డిజిటల్ ప్లాట్ ఫామ్స్ లో సస్పెన్స్ థ్రిల్లర్ చిత్రాలకు మంచి ఆదరణం ఉంది. అలాంటి జోనర్ లో తెరకెక్కిన చిత్రమే ‘గతం’. మెమరీ లాస్ కథాంశంతో తెరకెక్కిన ఈ చిత్రం నవంబరు 6ను అమెజాన్ ప్రైమ్ లో స్ట్రీమింగ్ అవుతోంది. ఈ సినిమా ఎలా ఉందో చూద్దాం.
కథలోకి వెళితే..
గతాన్ని మరచిపోయిన వ్యక్త కథ ఇది. కథ ప్రారంభమే సస్పెన్స్ తో మొదలవుతుంది. ఓ వ్యక్తిని, మరో యువతిని ఎవరో కాల్చి చంపడం, అక్కడి నుంచి సీన్ ఆస్పత్రిలోకి మారడంతో ఉత్సుకత రేకెత్తుతుంది. అమెరికా లోని ఓ ఆస్పత్రిలో రిషి (రాకేష్) అనే యువకుడు తన గతాన్ని మర్చిపోతాడు. అతనికి స్పృహ వచ్చాక డాక్టర్ చెబుతాడు. అదితి అనే యువతి అతనికి గర్ల్ ఫ్రెండ్ అని, అంతకుమించి అతని గురించి వివరాలు ఏమీ తెలియవని డాక్టర్లు చెబుతారు. తన గురించి తెలుసుకోవాలని ఉందని, అందుకు అదితి (పూజిత)ని సహకరించాల్సిందిగా అతను కోరతాడు.
వారిద్దరూ కారులో వెళుతుండగా ఓ చోట కారు ఆగిపోతుంది. ఆ సమయంలో ఓ అపరిచిత వ్యక్తి వారిని కలిసి తన ఇల్లు సమీపంలోనే ఉందని, ఆ రాత్రికి తన ఇంట్లో ఉండోచ్చని ఆహ్వానిస్తాడు. అతను తమను టార్గెట్ చేసి హింసిస్తున్నాడని రిషి గ్రహిస్తాడు. అక్కడి నుంచి వారు తప్పించుకోవాలనుకుంటారు. ఆ అపరిచిత వ్యక్తి ఎవరు? ఎందుకు రిషిని టార్గెట్ గా చేసుకున్నాడు అన్నదే అసలు కథ. ఈ సినిమాలో హీరో అంటూ ఎవరూ ఉండరు. కథనే హీరోగా భావించుకుని చూడాల్సి ఉంటుంది.
ఎలా తీశారు? ఎలా చేశారు?
దర్శకత్వ ప్రతిభ, సినిమాటోగ్రఫీ ఈ సినిమాకి ప్రధాన ఆకర్షణ. సినిమా ప్రారంభంలోనే కెమెరా పనితనం కనిపిస్తుంది. రిషిగా రాకేష్, అపరిచిత వ్యక్తిగా భార్గవ పోలుదాసు, అదితిగా పూజిత కురపర్తి చక్కగా నటించారు. పాత్రల పోషణలో ఎక్కడా అతి చేయలేదు. సస్పెన్స్ ను కొనసాగించడంలో దర్శకుడు కిరణ్ కొండమడుగుల ప్రతిభ కనిపిస్తుంది. ప్రధానంగా నేపథ్య సంగీతం ఆకట్టుకుంటుంది. ఈ తరహా చిత్రాలకు నేపథ్య సంగీతమే ప్రాణం పోస్తుంది. శ్రీచరణ్ పాకల ఈ సినిమాకి ప్రాణం పోశాడు.
ఈ కథ ఎక్కడ ముగుస్తుందో చెప్పేస్తే థ్రిల్ పోతుంది. అందుకే కథ జోలికి పోకుండా కథనంతో సరిపెట్టేద్దాం. అందరూ కొత్త వారే కావడం కూడా ఈ సినిమాకు ప్లస్ అయ్యిందని చెప్పవచ్చు. హీరో, విలన్ ల శాడిస్టిక్ అప్రోచ్ కొంత జుగుప్సాకరంగా అనిపిస్తుంది. ఈ కథ మీద, కథనం మీద కొంత ఇంగ్లీషు సినిమా ప్రభావం మాత్రం కనిపిస్తుంది. ఈ తరహా సినిమా ఇంతకుముందు ఎప్పుడో చూశామన్న అనుభూతి కూడా కలుగుతుంది. లాజిక్ తో నిమిత్తం లేకుండా సినిమా చూస్తే ఎలాంటి ఇబ్బందీ ఉండదు.
సినిమాని ఎక్కడ ప్రారంభించాడో అక్కడే ముగించడం ఈ సినిమాలోని మరో విశేషం. మొదటి హత్యకు గురైంది ఎవరు? దాని వెనుక ఉన్న కథ ఏమిటన్నదే ఇందులో కీలకం. దర్శకుడు ఇంకాస్త శ్రద్ధ పెట్టి ఉంటే సినిమా ఇంకాస్త బాగుండేదేమో. అందరూ కొత్త వారితో సినిమా చూడటం కూడా కొంత ఇబ్బంది కరమే. తెలుగు సినిమా చూస్తున్నామన్న భావన కలగదు. సైకలాజికల్ థ్రిల్లర్ గా ఈ సినిమా తెరకెక్కింది.
నటీనటులు : రాకేష్ గలేభే, పూజిత కురపర్తి, భార్గవ పోలుదాసు
దర్శకత్వం : కిరణ్ కొండమడుగుల
నిర్మాత : ఎస్ ఒరిజినల్స్, ఆఫ్ బీట్ ఫిల్మ్స్
సంగీతం : శ్రీచరణ్ పాకల
సినిమాటోగ్రఫీ : మనోజ్ రెడ్డి
విడుదల : అమెజాన్ ప్రైమ్
ఒక్క మాటలో: సైకలాజికల్ థ్రిల్లర్
రేటింగ్ : 2.5/5
– హేమసుందర్ పామర్తి
