ఏపీ హైకోర్టులో హెబియస్ కార్పస్ పిటీషన్ పై జరిగిన విచారణలో న్యాయమూర్తి రాకేష్ కుమార్ తీవ్ర భావోద్వేగానికి లోనయ్యారు. పోలీసుల తరపున న్యాయవాది ప్రతిసారీ వాయిదాలు కోరడం భావ్యం కాదని న్యాయమూర్తి రాకేష్ కుమార్ తెలిపారు. ఇలాగే మరలా కేసు వాయిదాలు కోరితే మాత్రం అంగీకరించలేమని న్యాయమూర్తి స్పష్టం చేశారు. ఈ కేసు ఇంత కాలం విన్న తరవాత కూడా సరైన తీర్పు ఇవ్వలేకపోతే, పదవీవిరమణ చేసిన తరవాత కూడా జీవితాంతం బాధపడాల్సి వస్తుందని న్యాయమూర్తి రాకేష్ కుమార్ భావోద్వేగానికి లోనయ్యారు.
అసలు ఈ రాష్ట్రంలో రాజ్యాంగ ప్రక్రియ ప్రకారం పరిస్థితులు ఉన్నాయా అని న్యాయవాదిని ప్రశ్నించారు. రాష్ట్రంలో రాజ్యాంగానికి లోబడి పరిస్థితులు ఉన్నాయో లేవో అనే అంశంపై వాదనలు వినిపించాలని న్యాయమూర్తి రాకేష్ కుమార్ పోలీసుల తరపు న్యాయవాదిని ఆదేశించడం చర్చనీయాంశంగా మారింది.
అసలు హెబియస్ కార్పస్ రిట్ అంటే ఏమిటి?
హెబియస్ అంటే HAVE అని కార్పస్ అంటే BODY అర్థం. అంటే హెబియస్ కార్పస్ ప్రకారం నిర్భందించిన వ్యక్తిని భౌతికంగా 24 గంటల్లో కోర్టు ముందు హాజరుపరచాలి. ఏదైనా కేసులో పోలీసులు అనుమానితులను అక్రమంగా నిర్భంధిస్తే హెబియస్ కార్పస్ రిట్ దాఖలు చేయవచ్చు. కోర్టు ఆదేశాల మేరకు ఆ వ్యక్తిని ఎక్కడ దాచినా 24 గంటల్లో కోర్టు ముందు హాజరు పరచాల్సి ఉంటుంది. కొన్ని కేసుల్లో పోలీసులు ఎఫ్ఐఆర్ నమోదు చేయకుండా, అనుమానితులను వివిధ పోలీస్ స్టేషన్లకు తిప్పుడూ వేధిస్తూ ఉంటారు. ఇలాంటి సమయంలో బాధితులు కోర్టును ఆశ్రయించి రాజ్యాంగం వ్యక్తుల స్వేచ్ఛకు రక్షణ కల్పించిన హెబియస్ కార్పస్ రిట్ దాఖలు చేయవచ్చు. తద్వారా సత్వర న్యాయం పొందవచ్చు.
Must Read ;- న్యాయ వ్యవస్థే లేకుంటే…!
