బాలీవుడ్ స్టార్ హీరో ఆమిర్ ఖాన్ ప్రస్తుతం ‘లాల్ సింగ్ చద్దా’ సినిమాలో నటిస్తున్నారు. హాలీవుడ్ సూపర్ హిట్ సినిమా ‘ఫారెస్ట్గంప్’ ఆధారంగా తెరకెక్కుతోంది. ఈ సినిమాకు అద్వైత్ చందన్ దర్శకత్వం వహిస్తుండగా వయాకామ్ 18 మోషన్ పిక్చర్స్తో కలిసి ఆమిర్ ఖాన్ నిర్మిస్తున్నారు. ఈ సినిమా షూటింగ్ ఇప్పటికే పూర్తి కావాల్సింది. అయితే కరోనా కారణంగా ఈ చిత్ర షూటింగ్ మధ్యలోనే నిలిచిపోయింది. ఈ మధ్యనే తిరిగి షూటింగ్ ప్రారంభం అయ్యింది. ఈ సినిమా షూటింగ్ లో ఆమిర్ ఖాన్ కు గాయాలు కూడా అయ్యాయి. కాని ఆయన అవేమి పట్టించుకోకుండా పెయిన్ కిల్లర్స్ వేసుకుని నటించారు.
ఇప్పుడు ఈ సినిమాపై ఒక వార్త బాలీవుడ్ సినీ పరిశ్రమలో చక్కర్లు కొడుతోంది. ‘లాల్ సింగ్ చద్దా’ సినిమాలో బాలీవుడ్ బాద్షా, కింగ్ ఖాన్ షారుఖ్ ఖాన్ అతిధి పాత్రలో నటిస్తున్నాడని బాలీవుడ్ లో గుసగుసలు వినపడుతున్నాయి. కాగా షారుఖ్ ఖాన్ నటించిన సన్నివేశాలకు స్వయంగా ఆమిర్ ఖానే దర్శకత్వం వహించారని బాలీవుడ్ లో టాక్ నడుస్తోంది. ఈ వార్త నిజమైతే ఒక స్టార్ హీరో దర్శకత్వంలో మరో స్టార్ హీరో నటించడం పెద్ద విశేషమే. ఇప్పటికే ఈ సినిమాపై ఆమిర్ అభిమానుల్లో భారీ అంచనాలు నెలకొన్నాయి. ఇక ‘లాల్ సింగ్ చద్దా’ సినిమాలో షారుఖ్ ఒక గెస్ట్ రోల్ చేస్తున్నాడు అనే వార్తతో ఈ సినిమాపై అంచనాలు డబుల్ అయ్యాయి.
షారుఖ్ సినిమా వచ్చి దాదాపు రెండు సంవత్సరాలు అయ్యింది. ‘జీరో’ పరాజయం తర్వాత షారుఖ్ మరో సినిమా చేయలేదు. ఆయన అభిమానులు మాత్రం షారుఖ్ ను బాగా మిస్ అయ్యారనే చెప్పాలి. ఈ సినిమాతో షారుఖ్ తమను అలరించడానికి వస్తున్నాడని అభిమానులు పండగ చేసుకుంటున్నారు. ఈ సినిమా ఆమిర్ ఖాన్, షారుఖ్ ఖాన్ అభిమానులను ఎంతవరకు అలరిస్తుందో చూడాలి మరి.
