హీరో ఒక అమ్మాయిని ప్రేమిస్తాడు .. ఆమె కూడా అతనిని ఆరాధిస్తుంది. ఇద్దరూ పెళ్లి చేసుకోవాలనుకుంటారు. కానీ ఆమె వివాహం మరో వ్యక్తితో జరుగుతుంది .. ఆ వ్యక్తి ఓ రౌడీ. టైగర్ ప్రభాకర్ అనే ఒక శ్రీమంతుడికి 400 ఎకరాల విస్తీర్ణం కలిగిన ఒక ఎస్టేట్ ఉంటుంది. ఆ ఎస్టేట్ ప్రభాకర్ అరాచకాలకు అడ్డాగా మారుతుంది. తప్పనిసరి పరిస్థితుల్లో ఆయన దగ్గర చాలామంది పనిచేస్తూ ఉంటారు. ఈ రౌడీ .. ప్రభాకర్ తో పాటు ఆయన కుటుంబ సభ్యులందరినీ అంతం చేసి, ఆ ఎస్టేట్ ను సొంతం చేసుకుంటాడు.
ఆ ఎస్టేట్ లోనే ఇప్పుడు భర్తతో కలిసి హీరోయిన్ ఉంటూ ఉంటుంది. డబ్బుకోసం తనని కాదని వెళ్లిపోయిన ఆమెను చంపాలనే ఆలోచనలో హీరో ఉంటాడు. బార్బర్ గా పనిచేస్తూ .. వచ్చిన డబ్బుతో మద్యం తాగుతూ కాలం గడుపుతూ ఉంటాడు. ఓ రోజున ఆ రౌడీకి హెయిర్ కట్ చేయడానికి హీరో ఆ ఎస్టేట్ కి వెళ్లవలసి వస్తుంది. దాంతో అక్కడికి వెళ్లి, తనని ప్రేమించి మోసం చేసిన ఆమెను చంపేసి రావాలనే పక్కా ప్లాన్ తో ఆ ఎస్టేట్ లోకి అడుగుపెడతాడు. అయితే అక్కడ ఆమె సుఖంగా లేదనే విషయం ఆయనకి అర్థమవుతుంది.
అప్పటికే ఆమె .. రౌడీ అయిన తన భర్త వేధింపులు భరించలేక అతణ్ణి చంపేసిందని తెలుసుకుని షాక్ అవుతాడు. ఆ బంగ్లా చుట్టూ ఆ రౌడీ అనుచరులు ఉంటారు. అయినా ఆమెను తీసుకుని హీరో అక్కడి నుంచి బయటపడతాడు. వాళ్లను ఆ రౌడీ అనుచరులు వేటాడటం మొదలుపెడతారు. తరువాత ఏం జరుగుతుంది? అనేదే కథ. నిజానికి ఆ తరువాత ఏమీ జరగదు. హీరో .. హీరోయిన్ ఎస్టేట్ నుంచి బయటపడటం వరకూ కథ ఓ మాదిరిగా అనిపిస్తుంది. ఆ తరువాత కథ ఒక దారి తెన్నూలేని ప్రయాణం చేస్తుంది.
ఒక్క విలన్ పాత్ర విషయంలోనే దర్శకుడికి క్లారిటీ ఉందనిపిస్తుంది. ఆ తరువాత ఏ పాత్రపై కూడా ఆయనకి పట్టు కనిపించదు. పాత్రల స్వరూప స్వభావాలు మారిపోతూ ఉంటాయి. సీరియస్ గా కథ నడవాల్సిన చోట కామెడీ చేయిస్తూ, ఎక్కడికక్కడ కథను తేల్చేస్తూ వెళ్లాడు. చివరికి క్లైమాక్స్ అయినా సరిగ్గా ప్లాన్ చేసుకున్నాడా అంటే అదీ లేదు. కథ బాగానే మొదలైనా చప్పున చల్లారిపోయి, చివరివరకూ ప్రేక్షకుల సహనానికి పరీక్ష పెడుతూనే ఉంటుంది. కత్తులతో పీకలు కోయడాలు .. తుపాకులతో నుదిటిపై కాల్చడాలు వంటి హడావిడే తప్ప, కాగడా పెట్టి వెతికినా కథ మాత్రం కనిపించదు.
Must Read ;- కళ్యాణ్ రామ్ చేస్తున్నది బెంగాలీ కథనా?
