ఎలాంటి నేపథ్యం లేకుండా చిత్రపరిశ్రమలో హీరోగా నిలదొక్కుకోవడం అంత తేలికైన విషయమేం కాదు. ఫ్యామిలీ హీరోగా పేరు తెచ్చుకోవడం .. చాలా వేగంగా 100 సినిమాలను పూర్తి చేయడం అంత ఆషామాషీ వ్యవహారం కూడా కాదు. తనకంటే ముందుగా పరిశ్రమలో ఉన్న కొంతమంది కథానాయకులను దాటుకుని ‘శ్రీ శతకం’ పూర్తిచేయడం ఆయన ప్రత్యేకత. శ్రీకాంత్ కెరియర్లో ఎన్నో చెప్పుకోదగిన సినిమాలు ఉన్నాయి .. గుర్తుండిపోయే పాత్రలు ఉన్నాయి. ఆ సినిమాల్లో ఆయన తాజాగా ‘ప్రేయసిరావే’ సినిమాను గుర్తుచేసుకున్నారు. అందుకు కారణం ఆ సినిమా ఇటీవలే 21 సంవత్సరాలను పూర్తిచేసుకోవడమే.
సురేశ్ ప్రొడక్షన్స్ బ్యానర్లో చేసే అవకాశం రావడాన్ని ఎవరైనా సరే అదృష్టంగా భావిస్తారు. అలాంటి అదృష్టం నాకు కెరియర్ ఆరంభంలోనే కలిగింది. అదే బ్యానర్లో మళ్లీ ‘ప్రేయసిరావే’ చేసే అవకాశం వచ్చినప్పుడు చాలా ఆనందం కలిగింది. “ఈ పాత్రను నువ్వు చేస్తేనే బాగుంటుంది” అని రామానాయుడుగారు అనడం నాకు మరింత సంతోషాన్ని కలిగించింది. ఆయన ప్రోత్సాహాన్ని నేను ఎప్పటికీ మరిచిపోలేను. ఇప్పటికీ ఆ సినిమా చూస్తుంటే నాకు మనసు భారమవుతుంది. అంతగా ఆ సినిమా కథాకథనాలు నా మనసుకు హత్తుకుపోయాయి. ఆ సినిమా షూటింగు సంగతులు నా కళ్ల ముందు కదలాడుతూనే ఉంటాయి.
ఈ సినిమాలో నా జోడీగా ‘రాశి’ నటించింది. రాశి మంచి నటి .. తన నటన ఎంతో సహజంగా ఉంటుంది. ఒక్క రాశి మాత్రమే కాదు, అప్పట్లో నాతో కలిసి నటించిన రమ్యకృష్ణ .. రోజా .. సౌందర్య కూడా గొప్ప ఆర్టిస్టులు. అందరూ కూడా నాతో ఎంతో స్నేహంగా ఉండేవారు. అందరం కుటుంబసభ్యుల మాదిరిగా మసలుకునే వాళ్లం. ఇక షూటింగు సమయంలో సెట్లో రోజా ఎక్కువ అల్లరి చేసేది. నన్ను తను ‘అన్నయ్యా’ అంటూ ఎంతో ఆత్మీయంగా పిలిచేది.
ఒకసారి ఒక సినిమా కోసం మా ఇద్దరి మధ్య రొమాంటిక్ సీన్స్ ప్లాన్ చేశారు. అప్పుడు కూడా తను నా దగ్గరికి వచ్చి ”అలా చేద్దాం అన్నయ్యా .. ఇలా చేద్దాం అన్నయ్యా” అంటూ ఉండేది. దాంతో నాకు చిరాకు వచ్చేసింది .. ” కాసేపైనా ‘అన్నయ్యా’ అని పిలవడం ఆపేయ్ .. నువ్వలా మాటకు ముందు అన్నయ్యా .. మాటకి తరువాత అన్నయ్యా అంటూ ఉంటే నాకు రొమాంటిక్ ఫీల్ రావడం లేదు” అన్నాను. దాంతో ఆమె పెద్దగా నవ్వేసింది. ఇప్పటికీ ఆ విషయం తలచుకుని మేము నవ్వుకుంటూనే ఉంటాం అని శ్రీకాంత్ చెప్పుకొచ్చాడు.
Must Read ;- బిగ్ బాస్ విషయంలో.. వర్మ శ్రీకాంత్.. ఇద్దరిలో ఎవరి జోస్యం ఫలిస్తుంది.?
