ఏపీలో సంచలనంగా మారిన లిక్కర్ ట్రాన్స్‌పోర్ట్‌ స్కామ్‌ కేసు దర్యాప్తులో భాగంగా మాజీ మంత్రి అంబటి రాంబాబుకు ఎన్‌ఫోర్స్‌మెంట్ డైరెక్టరేట్ నోటీసులు జారీ చేసిన విషయం తెలిసిందే. లిక్కర్ స్కామ్‌పై ED విచారణకు పిలవగా.. తాను రోజూ 90 ML రాయల్ సెల్యూట్ తాగుతానని, లిక్కర్‌తో తనకు ఆ ఒక్క సంబంధం మాత్రమే ఉందంటూ అంబటి రాంబాబు ఇటీవల మాట్లాడారు. అయితే, అంబటి ఎంతగా బుకాయించే ప్రయత్నం చేసినా, దర్యాప్తు సంస్థల ముందు మాత్రం ఆయన బినామీల లీలలు ఒక్కొక్కటిగా బయటపడుతున్నాయి.
ఈ కేసులో అసలు విషయానికి వస్తే.. మర్రి సుబ్బారెడ్డి, పురుషోత్తం లాంటి వ్యక్తులకు మద్యం రవాణా కాంట్రాక్టులను ఇప్పించి, వారి నుంచి భారీగా కమిషన్లు వసూలు చేశారని అంబటిపై గట్టి అభియోగాలున్నాయి. ప్రభుత్వ డిపోల నుంచి దుకాణాలకు జరిగే రవాణా వ్యవహారంలో తెరవెనుక చక్రం తిప్పి భారీగా ఆర్థిక లాభాలు పొందారనే ఆరోపణలను ED పరిశీలిస్తోంది. ఇందుకు సంబంధించిన కీలకమైన సమాచారాన్ని సదరు కాంట్రాక్టర్లు సిట్ , ఈడీ అధికారులకు వివరిస్తూ పక్కా ఆధారాలు సమర్పించినట్లు సమాచారం.
మర్రి సుబ్బారెడ్డి, పురుషోత్తం తదితరులు దర్యాప్తు అధికారుల ఎదుట నగదు లావాదేవీల రికార్డులను, ఆర్థిక ఆధారాలను పూర్తిస్థాయిలో బయటపెట్టడంతోనే అంబటి రాంబాబుకు ED నుంచి నోటీసులు జారీ అయ్యాయి. బినామీల ద్వారా జరిగిన ఈ లావాదేవీలపై దర్యాప్తు సంస్థల దగ్గర పక్కా సమాచారం ఉండటంతో, అంబటి చుట్టూ ఉచ్చు బిగుసుకుంది. ఈ వ్యవహారంలో ఇప్పటికే కొందరు మాజీ మంత్రులు, వారి కుటుంబసభ్యులు అరెస్ట్ కావడంతో ఈ కేసు మరింత ప్రాధాన్యం సంతరించుకుంది.
మద్యం కుంభకోణంలో బినామీల వాంగ్మూలాలు, ఆర్థిక ఆధారాలు స్పష్టంగా వెలుగులోకి రావడంతో అంబటి రాంబాబు ఎంతగా బుకాయించినప్పటికీ చట్టపరమైన చర్యల నుంచి తప్పించుకోవడం కష్టమనే అభిప్రాయం వ్యక్తమవుతోంది. దర్యాప్తు సంస్థల విచారణ ముమ్మరం కావడంతో రానున్న రోజుల్లో ఈ కేసులో మరిన్ని సంచలన విషయాలు బయటపడే అవకాశం ఉందని విశ్లేషకులు భావిస్తున్నారు
