TPCC Notices To Koushik Reddy :
తెలంగాణలో కాంగ్రెస్ పార్టీ బలోపేతం కావడం ఖాయమన్న విశ్లేషణల నేపథ్యంలో ఆ పార్టీకి మరోమారు షాక్ తగిలింది. త్వరలో జరగనున్న హుజూరాబాద్ ఉప ఎన్నికలో సత్తా చాటే దిశగా టీ పీసీసీ చీఫ్ రేవంత్ రెడ్డి వ్యూహాలు రచిస్తున్న సమయంలో ఆ పార్టీకి చెందిన కౌశిక్ రెడ్డికి చెందినది భావిస్తున్న ఓ వీడియో సోషల్ మీడియాలో కలకలం రేపుతోంది. అంతేకాకుండా ఈ వీడియోకు సమాధానం చెప్పాలంటూ కౌశిక్ రెడ్డికి పీసీసీ క్రమశిక్షణా సంఘం జారీ చేసిన నోటీసు.. అందులో కౌశిక్ రెడ్డికి కేవలం 24 గంటల సమయం మాత్రమే ఇస్తూ ఆదేశాలు జారీ చేసిన వైనం మరింత సంచనలంగా మారిపోయింది.
అసలేం జరిగిందంటే..
హుజూరాబాద్ ఎన్నికల్లో కాంగ్రెస్ పార్టీ తరఫున తానే నిలబడతానంటూ కౌశిక్ రెడ్డి గత కొంతకాలంగా చెబుతూ వస్తున్న సంగతి తెలిసిందే. అదే సమయంలో ఆయన టీఆర్ఎస్ ముఖ్య నేతలతో టచ్ లో ఉంటున్న వైనం కూడా ఆసక్తి రేకెత్తిస్తోంది. అసలు కౌశిక్ రెడ్డి కాంగ్రెస్ పార్టీ నేతేనా? అన్న అనుమానాలు రేకెత్తేలా వ్యవహరిస్తున్న కౌశిక్ రెడ్డి.. ఎప్పటికప్పుడు కాంగ్రెస్ శ్రేణులతో పాటు పార్టీ తెలంగాణ పెద్దలను కూడా డైలమాలో పడేస్తున్నారు. తాజాగా మాదన్నపేటకు చెందిన ఓ యువకుడితో ఫోన్ లో సంభాషించిన కౌశిక్ రెడ్డి.. హుజూరాబాద్ బైపోల్స్ లో టీఆర్ఎస్ టికెట్ తనదేనని, యూత్ కు ఎంత డబ్బులు కావాలో తానే చూసుకుంటానని, యూత్ సభ్యులకు రూ.2 నుంచి రూ.3 వేలకు ఇద్దామంటూ తనదైన ఫ్లోలో చెప్పుకుపోయారు. ఈ సంభాషణకు చెందిన ఆడియో టేపు ఎలా వచ్చిందో గానీ.. సోషల్ మీడియాను ఊపేస్తోంది. కాంగ్రెస్ పార్టీకి చెందిన కౌశిక్ రెడ్డి నోట టీఆర్ఎస్ టికెట్ మాట వినిపించడం, అందుకు ఎంత డబ్బైనా తానే చూసుకుంటానంటూ వ్యాఖ్యలు చేయడం, టీఆర్ఎస్ అభ్యర్థిని తానేనంటూ వ్యాఖ్యలు చేయడంపై టీ పీసీసీ వెనువెంటనే స్పందించింది.
అంతా ప్లాన్ ప్రకారమేనా?
ఇదివరకే కౌశిక్ రెడ్డికి సంబంధించి పలు వివాదాలు రేగగా.. ఇప్పుడు సరిగ్గా హుజూరాబాద్ ఉప ఎన్నికకు సమయం దగ్గరపడ్డ సమయంలో టీఆర్ఎస్ అభ్యర్థిని తానేనంటూ చెప్పడంపై పీసీసీ ఆగ్రహం వ్యక్తం చేసింది. అంతే కాకుండా వెనువెంటనే చర్యలకు దిగకపోతే నష్టమేనని భావించిన పీసీసీ క్రమశిక్షణా సంఘం చైర్మన్ కోదండరెడ్డి.. కౌశిక్ రెడ్డికి షోకాజ్ నోటీసు జారీ చేశారు. అంతేకాకుండా ఈ వివాదానికి సంబంధించి 24 గంటల్లోగా సంజాయిషీ ఇవ్వాలని కూడా ఆ నోటీసుల్లో పేర్కొన్నారు. అంటే.. 24 గంటల్లోగా కౌశిక్ రెడ్డి స్పందించకుంటే.. ఆయనపై పీసీసీ వేటు వేసే అవకాశాలే ఎక్కువగా కనిపిస్తున్నాయి. అయితే కౌశిక్ రెడ్డి కూడా కోరుకుంటున్నది ఇదేనని, పార్టీ గెంటేస్తే వెళ్లి టీఆర్ఎస్ లో చేరొచ్చని ఆయన ప్లాన్ గా చెబుతున్నాయి. అయితే కాంగ్రెస్ గెంటేసిన వ్యక్తికి టీఆర్ఎస్ హుజూరాబాద్ లాంటి కీలక స్థానానికి చెందిన టికెట్ ఇస్తుందా? అన్నది కూడా ఆసక్తి రేకెత్తిస్తోంది. మొత్తంగా కౌశిక్ రెడ్డి ఉద్దేశపూర్వకమో, లేదంటే మరే కారణమో తెలియదు గానీ.. కౌశిక్ రెడ్డి ఆడియో, ఆయనకు జారీ అయినప నోటీసు, తదనంతర పరిణామాలపై ఇప్పుడు పెద్ద చర్చే జరుగుతోంది.
Must Read ;- ట్రయాంగిల్ కాదు.. నాలుగు స్తంభాలాట
