కెరీర్ లో మహేష్ ఎప్పుడూ ఒకేసారి రెండు సినిమాలు చేయలేదు. చేస్తానని చెబుతాడు. కానీ చేయడు.
ఏడాదికి 2 రిలీజ్ అయ్యేలా ప్రయత్నిస్తానంటాడు. కానీ అలా జరగదు. ఎప్పుడూ ఒక సినిమా పూర్తయిన తర్వాతే మరో సినిమా స్టార్ట్ చేస్తాడు. మధ్యలో గ్యాప్ తీసుకుంటాడు. ఫ్యామిలీతో వెకేషన్ కు వెళ్తాడు. యాడ్ షూటింగ్స్ పూర్తిచేస్తాడు. దాదాపు పదేళ్లుగా మహేష్ కెరీర్ ఇలానే సాగింది. కానీ ఈసారి ఇలా ఓ పద్ధతి ప్రకారం మహేష్ కెరీర్ సాగే పరిస్థితులు కనిపించడం లేదు.
కరోనా వచ్చి మహేష్ ప్లాన్స్ అన్నీ మార్చేసింది. ఇప్పుడు తప్పనిసరిగా ఒకేసారి 2 సినిమాలు చేయాల్సిన పరిస్థితి వచ్చింది. ఏ సినిమాను పక్కనపెట్టే పరిస్థితి లేదు. ఉదాహరణకు సర్కారువారి పాట సినిమానే తీసుకుంటే, ఈ సినిమా ఆల్రెడీ సెట్స్ పైకి వచ్చింది. 2 షెడ్యూల్స్ కూడా పూర్తయ్యాయి. కాబట్టి దీన్ని కొనసాగించాల్సిందే. అలా అని కేవలం ఈ సినిమాపైనే కూర్చుంటే, త్రివిక్రమ్ సినిమా మరింత ఆలస్యమైపోతుంది.
ఇప్పటికే చాన్నాళ్లుగా వెయిటింగ్ మోడ్ లో ఉన్నాడు త్రివిక్రమ్. కేవలం మహేష్ తో సినిమా చేసేందుకే చిన్న చిన్న కమిట్ మెంట్స్ కూడా పక్కనపెట్టేశాడు. ఇలాంటి టైమ్ లో మహేష్ ఇంకాస్త లేట్ చేస్తే, త్రివిక్రమ్ కచ్చితంగా హర్ట్ అవుతాడు. అంతేకాదు, వేరే సినిమాకు షిఫ్ట్ అయినా ఆశ్చర్యపోనక్కర్లేదు. అప్పుడెప్పుడో వచ్చిన అల వైకుంఠపురములో సినిమా తర్వాత త్రివిక్రమ్ నుంచి మళ్లీ మూవీ రాలేదు.
ఇవన్నీ దృష్టిలో పెట్టుకొని, ఈసారి 2 సినిమాల్ని ఒకేసారి పూర్తిచేయాలని ఫిక్స్ అయ్యాడట మహేష్. ఇందులో భాగంగా ముందుగా సర్కారువారి పాట సినిమాను స్టార్ట్ చేయబోతున్నాడు. ఈ మూవీ కొత్త షెడ్యూల్ త్వరలోనే పారిస్ లో స్టార్ట్ అవుతుంది. యూనిట్ లో అందరికీ వ్యాక్సిన్లు ఇప్పించే పనిలో బిజీగా ఉన్నారు. ఆ ప్రక్రియ ముగిసిన వెంటనే పారిస్ షెడ్యూల్ స్టార్ట్ అవుతుంది.
పారిస్ షెడ్యూల్ ముగిసిన తర్వాత త్రివిక్రమ్ సినిమాను స్టార్ట్ చేయబోతున్నాడు మహేష్. ఆ సినిమాకు కనీసం 3 వారాలు వర్క్ చేసిన తర్వాత తిరిగి సర్కారువారి పాట సినిమాపైకి రాబోతున్నాడు. ఇలా రెండు సినిమాల్ని సైమల్టేనియస్ గా పూర్తిచేయాలనుకుంటున్నాడు మహేష్. కెరీర్ లో ఇలా చేయడం మహేష్ కు ఇదే తొలిసారి. ఇలా మహేష్ తప్పనిసరి పరిస్థితుల మధ్య తన పద్ధతులు మార్చుకోవాల్సి వస్తోంది. మరి సూపర్ స్టార్ ఎలాంటి నిర్ణయం తీసుకుంటాడో చూడాలి.
ఒకవేళ మహేష్ కనుక ఇలానే చేస్తే, అతడి నుంచి ఈసారి 2 సినిమాలు రావడం గ్యారెంటీ. సర్కారువారి పాట సినిమాను ఆల్రెడీ వచ్చే ఏడాది సంక్రాంతికి షెడ్యూల్ చేశారు. అది వచ్చేస్తుంది. ఇక త్రివిక్రమ్ సినిమా కూడా అదే ఏడాది ఏదో ఒక టైమ్ లో థియేటర్లలోకి రావడం పక్కా. ఒకటి ఇయర్ స్టార్టింగ్ లో వస్తుంది కాబట్టి, ఇంకోటి ఏడాది చివర్లో వచ్చే అవకాశం ఉంది.
