ఇదిగో త్రిష పెళ్లి.. అదిగో త్రిష పెళ్లి.. అంటూ ఇప్పటికే ఎన్నో సార్లు వార్తలు వచ్చాయి. త్రిష పెళ్లి మాత్రం జరగలేదు. మళ్లీ తాజాగా త్రిష పెళ్లి వార్త తెరపైకి వచ్చింది. 40 ఏళ్లకు చేరువైన త్రిష త్వరలోనే పెళ్లి పీటలు ఎక్కబోతోందట. తెలుగు, తమిళం, మలయాళంలో దాదాపు పెద్ద హీరోలందరితోనూ త్రిష నటించింది. మొదట్లో శింబుతో ప్రేమాయణం సాగించి అతడ్ని పెళ్లి చేసుకోబోతున్నట్లు వార్తలొచ్చాయి.
ఆ తర్వాత రానాతో ప్రేమాయణం అంటూ వార్తలొచ్చాయి. రానా పెళ్లి కూడా జరిగిపోయింది. వరుణ్ మణియన్ అనే వ్యాపార వేత్త వైపు ఆమె ప్రేమాయణం మళ్లింది. అతనితో నిశ్చితార్థం కూడా జరిగింది. తీరా పెళ్లి వరకూ వచ్చేసరికి అది ఆగిపోయింది. అలానే మరో వ్యాపార వేత్తతో చెట్టపట్టాలేసుకు తిరుగుతోందని, అతన్నే పెళ్లి చేసుకోబోతోందని వార్తలు వైరల్ అయ్యాయి. ఈ వార్తల్లో నిజానిజాల మాటెలా ఉన్నా జనం మాత్రం ఇలాంటి వార్తల్ని ఎంజాయ్ చేస్తూ వచ్చారు. తాజాగా ఓ తమిళ దర్శకుడితో ఆమె ప్రేమాయణం సాగిస్తోందని, అతన్నే పెళ్లి చేసుకోబోతోందని వార్త వైరల్ అవుతోంది. అతని పేరు మాత్రం బయటకు రాలేదు.
తమిళంలో అతను సూపర్ హిట్ చిత్రాలు చేశాడని మాత్రం అంటున్నారు. సూపర్ హిట్ అనగానే 96 సినిమా గుర్తొస్తుంది. కానీ ఆ ప్రేమ్ కుమార్ వయసులో ఆమె కన్నా చిన్న. ‘పెట్టా’ దర్శకుడు కార్తీక్ సుబ్బరాజు వైపు కూడా దృష్టి మళ్లింది. ఇలా ఆమె ఇటీవల సినిమాలు చేసిన దర్శకులు ఎవరెవరు ఉన్నారు అని నెటిజన్లు వెతికే పనిలో ఉన్నారు. అతను ఉంటారన్న శోధన సాగుతోంది. ఆమె నటిగా సినిమా పరిశ్రమకు వచ్చి 20 ఏళ్లు అవుతోంది.
ప్రస్తుతం వయసురీత్యా కావచ్చు ఆమెకు అవకాశాలు తక్కువగానే వస్తున్నాయి. మణిరత్నం దర్శకత్వంలో పొన్నియన్ సెల్వంలో నటిస్తోంది. త్రిష ప్రేమను రెండు కుటుంబాల వారూ అంగీకరించారని, త్వరలోనే ఆ డైరెక్టర్ తో ఆమె పెళ్లిపీటలు ఎక్కబోతోందని తెలుస్తోంది. ఆమె నటించిన ఓ సినిమాకి అతను దర్శకత్వం వహించాడట. త్రిష నటించిన మరో మూడు సినిమాల షూటింగ్ పూర్తయి విడుదలకు సిద్ధంగా ఉన్నాయి.