సినిమాల్ని కళాత్మకంగానే కాకుండా.. చాలా గ్రాండ్ గా తెరకెక్కించే దర్శకుల్లో సంజయ్ లీలా భన్సాలీ ఒకరు. ప్రఖ్యాత కథలకు తెరరూపం కల్పించడంలో ఆయనది తిరుగులేని చెయ్యి. ఇప్పటివరకూ ఆయన తీసిన ‘దేవదాస్, బాజీరావ్ మస్తానీ, పద్మావత్ .. త్వరలో రాబోతున్న గంగూభాయ్ కతియావాడీ’ లాంటి సినిమాల్లో ఆయన సిగ్నేచర్ కనిపిస్తుంది. వీటిలో ఆయన సినీ కెరీర్ ను మలుపుతిప్పిన చిత్రం ‘దేవదాస్’ అన్న సంగతి తెలిసిందే.
కింగ్ ఖాన్ షారుఖ్ తో తీసిన దేవదాస్ సినిమా ఏ రేంజ్ లో హిట్టంయిందో తెలిసిందే. అయితే అంత సక్సెస్ అయినప్పటికీ.. భాన్సాలీ.. ఆ సినిమా తర్వాత మరోసారి షారుఖ్ తో మరో సినిమా తీయనేలేదు. అయితే దాదాపు పంతొమ్మిదేళ్ళ తర్వాత భన్సాలీ షారుఖ్ తో మరో సినిమా రూపొందించేందుకు సన్నాహాలు చేయబోతుండడం బాలీవుడ్ లో విశేషంగా మారింది.
‘ఇజార్’ అనే టైటిల్ ను ఖాయం చేసిన షారుఖ్, భన్సాలీ కాంబో లో వస్తున్న ఈ రెండో సినిమా.. వాస్తవ సంఘటనల ఆధారంగా రూపొందుతోన్న ఓ ప్రేమకథ. తన ప్రేయసికోసం ఇండియా నుంచి నార్వేకి సైక్లింగ్ చేసిన వ్యక్తి నిజజీవిత స్ఫూర్తిగా ఈ సినిమా ను తెరకెక్కిస్తున్నాడు దర్శకుడు. ప్రస్తుతం షారుఖ్ హీరోగా.. సిద్ధార్ధ్ ఆనంద్ దర్శకత్వంలో ‘పఠాన్’ అనే మూవీ తెరకెక్కుతోన్న సంగతి తెలిసిందే. ఈ మూవీ కంప్లీట్ అయిన తర్వాత షారుఖ్ చేయబోయే తదుపరి చిత్రం ఇదే అంటున్నారు. మరి ఇజార్ గా షారుఖ్ ఏ రేంజ్ లో అభినయిస్తాడో చూడాలి.
