మత్తుకళ్లు చేసే మాయాజాలం సిల్క్ స్మిత .. కైపు కళ్లు చేసే ఇంద్రజాలం సిల్క్ స్మిత. ఆమె కొంటె చూపుల్లో నుంచి కవిత్వాలు పుడతాయి .. ఆ చూపులకు స్వరం ఇస్తే అవి శృంగార తత్త్వాలు పాడతాయి. కళ్లతోనే అందరి కళ్లను తనవైపు తిప్పుకున్న ప్రత్యేకత సిల్క్ స్మిత సొంతం. ఆమె అసలు పేరు విజయలక్ష్మి .. ఏలూరు సమీపంలోని ఓ మారుమూల గ్రామంలో జన్మించింది. ఆర్థికపరమైన ఇబ్బందుల కారణంగా ఆమె పెద్దగా చదువుకోలేకపోయింది. ఊహతెలిసిన దగ్గర నుంచి సినిమాల పట్ల ఆసక్తి మాత్రం ఉండేది. అలా సినిమాలపై గల ఆసక్తితో మద్రాస్ కి చేరుకున్న విజయలక్ష్మీ, తమిళ సినిమాల కోసం తన పేరును ‘స్మిత’గా మార్చుకుంది.
‘వండి చక్రం’ అనే తమిళ సినిమాలో స్మిత పోషించిన ‘సిల్క్’ పాత్ర జనంలోకి బాగా వెళ్లింది. అప్పటి నుంచి ఆమె ‘సిల్క్ స్మిత’ గా పాపులర్ అయింది. హీరోయిన్ గాను .. క్యారెక్టర్ ఆర్టిస్ట్ గాను .. వ్యాంప్ గాను .. ఐటమ్ సాంగ్స్ లోను ఆమె విజృంభించింది. తెలుగు .. తమిళ .. మలయాళ .. కన్నడ .. హిందీ భాషల్లో కలుపుకుని 200 సినిమాలకి పైగా చేసింది. సిల్క్ స్మితకు వచ్చిన క్రేజ్ ఆమె కష్టాలు తీర్చలేకపోయింది .. కన్నీళ్లు తుడవలేకపోయింది. ఆమె మత్తుకళ్లు మౌనంగా వర్షించిన సందర్భాలు అనేకం ఉన్నాయి. అందానికి .. అమాయకత్వానికి మధ్య ఆమె నలిగిపోయింది .. ఓదార్చేవారులేక ఒంటరిగా కుమిలిపోయింది .. చివరికి ఆమె మరణం ఒక ప్రశ్నగానే మిగిలిపోయింది.
Must Read ;- దూకుడు పెంచుతున్నరంగమ్మత్త..!
సిల్క్ స్మిత జీవితచరిత్ర ఆధారంగా హిందీలో తెరకెక్కిన ‘డర్టీ పిక్చర్’ కాసుల వర్షం కురిపించింది. అదే తరహాలో ఇప్పుడు తమిళంలోను సిల్క్ స్మిత బయోపిక్ గా ఒక సినిమా రూపొందనున్నట్టు తెలుస్తోంది. ఆ పాత్రను అనసూయ చేస్తుందనేదే ఇప్పుడు హాట్ టాపిక్. బుల్లితెరపై కాడమల్లెలా .. కర్పూరంతో చేసిన శిల్పంలా కనిపించే అనసూయ, ‘రంగస్థలం’ సినిమాలో ‘రంగమ్మత్త’ పాత్ర నుంచి తన జోరు పెంచింది. ఇప్పుడు ఆమె చేతిలో అరడజను తెలుగు సినిమాలు ఉన్నాయి. అన్నీ పెద్ద ప్రాజెక్టులే .. ఒకదానికొకటి సంబంధం లేని వైవిధ్యభరితమైన పాత్రలే. కొన్ని ప్రాజెక్టులు సెట్స్ పై ఉంటే .. మరికొన్ని ప్రాజెక్టులు సెట్స్ పైకి వెళ్లడానికి సిద్ధమవుతున్నాయి.
ఈ నేపథ్యంలోనే కోలీవుడ్ లోకి అనసూయ అడుగుపెడుతోందనీ, సిల్క్ స్మిత బయోపిక్ తో ఎంట్రీ ఇస్తోందనే ప్రచారం ఇటీవల జోరందుకుంది. ఇదే సమయంలో తమిళంలో తాను ఒక విభిన్నమైన సినిమా చేస్తున్నానంటూ అనసూయ ఇన్ స్టా గ్రామ్ లో ఒక ఫోటో పోస్ట్ చేసింది. ఆ ఫోటోలో సిల్క్ స్మితను గుర్తుచేసే లుక్ తోనే ఆమె కనిపిస్తోంది. దాంతో ఆమె సిల్క్ స్మిత పాత్ర చేస్తోందనే ప్రచారానికి మరింత బలం చేకూరింది. ఇక ఆమె విజయ్ సేతుపతితో కలిసి దిగిన ఫోటో కూడా పోస్ట్ చేసింది. ఆయన ఆ సినిమాలో ఉన్నాడా? .. లేడా? అనే విషయంపై మాత్రం క్లారిటీ రావలసి ఉంది.
Also Read ;- కాబోయే జంట నిహారిక, చైతన్య డ్యాన్స్ సోషల్ మీడియాలో వైరల్.
