సినిమా రంగంలో బంధాలు, బంధుత్వాలు తమాషాగా ఉంటాయి. బీరకాయ పీచు బందుత్వం అంటారే అలాంటిదే ఇది కూడా. ఏదో ఒక రూపంలో బంధుత్వం బయటపడుతుంది. ఆ బంధుత్వానికి భాషతో సంబంధం ఉండదు. వారు సినిమా రంగంలో పైకి రావడానికి ఆ బంధుత్వాలు కూడా కారణమయ్యాయా? అన్న ఆలోచన కూడా మనకు రాక మానదు. తమిళ సూపర్ స్టార్ రజినీ కాంత్ కూ, మలయాళ సూపర్ స్టార్ మోహన్ లాల్ కూ బంధుత్వం ఉందంటే నమ్మగలమా? అలాగే రజినీ కాంత్ అందాల నటి రేఖకు బంధువా.. అదెలా?.. ఇలాంటి ప్రశ్నలు సినిమా రంగంలో తలెత్తుతుంటాయి.
ఈ చిక్కుముడిని విడదీసే బంధుత్వాల గురించి తెలుసుకుందాం. మోహన్ లాల్ భార్య పేరు సుచిత్ర. ఆమె మరెవరో కాదు తమిళ నటుడు, నిర్మాత బాలాజీ కుమార్తె. ఈ బాలాజీకి ఓ సోదరి ఉన్నారు. ఆమె పేరు విజయ పార్థసారధి. ఆమె మరెవరో కాదు ప్రముఖ తమిళ నటుడు వై.జి. మహేంద్రన్ తల్లి. అలాంటప్పుడు మహేంద్రన్ భార్య చెల్లెలు లతనే కదా రజినీ కాంత్ చేసుకున్నది. అప్పుడు మోహన్ లాల్ తో కూడా రజినీ కాంత్ కు బంధుత్వం ఉన్నట్టే కదా. రజినీ, లతల కుమార్తెల్లో ఒకరు ఐశ్వర్య. ఆమె భర్తే ధనుష్.
మరి ఈ ధనుష్ అనే సంగతి తెలిసిందే. లతా రజినీకాంత్ సోదరుడే నటుడు రవి రాఘవేంద్రన్. ఇతను ఎవరనుకుంటున్నారు.. ఇంకెవరు నేటి యువ సంగీత దర్శకుడు అనిరుధ్ రవిచందర్ తండ్రి. పైగా వీరి సమీప బంధువులే నటి శోభన, నటుడు వినీత్. వై జి మహేంద్రన్ కుమార్తె మధుమతి పెళ్లి చేసుకున్నది ఎవరిననుకున్నారు? అతని పేరు అరుణ్. మహానటి సావిత్రి మనవడు ఈ అరుణ్. అతని తల్లి విజయచాముండేశ్వరి. మరి అలాంటప్పుడు జెమినీ గణేష్ ఆమెకు తండ్రే కదా.
ఈ జెమినీ గణేష్ కూతురే బాలీవుడ్ నటి రేఖ. చూశారా.. ఈ బంధుత్వాలు ఎటు నుంచి ఎటు వెళ్లి కలుస్తున్నాయో. ఇప్పుడు రేఖ, మోహన్ లాల్ కూడా బంధువులే కదా. ఇంతమంది బంధుగణాలతో సినిమా రంగం ఉండటం విశేషమే. సామాన్యులకు ఇవేమీ తెలియవు. సినిమా రంగంలో మనం పైకి రావడానికి ఎంతో కొంత ఈ బంధుత్వం ఉపయోగపడకుండా ఎలా ఉంటుంది. ఇలా చెప్పుకుంటూ పోతే ఇంకా పెద్ద లిస్టే తయారుకావచ్చు. అందుకే ఇక్కడితో ఆపేద్దాం.
