ఐపీఎల్‌లో భాగ్యనగరానికి ఆతిథ్యం దక్కకపోవడంపై పెద్ద దుమారమే రేగుతోంది. హైదరాబాద్ క్రికెట్ సంఘం(హెచ్ సీఏ)లో మంటలు రేపుతోంది. బీసీసీఐ మాజీ అధ్యక్షుడు, హెచ్ సీఏ మాజీ కార్యదర్శి శివలాల్ కామెంట్స్ పెద్ద దుమారమే రేపాయి. ప్రస్తుత హెచ్‌సీఏ అధ్యక్షుడు అజహరుద్దీన్‌పై హాట్ కామెంట్స్ చేశారు. దీనిపై అజహర్ సైతం ఆగ్రహం వ్యక్తం చేశారు. శివలాల్‌పై మీడియా ముఖంగా ప్రశ్నల వర్షం కురిపించారు.
అజహర్ తప్పుకో.. శివలాల్
హైదరాబాద్ ఉప్పల్ స్టేడియానికి మ్యాచులు కేటాయించకపోవడంపై శివలాల్ అసహనం వ్యక్తం చేశారు. హెచ్ సీఏకు ఇది సిగ్గుచేటని, హెచ్ సీఏ అధ్యక్షుడు అజహర్ కు అంత సమయం లేకపోతే తక్షణమే తప్పుకోవాలని సూచించాడు. సన్ రైజర్స్ హైదరాబాద్ టీం ఉన్నప్పటికీ ఉప్పల్‌లో ఐపీఎల్ లేకపోవడం బాధాకరమన్నాడు. క్రికెట్ కోసం టైం వెచ్చించే పరిస్థితుల్లో అజహరుద్దీన్ లేరని శివలాల్ వ్యాఖ్యానించాడు. శివలాల్ వ్యాఖ్యలు పెద్ద దమారాన్నే రేపాయి.
అవినీతిపై విచారణకు సిద్ధమా.. అజహర్
శివలాల్ వ్యాఖ్యలపై అజహర్ మండిపడ్డాడు. హైదరాబాద్ క్రికెట్ సంఘానికి 24 ఏళ్లపాటు వివిధ హోదాల్లో పనిచేసిన శివలాల్ క్రికెట్ అభివృద్ధికి ఏమాత్రం పాటుపట్టాడడని ప్రశ్నించాడు. ఆయన హయాంలో జరిగిన అవినీతిపై విచారణకు సిద్ధమా అంటూ ప్రశ్నించాడు. హైదరాబాద్ క్రికెట్ అభివృద్ధికి శివలాల్ ఏం చేశాడో చెప్పాలని డిమాండ్ చేశాడు. ఏ రోజైనా నెట్స్‌లో పిల్లలకు శిక్షణ ఇచ్చాడా.. అని ప్రశ్నించాడు. అసలు శివలాల్ ఎంతమంది ఆటగాళ్లను తయారు చేశాడో చెప్పగలడా? శివలాల్ హయాంలో హెచ్‌సీఏకు రూ.200 కోట్లు వచ్చాయని, ఆ డబ్బంతా ఏం చేశాడో చెప్పాలని డిమాండ్ చేశాడు.
బీసీసీఐ కార్యదర్శి జై షాతో చర్చించా..
ఐపీఎల్ నిర్వహణ వేదికల్లో హైదరాబాద్ లేదని తెలియగానే వెంటనే స్పందించాం. అహ్మదాబాద్ వెళ్లి.. బీసీసీఐ కార్యదర్శి జై షాతో చర్చించాను. తప్పకుండా హైదారాబాద్ ఉండేలా చూస్తానని ఆయన హామీ కూడా ఇచ్చారు. బీసీసీఐని కోరడం వరకే మన బాధ్యత. అంతే తప్ప లాక్కుని రాలేం కదా? ఇప్పటికే కేటాయించిన మైదానాల్లో ఏమైనా లోపాలుంటే తప్పకుండా హైదరాబాద్‌కు అవకాశం దక్కుతుంది.
– అజహరుద్దీన్, హెచ్ సీఏ అధ్యక్షుడు
Also Read ;- అహ్మదాబాద్ ఎందుకు.. ఐపీఎల్ వేదికలపై ఫ్రాంచైజీల నిరసన గళం
