కోవిడ్ గోల లేకపోతే.. ఈ పాటికి మెగాస్టార్ చిరంజీవి ‘ఆచార్య’ థియేటర్స్ లో సందడి చేసేది. అభిమానులు రికార్డుల అనాలిసిస్ లో బిజీగా ఉండేవారు. కానీ అలా జరగకపోవడంతో నిరాశతప్పలేదు. మరో ఫ్రెష్ డేట్ లో సినిమాను విడుదల చేసే ఉద్దేశంలో ఉన్నారు మేకర్స్. దీంతో పాటు .. చిరు తన తదుపరి చిత్రం ‘లూసిఫర్’ రీమేక్ షూటింగ్ ను ప్రారంభించాలి. దానికి కూడా కోవిడ్ కారణంగానే జాప్యం తప్పేట్టులేదు.
తమిళ దర్శకుడు మోహన్ రాజా దర్శకత్వంలో లూసిఫర్ రీమేక్ అతి త్వరలో సెట్స్ మీదకు వెళ్ళబోతోంది. మలయాళంలో మోహన్ లాల్ అనితర సాధ్యంగా నటించి మెప్పించిన పొలిటికల్ కింగ్ మేకర్ పాత్రకు .. చిరు ఇమేజ్ కు అనుగుణంగా కొన్ని మార్పులు చేర్పులు చేసి.. చిరంజీవి నుంచి గ్రీన్ సిగ్నల్ అందుకున్నాడు దర్శకుడు. ఇప్పటికే చిరుతో కథాంశం గురించి పలుమార్లు డిస్కస్ చేశాడట కూడా.
నిజానికి ఈ సినిమా గురించి నిన్న మొన్నటి వరకూ కొన్ని రూమర్స్ స్ర్పెడ్ అయ్యాయి. అవేంటంటే.. ఈ సినిమా స్ర్కిప్ట్ చిరంజీవికి నచ్చలేదని, ఆయన చెప్పిన మార్పులకు అనుగుణంగా మోహన్ రాజా మార్చలేకపోయాడని.. అందుకే వేరే దర్శకుడి వేటలో చిరు ఉన్నారని .. ఇలా రకరకాల వార్తలు వినిపించాయి. అయితే ఆ వార్తల్లో ఎంత మాత్రం వాస్తవం లేదని, లూసిఫర్ తెలుగు వెర్షన్ స్ర్కిప్ట్ అద్భుతంగా వచ్చిందని ఫిల్మ్ నగర్ సమాచారం. సత్యదేవ్ ఒక ముఖ్యమైన పాత్రను పోషిస్తుండగా.. చిరు సోదరిగా సుహాసిని నటిస్తోందని టాక్. సో.. లూసిఫర్ రీమేక్ మీద వచ్చిన రూమర్స్ అన్నీ ఒట్టి హంబక్కే అన్నమాట.
