అల్లు అరవింద్ కు చెందిన ఆహా ఓటీటీ ప్రస్తుతం ప్రేక్షకులకు మంచి కంటెంట్ ను అందిస్తూ దూసుకుపోతోంది. ముఖ్యంగా విషయం ఉన్న చిన్న సినిమాలు ఈ ప్లాట్ ఫామ్ మీద వరుసగా విడుదలవుతూ.. సత్తా చాటుకుంటున్నాయి. లాక్ డౌన్ లో విడుదలైన ‘కృష్ణా అండ్ హిజ్ లీల’ మంచి రిజల్ట్ రాబట్టగా, రీసెంట్ గా విడుదలైన ‘కలర్ ఫోటో’ సినిమాకూడా ప్రశంసలు దక్కించుకుంది. ఒక పక్క మలయాళంలో సూపర్ హిట్టయిన మంచి సినిమాల్ని అనువాదం చేస్తూ అందిస్తోన్న ఆహా.. త్వరలో మరో చిన్న సినిమాతో ముస్తాబవుతోంది. సినిమా పేరు ‘మా వింతగాథ వినుమా’.
‘కృష్ణా అండ్ హిజ్ లీల’లో హీరోగా నటించిన సిద్ధూ జొన్నలగడ్డ, అందులో మరో పాత్రపోషించిన సీరత్ కపూర్ జంటగా ఈ మూవీ తెరకెక్కింది. ఆదిత్య మందాల దర్శకత్వంలో సంజయ్ రెడ్డి నిర్మించిన ‘మావింత గాథ వినుమా’ సినిమాను నవంబర్ 13న దీపావళి కానుకగా విడదల చేస్తున్నట్టు ఇటీవల అల్లు అరవింద్ ప్రకటించారు. ఫ్యామిలీ కామెడీ ఎంటర్ టైనర్ గా తెరకెక్కిన ఈ సినిమా భలేగా ఎంటర్ టైన్ చేస్తుందని చెబుతున్నారు. సి.వి.యల్. నరసింహారావు, జయప్రకాశ్ ప్రధాన పాత్రలు పోషిస్తోన్న ఈ సినిమా ఏ రేంజ్ లో సక్సెస్ సొంతం చేసుకుంటుందో చూడాలి.
