నిబంధనల పేరుతో సర్కారు వేధింపులు.. కడపలో ప్రైవేటు వైద్యుల తిరుగుబాటు

ఏపీలో కరోనా సెకండ్ వేవ్ వేగంగా వ్యాపిస్తోంది. నిన్న ఒక్క రోజే ఏపీలో 14 వేల మందికిపైగా కరోనా బారిన పడ్డారు. దీంతో ఏపీలో కరోనా యాక్టివ్ కేసుల సంఖ్య తొలిసారిగా లక్ష దాటి పోయాయి. గడచిన వారంలోనే 82 వేల కరోనా పాజిటివ్ కేసులు నమోదయ్యాయి. ప్రభుత్వ ఆసుపత్రులు కరోనా రోగులతో నిండిపోయాయి. ఇక కరోనా రోగులకు వైద్యం చేసేందుకు ప్రభుత్వం కొన్ని ప్రైవేటు ఆసుపత్రులను అనుమతించింది. అయితే కరోనా వైద్యం అందిస్తున్న ఆసుపత్రులపై విజిలెన్స్, పోలీసులు దాడులు చేసి నిబంధనలు ఉల్లంఘిస్తున్నారంటూ కేసులు పెట్టడం, భారీ జరిమానాలు విధిస్తుండటంతో కడపలో ప్రైవేటు వైద్యులు సంచలన నిర్ణయం తీసుకున్నారు. కడపలో ప్రైవేటు ఆసుపత్రులపై విజిలెన్స్ దాడుల నేపథ్యంలో ప్రైవేటు వైద్యులు గురువారం ఐఎంఏ భవనంలో సమావేశమయ్యారు. కష్టకాలంలో కరోనా రోగులకు వైద్యం చేస్తున్నా నిబంధనల పేరుతో ప్రభుత్వం వేధిస్తోందని, విజిలెన్స్, పోలీసులతో దాడులు చేయించి కేసులు రాయడం, పెద్ద ఎత్తున జరిమానాలు విధించడాన్ని ప్రైవేటు వైద్యుల సంఘం ఖండించింది. ఇక నుంచి కరోనా రోగులకు చికిత్స చేయకూడదని ఈ సంఘం సంచలన నిర్ణయం తీసుకుంది. వెంటనే వారి ఆసుపత్రుల ముందు కరోనా రోగులను చేర్చుకోవడం లేదంటూ బోర్డులు పెట్టేశారు. ప్రభుత్వంపై ప్రైవేటు వైద్యులు తిరుగుబాటు చేయడం రాష్ట్రంలో సంచలనంగా మారింది.

ప్రైవేటు వైద్యం కూడా కీలకమే

కరోనా రోజు రోజుకు వేగంగా వ్యాపిస్తున్న నేపథ్యంలో కేవలం ప్రభుత్వ ఆసుపత్రుల్లో వైద్యం అందించడం సాధ్యం కాదు. ఇప్పటికే ప్రభుత్వ ఆసుపత్రుల్లో బెడ్లు దొరక్క కరోనా రోగులు ప్రైవేటు ఆసుపత్రులను ఆశ్రయిస్తున్నారు. ఈ సమయంలో కరోనా రోగులకు చికిత్స అందిస్తున్న ప్రైవేటు ఆసుపత్రులపై విజిలెన్స్ అధికారులు విరుచుకుపడ్డారు. నిబంధనలు ఉల్లంఘిస్తున్నారంటూ వైద్యులు, ఆసుపత్రులు నిర్వహిస్తున్న యాజమాన్యాలపై క్రిమినల్ కేసులు కూడా నమోదు చేస్తున్నారు. ఇక లక్షల రూపాయల జరిమానా విధిస్తున్నారు. దీంతో బెంబేలెత్తిపోయిన ప్రైవేటు ఆసుపత్రుల డాక్టర్లు కడప జిల్లాలో కీలక నిర్ణయం తీసుకున్నారు. ఈ నిర్ణయం ప్రభుత్వ చర్యలను వ్యతిరేకిస్తూ తీసుకున్నా అంతిమంగా నలిగిపోయేంది మాత్రం కరోనా రోగులే. ప్రభుత్వం ఇలాంటి అత్యవసర పరిస్థితుల్లో ప్రైవేటు ఆసుపత్రుల సేవలు వినియోగించుకుంటూ కరోనాను ఎదుర్కొనే ప్రయత్నం చేయకపోగా వారిపై దాడులు చేయడంపై అనేక విమర్శలు వస్తున్నాయి. ప్రభుత్వ చర్యలను డాక్టర్లు ముక్త కంఠంతో ఖండిస్తున్నారు. ఇప్పటికైనా దాడులు ఆపకపోతే రాష్ట్ర వ్యాప్తంగా కరోనా రోగులకు వైద్య సేవలు నిలిపివేస్తామని వారు ప్రభుత్వాన్ని హెచ్చరిస్తున్నారు.

Must Read ;- ఆ ఘటన హృదయ విదారకరం.. హార్ట్ బ్రేకింగ్ ఫర్ ఇండియా

దాడులతో గందరగోళం

ప్రైవేటు ఆసుపత్రులు రెమ్ డెసీవర్ ఇంజక్షన్ మందును బ్లాక్ మార్కెట్ కు తరలించి అధిక ధరలకు విక్రయిస్తున్నారంటూ గురువారం అన్ని జిల్లా కేంద్రాల్లోని ప్రైవేటు ఆసుపత్రులపై విజిలెన్స్ దాడులు నిర్వహించింది. కొన్ని చోట్ల ప్రైవేటు ఆసుపత్రుల్లో రెమ్ డిసీవర్ ఇంజక్షన్లను బ్లాక్ మార్కెట్‌కు తరలించారని గుర్తించారు. అనంతపురంలోని ఎస్వీ మల్టీ స్పెషాలిటీ హాస్పటల్, తిరుపతిలోని రమాదేవి సూపర్ స్పెషాలిటీ ఆసుపత్రులపై కేసులు నమోదు చేశారు. రమాదేవి ఆసుపత్రి నోడల్ అధికారి కిషోర్ యాదవ్‌ను అరెస్ట్ చేశారు. ఇక విజయవాడ, నెల్లూరులో నారాయణ ఆసుపత్రుల్లోనూ విజిలెన్స్ దాడులు నిర్వహించింది. పలు ఆసుపత్రుల్లో రెమ్ డిసీవర్ ఇంజక్షన్ల లెక్కల్లో అవకతవకలు గుర్తించారు.

నెల్లూరులో రెమ్​డెసివిర్ ఇంజక్షన్లు నల్లబజారుకు తరలించిన ఓ ఆస్పత్రి నిర్వాహకుడిపై  పోలీసులు కేసు నమోదు చేశారు.ఒంగోలులో ఓ ఆస్పత్రిలో  రెమ్‌డిసీవర్ ఇంజక్షన్ల వినియోగంలో అవకతవకలు జరిగాయని అధికారులు గుర్తించారు. విజయనగరం, కర్నూలులోనూ బ్లాక్ మార్కెట్ కు తరలిస్తున్న వారిపై కేసులు నమోదు చేశారు. అవకతవకలకు పాల్పడిన ఆస్పత్రి యాజమాన్యాలపై క్రిమినల్ కేసులు నమోదు చేయనున్నట్లు విజిలెన్స్ అధికారులు హెచ్చరించారు.

మండిపడుతున్న ప్రైవేటు డాక్టర్లు

ఎక్కడో ఒక ఆసుపత్రిలో అవకతవకలు జరిగితే మొత్తం ప్రైవేటు ఆసుపత్రులు దారుణంగా దోచుకుంటున్నాయని ఆరోపణలు చేయడంపై వైద్యుల సంఘాలు ఆందోళన వ్యక్తం చేస్తున్నాయి. రెమ్‌డిసీవర్ ఇంజక్షన్ మందు సరఫరా లేదని, ప్రైవేటు ఆసుపత్రులకు వచ్చిన అరకొర మందును రోగులకు అందిస్తున్నామని వారు చెబుతున్నారు. అయితే ఏపీలో రూ.1800 నుంచి రూ.2500 అమ్మాల్సిన రెమ్‌డిసీవర్ ఇంజక్షన్‌ను కొందరు దళారులు రూ.25 వేల నుంచి రూ.40 వేలకు బ్లాకులో అమ్మడం ప్రైవేటు ఆసుపత్రులకు శరాఘాతంగా మారింది. ఈ వ్యవహారంలో ప్రైవేటు ఆసుపత్రుల యాజమాన్యాలు ప్రభుత్వ చర్యలను తప్పుపడుతున్నాయి. చాలా ప్రైవేటు ఆసుపత్రులకు అసలు రెమ్‌డిసీవర్ మందు సరఫరా చేయడం లేదని, అలాంటప్పుడు దాడుల పేరుతో భయభ్రాంతులకు గురిచేయడం సబబు కాదని వారు వాదిస్తున్నారు. ఏది ఏమైనా ఇటు ప్రభుత్వం, అటు ప్రైవేటు ఆసుపత్రుల యాజమాన్యాల చర్యలతో కరోనా రోగులు ప్రాణాలు కోల్పోవాల్సిన దుస్థితి నెలకొనడం శోచనీయం.

Also Read ;- ప్రాణవాయువు లేక ఊపిరి పోతోంది.. ఆక్సిజన్ అందక ఆసుపత్రిలో 25 మంది మృతి