మహిళా SIపై దౌర్జన్యానికి దిగిన ఆమదాలవలస వైసీపీ ఇన్ఛార్జి చింతాడ రవికుమార్కు పోలీసులు గట్టి బుద్ధి చెప్పారు. మహిళా పోలీసులు రవి కుమార్ను శ్రీకాకుళం నడివీధుల్లో నడిపించుకుంటూ వెళ్లి కోర్టులో నిలబెట్టారు. ఏ మహిళా అధికారిణిపై అయితే ఆయన దా*డికి పాల్పడ్డారో..అదే మహిళా SIలు ప్రవల్లిక, హైమావతి, మరికొందరు మహిళా కానిస్టేబుళ్లు SP ఆఫీసు నుంచి జిల్లా కోర్టు వరకు సుమారు 300 మీటర్ల మేర నడిరోడ్డు మీద రవి కుమార్ను నడిపించుకుంటూ తీసుకెళ్లడం సంచలనంగా మారింది.
అహంకారంతో మహిళా పోలీస్ అధికారిణిపై దా*డికి పాల్పడిన ఈ కేసులో చింతాడ రవితో పాటు మరో నలుగురు నిందితులను ఆదివారం శ్రీకాకుళం జిల్లా ఫస్ట్క్లాస్ ప్రిన్సిపల్ సివిల్ జడ్జి అనురాగ్ ఎదుట పోలీసులు హాజరుపరిచారు. పోలీసుల తరఫున వాదనలు విన్న న్యాయమూర్తి..నిందితుల నేర తీవ్రతను పరిగణనలోకి తీసుకున్నారు. చింతాడ రవికుమార్ సహా నిందితులకు ఈ నెల 21 వరకు రిమాండ్ విధిస్తూ న్యాయమూర్తి ఆదేశాలు జారీ చేశారు.
మహిళా ఎస్సైపై దా*డి ఘటనను పోలీసు శాఖ చాలా సీరియస్గా పరిగణించింది. ఈ కేసుకు సంబంధించి మొత్తం 28 మంది నిందితులు ఉన్నట్లు పోలీసులు గుర్తించారు. వీరిలో ఇప్పటికే చింతాడ రవికుమార్తో కలిపి 14 మందిని అరెస్ట్ చేసి రిమాండ్కు తరలించారు. పరారీలో ఉన్న మిగిలిన 14 మంది నిందితులను కూడా త్వరలోనే అదుపులోకి తీసుకునేందుకు పోలీసులు చర్యలు వేగవంతం చేశారు.
జులై 30వ తేదీన మాజీ మంత్రి సీదిరి అప్పలరాజు ములాఖత్ కోసం వైసీపీ అధినేత వైఎస్ జగన్ శ్రీకాకుళం జిల్లాకు వచ్చారు. ఆ సమయంలో జగన్కు స్వాగతం పలికే క్రమంలో కొట్టారోడ్డు వద్ద బందోబస్తులో ఉన్న మహిళా ఎస్ఐపై చింతాడ రవి, అతని అనుచరులు అత్యంత దురుసుగా, అసభ్యంగా ప్రవర్తించారు. మహిళా అధికారిణిపై జరిగిన ఈ దౌర్జన్యంపై ఏపీ ప్రభుత్వం తీవ్ర స్థాయిలో స్పందించింది. కేసు నమోదైన నాటి నుంచి పరారీలో ఉన్న చింతాడ రవికుమార్ కోసం టాస్క్ఫోర్స్ పోలీసులు ముమ్మరంగా గాలించారు. శనివారం ఎచ్చెర్ల మండలం చిలకపాలెం వద్ద రవికుమార్ను పోలీసులు అదుపులోకి తీసుకున్నారు.
