కేటీఆర్ లీడ‌ర్!.. బాహుబ‌లి రేంజిలో పేలిందే!

తెలంగాణ రాష్ట్ర స‌మితి కార్య‌నిర్వాహ‌క అధ్య‌క్షుడు, తెలంగాణ మంత్రివర్గంంలో కీలక మంత్రిగా క‌ల్వ‌కుంట్ల తార‌క‌రామారావు (కేటీఆర్‌) 45వ జ‌న్మ‌దినాన్ని శ‌నివారం జ‌రుపుకుంటున్న సంగ‌తి తెలిసిందే. క‌రోనా నేప‌థ్యంలో ఆర్భాటాలు వ‌ద్దంటూ కేటీఆర్ స్వ‌యంగా పిలుపు ఇచ్చినా.. ఆయ‌న అభిమానులు ప్ర‌త్యేకించి టీఆర్ఎస్ శ్రేణులు మాత్రం కేటీఆర్ బ‌ర్త్ డేను ఓ రేంజిలో సెల‌బ్రేట్ చేసుకుంటున్నాయి. ఇప్ప‌టికే ల‌క్ష‌ల సంఖ్య‌లో సందేశాలు వ‌స్తే.. వాటిలో ప్ర‌ముఖులు పంపిన‌వి కూడా లెక్క‌లేన‌న్ని ఉన్నాయ‌ని తెలుస్తోంది.

తలసాని నిర్మాణ సారథ్యంలో..

టీడీపీతో రాజ‌కీయాలు మొద‌లెట్టి.. ఇటీవ‌లే టీఆర్ఎస్ లో చేరిన మంత్రి త‌ల‌సాని శ్రీనివాస్ యాద‌వ్ ఈ హంగామాను ఓ రేంజిలో చేస్తున్నారు. త‌ల‌సాని కుమారుడు సాయి కిర‌ణ్ అయితే ఏకంగా కేటీఆర్ లీడ‌ర్ టైటిల్ పేరిట ఏకంగా ఓ సినిమా రేంజి సాంగ్ ను రూపొందించారు. ప్ర‌భాస్ మూవీ బాహుబ‌లి రేంజిలో కేటీఆర్ లీడ‌ర్ సాంగ్ కూడా బాగానే పేలింద‌న్న టాక్ వినిపిస్తోంది. సినిమాటోగ్రఫీ మంత్రిగా ఉన్న తండ్రికి ఉన్న సినీ ప‌రిచ‌యాల‌ను వాడుకున్న సాయి కిర‌ణ్.. కేటీఆర్ ను పొగడ్తలతో ముంచెత్తుతూ భారీ బడ్జెట్ సాంగ్ రూపొందించారు.

ఆద్యంతం ఆసక్తికరంగా..

‘కేటీఆర్ లీడర్’ ట్రాక్‌తో సాగే ఈ పాటలో తెలంగాణ పథకాలను ప్రతిబింబించేలా తీర్చిదిద్దారు. ఒక నిరుద్యోగి ఇంటర్వ్యూలో ఫెయిలవడంతో మొదలయ్యే ఈ సాంగ్ యువత కోసం కేటీఆర్ ఉత్తేజకరమైన ప్రసంగం రేడియోలో వినబడటంతో ఆసక్తికరంగా షూట్ చేశారు. కేసీఆర్ మరియు కేటీఆర్ నాయకత్వంలో మంచి రోజులు వచ్చాయని… షాదీ ముబారక్ పథకం నుండి రైతు బంధు వరకు ఈ పాట అన్ని సంక్షేమ పథకాలకు మరియు టీఆర్ఎస్ ప్రభుత్వం చేసిన అభివృద్ధి పనులను ఈ పాట ప్ర‌స్తావించింది.

Must Read ;- రామోజీ గ్రీటింగ్స్!.. కేటీఆర్ కు మెమోర‌బుల్ గిఫ్టే!