‘మిడిల్ క్లాస్ మెలోడీస్’ గురించి ఈ రచయిత స్పందన చూడండి.. సినిమా చూడాలో వద్దో మీకే తెలుస్తుంది. దీన్ని ఆయన మాటల్లోనే ఆస్వాదించండి..
సినిమా తరువాత సినిమా.. చూస్తూ చూస్తూ తెలుగు సినిమా అంటేనే విరక్తీ, వైరాగ్యం వచ్చి చచ్చాయి నాకు. బొకడా సినిమాలూ, బోకు కథలూ, కుప్పిగంతులూ, పిచ్చికూతలూ, మరీ కాకపోతే కొన్ని కాపీ సీన్లకు ప్రాస డైలాగుల్ని వరుసలు పేర్చి, ఆ చెత్తంతా తెలుగు ప్రేక్షకుల నెత్తిన రుద్దుతున్నారని తిక్కదొబ్బుతోంది నాకు. తెలుగు సినిమాని ఎదగనివ్వకుండా తమ దొడ్లలో గొడ్డుని కట్టేసినట్లు కట్టేసుక్కూచున్న కాంపౌండు హీరోల మీద అసలే మంట మీదుంటే, మిడిల్ క్లాస్ మెలోడీస్ అనే సినిమా అమెజాన్ ప్రైమ్ లో వచ్చిందని తెలిసింది.
విజయ్ దేవరకొండ తమ్ముడు ఆనంద్ దేవరకొండ హీరో అనేసరికి ఒళ్లు మరింత మండుకొచ్చింది. వీడొక కొత్త కాంపౌండు హీరోగాడు తయారయ్యాడన్న మాట అనుకుంటూ, ట్రైలర్ కూడా సగంలో ఆపేసుక్కూచున్నాను.
సినిమా ప్రిజమ్ నిండా నెపోటిజమ్ తప్ప మరేమీ లేదన్న నైరాశ్యం ఆవహించి, అసలు సినిమాలు చూడనవసరం లేదని, దండగని అనుకున్నా, ఇప్పుడు ఓటీటీ ని కూడా ఈ నెపోటిజమ్ గాళ్లు వదిలి పెట్టడం లేదని తెలిసే సరికి కోపం నషాళానికంటింది. కానీ, ఇంట్లో తప్పలేదు. పిల్లలకు ఎంటర్ టైన్మెంట్ తప్ప మిగతా ఆలోచనలు అనవసరం.
కాసేపు టైమ్ పాస్.. అది ఎవడు చేస్తేనేమీ? అలాంటి పరిస్థితుల్లో చూడాల్సి వచ్చింది.. అమెజాన్ ప్రైమ్ లో.. మిడిల్ క్లాస్ మెలోడీస్.. అనే సినిమాని. ఒక షాటూ, రెండు షాట్లూ.. ఒక్కొక్క పాత్ర ప్రవేశిస్తోంది. మెల్లగా ఆ పాత్రల్లో నాదొక ప్రేక్షక పాత్రయిపోతోంది. అప్పుడనుకున్నాను.. ఎవడ్రా ఈ సినిమా తీసిందీ అని. పల్లెటూళ్లో హోటల్ యజమాని. అతని భార్య. వాళ్ల కొడుకు. వాడికో ఫ్రెండు. ఆ ఇంటికి పాలు పోసే వాడు. ఆ హోటల్ యజమానికో సిటీలో చుట్టం. వాడికో కూతురు. ఈ కొడుక్కీ, ఆ అమ్మాయికీ చిన్న ప్రేమకథ. మధ్యలో ఆ ఫ్రెండుగాడికో లవ్ స్టోరీ.. వాడికో చిన్న సెల్ ఫోన్ వ్యాపారం. దానికి తోడు జాతకాల పిచ్చ. ఆ ఫ్రెండుకో పెదనాన్న.
ఆయనకు ఊళ్లో బోలెడంత గౌరవం. అందుకని, ఆ ఊరిలో చాలామంది ఆయన దగ్గర చిట్టీలు వేయడం, తీరా ఆ పెద్దమనిషికో కష్టం వచ్చి, ఆయన కనిపించకుండా పోవడం, చిట్టీలు కట్టి డబ్బులు ఇరుక్కుపోయి ఊళ్లో చాలా జీవితాలు అతలాకుతలం అయిపోవడం, దాని వల్ల ఆ హోటల్ యజమాని కొడుకు గుంటూరులో హోటల్ పెట్టాలన్న కల చెదిరిపోవడం, దానికి అతని ప్రేమ ముడిపడిపోవడం.. ఇలా అల్లిక మీద అల్లిక… గుక్క తిప్పుకోకుండా కథని మలుపు మీద మలుపు తిప్పి, ప్రేక్షకుడినైన నన్ను కట్టిపడేసిందా సినిమా.
సినిమాలో సీను సీనూ.. జీవం పోసుకుంటూంటే, పాత్ర పాత్రకీ ఆ నటులు ప్రాణం పోసేస్తుంటే.. చూస్తూ తన్మయులం అయిపోవడం తప్ప ఇంకేమీ చేయలేకుండా ఉండిపోతాం. ఎక్కడి నుండి పుట్టారీ నటీనటులంతా? అని గొప్ప ఆశ్చర్యం కలిగింది నాకు. ఇంతకాలం తెలుగు సినిమా తెర మీద ఇలాంటి వాళ్లు ఎందుకు కనిపించలేదు అన్న కోపం వెంటనే, కనీసం ఓటీటీ పుణ్యమా అని ఇప్పటికయినా వీళ్లు మన కళ్లకు సాక్షాత్కరిస్తున్నారని ఆనందం ఉప్పొంగింది. నటులా వాళ్లు.. జీవించేశారు. సంధ్యగా పాత్ర పోషించిన తెలుగమ్మాయి.. ఎవరో వర్ష బొల్లమ్మ అంట.. సెకనుకు 24 ఫ్రేములుండే సినిమా నిడివిలో, సెకను సెకనుకీ కాదు, ఫ్రేము ఫ్రేముకీ నటించి మెప్పించింది.
సంధ్య అనే పాత్రకు ఆ అమ్మాయి ప్రాణం పోస్తుంటే, అది చూస్తున్న ప్రేక్షకుడిగా నాకు ప్రాణం లేచొచ్చింది. పల్లెటూరు హోటల్ యజమానిగా గోపరాజు రమణ గారు.. తండ్రి పాత్రని సాక్షాత్కరింపజేశారు. ఒక్క షాటులో కూడా ఎక్సప్రెషన్ లేకుండా ఆయన లేరు. ఆయన డైలాగ్ ఉన్నా లేకపోయినా, చిన్న కనురెప్ప కదలికలోనూ ఆయన నటించేసి మెప్పించేశారు. మహానుభావుడు.. ఇన్నాళ్లూ తెలుగు వెండితెర ఆయనని విస్మరించినందుకు సిగ్గుతో చావాలి. ఆయన భార్యగా నటించినావిడ.. అంటే ఆనంద్ దేవరకొండ అమ్మ పాత్రధారి.. కాళ్ళకి నమస్కారం పెట్టాలనిపించింది.
Must Read: ఫుడ్ మనది.. బిల్లు ‘దేవరకొండ’ బ్రదర్స్ ది
ఆనంద్ దేవరకొండ ఫ్రెండు గోపాల్ పాత్రధారి, ఓ సెల్ ఫోన్ షాపులో సెల్సుగర్లు కమ్ గోపాల్ గర్ల్ ఫ్రెండ్ అయిన ఆ చిట్టితల్లి, అదే సెల్ ఫోన్ షాపులో ఆ చిట్టితల్లి తోటి సేల్స్ గర్ల్ స్నేహితురాలు.. ఆఖరికి పాలు పోసే ముసలాయన, ఆటోడ్రైవరు, సెల్ ఫోన్ సేల్సుగర్ల్ తాగుబోతు తండ్రి.. ఆఖరుకి.. ఆ సినిమాలో మామిడి చెట్టు కూడా అద్భుతంగా నటించేసింది. ఏంట్రా ఈ సినిమా అని ఆశ్చర్యపోతూ, టైటిల్సు పడినప్పుడు, అసలు ఎవడ్రా ఈ డైరెక్టరు అని చూసేసరికి, వినోద్ అనంతోజు డైరెక్షన్ అనే కార్డు చూసి దిమ్మతిరిగి షాక్ అయిపోయాను. ఎప్పుడో ఆరేడేళ్ల కిందట… అతని రెండు మూడు షార్టు ఫిల్ములు చూసి, వీడు మామూలోడు కాడు.. అని అప్పుడే అనుకున్నాను.
శూన్యం, మరణం అనే రెండు షార్టు ఫిల్ములు తీసి, శభాష్ అని అప్పట్లోనే అనిపించుకున్న చిచ్చరపిడుగు వినోద్ అనంతోజు. అతడు ఆ తరువాత సోదిలో లేకుండా పోయేసరికి ఆ పేరే మర్చిపోయాను. మళ్లా ఈ సినిమా చూసేసరికి, ఆ వినోద్ అనంతోజు ఈలోగా ఇంత పెద్ద వాడయిపోయాడా అని ఆశ్చర్యపోయాను. మిడిల్ క్లాస్ మెలోడీస్ సినిమా చూశాక.. ఆనంద్ దేవరకొండ మీద కోపం పోయింది. ఇలాంటి సినిమాలు అడపాదడపా చేయాలని ఆశీర్వదించాలనిపించింది. వినోద్ అనంతోజు మొదటి సినిమానే అద్భుతంగా మలిచాడు.
ఇలాంటి అద్భుతాలు అతను ఇంకా ఇంకా చేస్తాడు, నేను చూస్తాను. సందేహమే లేదు. మంచి కెమెరా, అంతకుమించి బ్యాక్ గ్రౌండ్ సంగీతం, అవసరానికి సరిపడిన పాటలు.. వెరసి అందరూ కలిసి ఓ అద్భుతాన్ని అమేజాన్ ప్రైమ్ లో ఆవిష్కరించేశారు. మిడిల్ క్లాస్ మెలోడీస్ కథ పరిగెడుతూనే ఉంటుంది, కానీ అక్కడక్కడే తిరుగుతున్నట్లుంటుంది. కథ ముగినట్లే ఉంటుంది, కానీ మళ్లీ మొదలుతో మొలకెత్తుతుంటుంది. ఈ సినిమాని తెలుగు ప్రేక్షకులు చూస్తే తరిస్తారు. లేదంటే, ఎప్పటిలాంటి చెత్తనే నెత్తిమీద జల్లుకుంటూ బతుకులు చాలిస్తారు. మిడిల్ క్లాస్ మెలోడీస్ సినిమా చూడని వాళ్లకి ఇదే నా శాపం.
– సతీశ్
Also Read: మిడిల్ క్లాస్ మెలోడీస్;లో గుండె తలుపు తడుతున్న గుంటూరు పాట
