ప్రకాష్ రాజ్, మంచు విష్ణులతో పోటీకి సై అంటున్న జీవితా రాజశేఖర్

మూవీ ఆర్టిస్ట్ అసోసియేష‌న్ (మా) ఎన్నిక‌లు గత కొన్ని సంవత్సరాలుగా ఎంత రసవత్తరంగా జరుగుతున్నాయో తెలిసిందే. ఇవి సినిమా వాళ్ల ఎన్నికలా..? లేక రాజకీయ నాయకుల ఎన్నికలా..? అని జనాలు ఆశ్చర్యంతో ఆసక్తిగా చూసేలా ఎన్నికలు జరుగుతున్నాయి. మా ఎన్నికలకు సమయం సమీపిస్తుండడంతో అధ్యక్ష పదవికి ఎవరు పోటీ చేస్తారనుకుంటే.. ప్రకాష్ రాజ్ ముందుకు వచ్చారు. ఆయనతో పోటీకి మంచి విష్ణు రెడీ అవుతున్నారు. వీరిద్దరి మధ్య పోటీ తప్పదు ఎవరు గెలుస్తారో అనుకుంటుంటే.. ఇప్పుడు రంగంలోకి నేనున్నాను అంటూ జీవితా రాజశేఖర్ దిగుతుండడం విశేషం.

దీంతో ఇప్పటి వరకు జరిగిన ఎన్నికలకు.. అంతకు మించి.. అనేలా జరగనున్నాయి అనిపిస్తుంది. ప్ర‌స్తుతం మా కార్య‌ద‌ర్శిగా కొన‌సాగుతున్న జీవితా రాజ‌శేఖ‌ర్ ఈసారి మా అధ్యక్ష పదవికి పోటీ చేయాలని నిర్ణయం తీసుకుని షాక్ ఇచ్చారని చెప్పచ్చు. ఇప్పుడు ఇండస్ట్రీలో ఇది హాట్ టాపిక్ అయ్యింది. త్వ‌ర‌లోనే దీనికి సంబంధించిన అధికారిక ప్ర‌క‌ట‌న వెలువ‌డుతుంద‌ని స‌మాచారం. గత మా ఎన్నిక‌ల్లో న‌రేశ్ ప్యానెల్ నుంచి జీవిత‌, హీరో రాజ‌శేఖ‌ర్ యాక్టివ్‌గా పార్టిసిపేట్ చేశారు. అయితే.. ఎన్నిక‌ల్లో న‌రేశ్ ప్యాన్ విజ‌యం సాధించిన కొన్ని నెల‌ల‌కే న‌రేశ్‌తో జీవిత‌, రాజ‌శేఖ‌ర్ మ‌ధ్య విబేదాలు వ‌చ్చాయి.

నరేశ్ ఎవర్నీ సంప్రదించకుండా నిర్ణయాలు తీసుకుంటున్నారని.. ఎలాంటి సమాచారాన్ని కమిటీ సభ్యులకు ఇవ్వడం లేదని.. ఇలా కొన్ని విమర్శలు వచ్చాయి. దీంతో ఈ విబేదాలు తీవ్ర స్థాయికి చేరుకుని ఒక‌రి పై ఒక‌రు విమ‌ర్శ‌లు చేసుకున్నారు. వైస్ ప్రెసిడెంట్ అయిన రాజ‌శేఖ‌ర్ అయితే ఏకంగా మీడియా ముఖంగా న‌రేశ్‌పై విమ‌ర్శ‌లు చేశారు. ఈ వివాదం రోజురోజుకు ముదురుతుండడంతో అప్పుడు సినీ పెద్దలు చిరంజీవి, మోహన్ బాబు, కృష్ణంరాజు, జయసుధ రంగంలోకి దిగారు. ఈ పరిణామాలతో రాజశేఖర్ వైస్ ప్రెసిడెంట్ పదవికి రాజీనామా చేశారు. జీవిత మాత్రం మాత్రం కార్య‌ద‌ర్శిగా కొన‌సాగుతూ వ‌చ్చారు. ఈసారి మా ఎన్నిక‌ల్లో ప్ర‌కాష్‌ రాజ్‌, విష్ణు పోటీలో ఉన్నార‌ని తెలిసినా జీవిత పోటీ చేయాలనుకోవడం హాట్ టాపిక్ అయ్యింది. మరి.. ఈసారి ఎన్నికలు ఎలాంటి వివాదాలు సృష్టిస్తాయో చూడాలి.

Must Read ;- సీసీసీ ఆధ్వర్యంలో తెలుగు సినీ కార్మికులకు వాక్సినేషన్