేతలతో వరుస భేటీలు జరుపుతుండటం ఆసక్తిగా మారింది. బీజేపీలో చేరిక దాదాపుగా ఖాయమైనట్టు తెలుస్తోంది. ఒకవేళ ఈటల బీజేపీలో చేరితే కొండా విశ్వేశ్వర్ రెడ్డి, కొదండారామ్ లు కూడా ఈటలతో కలిసివస్తారనే వార్తలు కూడా జోరుగా వినిపిస్తున్నాయి.
Must Read ;- కేసీఆర్ భయపడేది బీజేపీకే.. అందుకే ఈటల అడుగులు అటు