పవర్ స్టార్ పవన్ కళ్యాణ్ కమ్ బ్యాక్ మూవీ ‘వకీల్ సాబ్’ అన్న సంగతి తెలిసిందే. బాలీవుడ్ సూపర్ హిట్ మూవీ ‘పింక్’ కు రీమేక్ గా తెరకెక్కిన ఈ సినిమా అతి త్వరలోనే విడుదలకు సిద్ధమవుతోంది. సినిమా ప్రచారంలో భాగంగా ‘వకీల్ సాబ్’ టీజర్ ను సంక్రాంతి కానుకగా విడుదల చేశారు మేకర్స్. పవర్ స్టార్ మూడేళ్ళ తర్వాత తెరమీద కనిపించబోతున్న సినిమా కావడంతో .. ఈ టీజర్ కి రికార్డు స్థాయిలో అభిమానుల నుంచి స్పందన లభించింది. గంటల వ్యవధిలోనే అత్యధిక వ్యూస్ తో మోతెక్కించింది. అయితే ఇందులోని పవన్ కళ్యాణ్ మేకోవర్ , గెటప్ విషయంలో అభిమానులు ఫుల్ ఖుషీ అవుతున్నప్పటికీ.. టీజర్ మీద కొన్ని అభ్యంతరాలు, విమర్శలు వ్యక్తం అవుతున్నాయి.
బాలీవుడ్ చిత్రం ‘పింక్’ మహిళా ప్రధాన్యం కలిగిన కోర్డ్ డ్రామా. లైంగిక వేధింపుల నేపథ్యంలో ముగ్గురు అమ్మాయిలు ప్రధాన పాత్ర పోషించిన సినిమా. ఇందులో డిఫెన్స్ లాయర్ గా నటించిన అమితాబ్ బచ్చన్ అందులో గెస్ట్ లాంటి పాత్ర పోషించారు. అయితే ఇదే సినిమాను అజిత్ తో ‘నేర్కొండ పార్వై’ గా తమిళంలో రీమేక్ చేసినప్పుడు .. అతడి ఇమేజ్ కు అనుగుణంగా కొన్ని సన్నివేశాల్ని అదనంగా చేర్చి.. ఫ్లాష్ బ్యాక్ కూడా యాడ్ చేశారు. సినిమా సూపర్ హిట్టవ్వడంతో తెలుగు వెర్షన్ దర్శకుడు వేణు శ్రీరామ్ వకీల్ సాబ్ కోసం అదే పాట్రన్ ఫాలో అవుతూ.. పవన్ కళ్యాణ్ బాగా ఎలివేట్ అయ్యే పలు సీన్స్ ను రాసుకున్నాడు.
దాంతో ఈ సినిమాను ప్రారంభించినప్పటి నుంచి పవన్ కళ్యాణ్ పాత్ర తప్ప.. వేరే ఇతర పాత్రల్ని అసలు రివీల్ చేయలేదు దర్శకుడు. టీజర్ లో కూడా అదే జరగడంతో.. పింక్ సినిమాతో పోల్చుతూ.. మహిళా ప్రాధాన్యం కలిగిన సినిమా టీజర్ లో అసలు… వారిని చూపించకపోవడం ఏంటని ప్రశ్నిస్తున్నారు కొందరు ఫెమినిస్టులు. ఇందులో నటించిన ముగ్గురు అమ్మాయిల పాత్రలు సినిమాకే మూలం కాబట్టి.. వారిని రివీల్ చేయకుండా.. టీజర్ ఏంటని అంటున్నారు. అయితే ఒక రీమేక్ మూవీని ఏ రీతిలోనైనా తెరకెక్కించి.. ఏ తరహాలోనైనా మార్చుకొని ప్రచారం చేసుకొనే హక్కు దర్శకుడికి ఉంది. ఇందులో ఇతరులు అభ్యంతరాలు వ్యక్తం చేయడమేంటని పవర్ స్టార్ అభిమానులు తమ వెర్షన్ వినిపిస్తున్నారు. ఏది ఏమైనప్పటికీ ‘వకీల్ సాబ్’ తో పవర్ స్టార్ కమ్ బ్యాక్ అదిరిపోయిందని ఫ్యాన్స్ చర్చించుకుంటున్నారు.
Must Read ;- టీజర్ టాక్ : పవన్ కళ్యాణ్ ‘వకీల్ సాబ్’ అదుర్స్
