నారా లోకేష్..మరోసారి తన మంచి మనసు చాటుకున్నారు. కార్యకర్తలకు నేనున్నానంటూ భరోసా కల్పిస్తున్నారు. కూటమి ప్రభుత్వం అధికారంలోకి వచ్చిన నాటి నుంచి కార్యకర్తలకు ఏ చిన్న అవసరం పడినా స్వయంగా తానే స్పందిస్తున్నారు. సాయం చేస్తున్నారు. పార్టీ కోసం ప్రాణాలర్పించిన కార్యకర్తల కుటుంబాలకు పెద్ద దిక్కుగా నిలిచి ఆత్మస్థైర్యం నింపుతున్నారు.
తాజాగా పల్నాడు జిల్లా రొంపిచర్ల మండల టీడీపీ అధ్యక్షుడు, మాజీ ఎంపీపీ వెన్నా బాలకోటిరెడ్డి కుటుంబ సభ్యులను ఉండవల్లి నివాసానికి పిలిపించుకుని వారితో భేటీ అయ్యారు లోకేష్. బాలకోటిరెడ్డి గతంలో వైసీపీ గూండాల చేతిలో హత్యకు గురయ్యారు. ఈ సందర్భంగా పార్టీకి బాలకోటిరెడ్డి చేసిన సేవలను గుర్తు చేసుకున్నారు లోకేష్. వెన్నా బాలకోటిరెడ్డి సతీమణి వెన్నా నాగేంద్రమ్మ, బాలకోటిరెడ్డి సోదరుని కుమారులు వెన్నా నరసింహారెడ్డి, వెన్నా రామకృష్ణారెడ్డిలతో లోకేష్ మాట్లాడారు. నేనున్నానంటూ వారికి ధైర్యం కల్పించారు.
బాలకోటిరెడ్డి హత్యకు సంబంధించి విషయాలు, నాగేంద్రమ్మ ఆరోగ్యంపై అడిగి తెలుసుకున్నారు. హత్య కేసు నిందితులు స్వేచ్ఛగా సంచరిస్తున్నారని, కేసును పూర్తిస్థాయిలో విచారణ జరిపి నిందితులను కఠినంగా శిక్షించేలా చర్యలు తీసుకోవాలని ఈ సందర్భంగా బాలకోటిరెడ్డి కుటుంబ సభ్యులు లోకేష్కు విజ్ఞప్తి చేశారు. ఆర్థికంగా చాలా నష్టపోయామని, ఉపాధి హామీ, గృహనిర్మాణం బిల్లులు పెండింగ్లో ఉండటంతో పాటు తాము నివసిస్తున్న ఇల్లు తాకట్టులో ఉందని మంత్రి దృష్టికి తీసుకువచ్చారు. బాలకోటిరెడ్డి కుటుంబానికి జీవితాంతం అండగా ఉంటానని భరోసా ఇచ్చారు లోకేష్. కార్యకర్తలకు లోకేష్, పార్టీ ప్రాధాన్యత ఇస్తుండడంతో శ్రేణుల్లో హర్షం వ్యక్తమవుతోంది.
గతంలో వైసీపీ నేతల చేతిలో హత్యకు గురైన మరో టీడీపీ కార్యకర్త తోట చంద్రయ్య కుటుంబానికి సైతం ప్రభుత్వం అండగా నిలిచింది. చంద్రయ్య కుమారుడు వీరాంజనేయులుకు శాశ్వత ఉద్యోగం కల్పించాలని నిర్ణయం తీసుకుంది. తోట చంద్రయ్య పల్నాడు జిల్లా వెల్దుర్తి మండలం గుండ్లపాడుకు చెందిన టీడీపీ కార్యకర్త. గత ప్రభుత్వ హయాంలో వెల్దుర్తి మండలం ఎంపీపీగా ఉన్న చింతా శివరామయ్య, అతని కుమారుడు ఆదినారాయణలు 2022 జనవరి 13న చంద్రయ్యను దారుణంగా నడిరోడ్డుపై హత్య చేశారు. చంద్రయ్య బైక్పై వెళ్తుండగా అడ్డగించి నడిరోడ్డుపై కత్తులతో దాడి చేశారు. గొంతు కోసి చంపారు. చంపే ముందు జై జగన్ అనాలని డిమాండ్ చేశారు. ఐనా చంద్రయ్య వినిపించుకోలేదు. జై టీడీపీ అంటూ ప్రాణాలు కోల్పోయారు.
