చిత్రపరిశ్రమలోనే కాదు ప్రతి రంగంలోనూ స్త్రీలకు వేధింపులు ఎదురవుతూనే ఉంటాయి. అయితే సినిమా అనేది గ్లామర్ ఫీల్డ్ కనుక, ఇక్కడ వేధింపుల పాళ్లు ఇంకాస్త ఎక్కువగా కనిపిస్తాయంతే. ముఖ్యంగా తాము ధరించే కాస్ట్యూమ్స్ విషయంలో హీరోయిన్లు ఎక్కువగా ఇబ్బందిపడుతుంటారు. కొంతమంది దర్శకులు వాళ్ల ఇబ్బందిని అర్థం చేసుకుని ఆయా సన్నివేశాల చిత్రీకరణలో కొన్ని మార్పులు చేసుకుంటారు. మరికొంతమంది మాత్రం తాము ఇచ్చిన కాస్ట్యూమ్స్ ధరించవలసిందేనని పట్టుపడతారు.
తాజాగా అలాంటి విషయాన్ని గురించి ప్రియాంక చోప్రా తన ‘ఆత్మకథ’లో రాసుకొచ్చింది. బాలీవుడ్లో కథానాయికగా తన సత్తాను చాటుకున్న ప్రియాంక చోప్రా, ప్రస్తుతం తన కెరియర్ ను హాలీవుడ్లో పరుగులు తీయిస్తోంది. అన్ ఫినిష్డ్’ అనే పేరుతో ఆమె తన ‘ఆత్మకథ’ను’ బుక్ రూపంలో ఈ నెల 9వ తేదీన మార్కెట్లోకి తీసుకొచ్చింది. ఆ బుక్ లో ఆమె ఉత్తరప్రదేశ్ లోని ఓ మారుమూల గ్రామంలో తాను పుట్టిపెరగడం దగ్గర నుంచి బాలీవుడ్ కి రావడం .. అక్కడ నుంచి హాలీవుడ్ దిశగా సాగిన ప్రయాణం గురించి చెప్పుకొచ్చింది. ఈ క్రమంలోనే తనకి ఎదురైన ఒక సంఘటనను గురించి పేర్కొంది.
ఒక సినిమాకి సంబంధించి నేను ఐటమ్ సాంగ్ చేయడానికి అంగీకరించాను. ఆ డైరెక్టర్ నన్ను లోదుస్తులు కనిపించే ఒక డ్రెస్ వేసుకోమని చెప్పాడు. ఆ సినిమా స్టైలిష్ట్ కూడా తెరపై ప్యాంటీ కనిపించవలసిందేనని చెప్పాడు. అవి చూడటానికే వచ్చే ప్రేక్షకులు కూడా ఉంటారని అన్నాడు. అందుకు నేను ఒప్పుకోకపోవడంతో ఆ డైరెక్టర్ కోపంతో చిందులు వేశాడు. దాంతో నేను చేయను పొమ్మని చెప్పి అక్కడి నుంచి బయటికి వచ్చేశాను. ఆ తరువాత నేను సల్మాన్ సినిమా షూటింగులో ఉండగా ఆ డైరెక్టర్ అక్కడికి వచ్చాడు. జరిగిందంతా సల్మాన్ కి చెప్పాను. సల్మాన్ ఆ డైరెక్టర్ ను పిలిచి క్లాస్ పీకడంతో, ఆ వివాదం సద్దుమణిగింది” అని ఆ బుక్ లో రాసుకొచ్చింది.
Must Read ;- యూకే మేగజైన్ కోసం ప్రియాంక హాట్ లుక్
