నిన్న శ్రీనివాస్ అవసరాల కోడైరెక్టర్ నంటూ మహేశ్ అనే వ్యక్తి సోషల్ మీడియాలో హడావిడి చేశాడు. తనని శ్రీనివాస్ అవసరాల కారణం లేకుండా ఆఫీస్ కు రావద్దని ఇష్టమొచ్చినట్టుగా మాట్లాడాడని .. ఆయన నిజస్వరూపం చూడండని వీడియో ను అవసరాల వైపుకు తిప్పాడు. అప్పుడు శ్రీని బట్టతలతో కనిపించి అందరికీ షాకిచ్చాడు. ఈ వీడియో బైటికి వెళితే.. నిన్ను ఇండస్ట్రీలో లేకుండా చేస్తానని ఆ కుర్రాడికి వార్నింగ్ కూడా ఇచ్చాడు శ్రీనివాస్ .
ఈ వీడియో నిన్నటి నుంచి సోషల్ మీడియాలో వైరల్ గా మారింది. అయితే అందరూ మహేష్ అనే కోడైరెక్టర్ పైన ఫోకస్ చేయకుండా.. శ్రీనివాస్ అవసరాల బట్టతలమీదే కాన్సన్ ట్రేట్ చేయడం గమనార్హం. నిజానికి శ్రీనివాస్ అవసరాలకు బట్టతలకాదు. మామూలు హెయిర్ స్టైలే. మరి సడెన్ గా బట్టతల ఎలా వచ్చింది అంటే.. అది ఆయన నటిస్తోన్న ఓ సినిమాకి సంబంధించిన గెటప్ అని తెలిసింది. సినిమాపేరు ‘నూటొక్క జిల్లాల అందగాడు’. బాలీవుడ్ లో ఆయుష్మాన్ ఖురానా నటించిన సూపర్ హిట్ చిత్రం ‘బాలా’ కి అది రీమేక్ వెర్షన్ అని సమాచారం.
బట్టతల వల్ల ఒక యువకుడి జీవితం ఎలాంటి సమస్యల్లో చిక్కుకుంది అనే అంశాన్ని చాలా హ్యూమరస్ గా తెరకెక్కించారు. ఇప్పుడు ఆ సినిమాను తెలుగులో శ్రీనివాస్ అసరాల హీరోగా రూపొందిస్తున్నారు. ఈ సినిమాతో రాచకొండ విద్యాసాగర్ దర్శకుడిగా పరిచయం అవుతున్నారు. శ్రీవెంకటేశ్వరా క్రియేషన్స్ , ఫస్ట్ ఫ్రేమ్ ఎంటర్ టైన్ మెంట్స్ సంయుక్తంగా ఈ సినిమాను నిర్మిస్తున్నారు. ఈ సినిమా ప్రమోషన్ కోసమే .. బట్టతలతో ఉన్న శ్రీనివాస్ నిజస్వరూపం చూడండి అంటూ.. కోడైరెక్టర్ ప్రాంక్ వీడియో చేసినట్టు చెబుతున్నారు. మరి ఇందులో నిజానిజాలేంటో తెలియాలంటే.. కొద్ది రోజులు ఆగాల్సిందే.
Must Read ;- నానీ కూడా పారితోషికం పెంచేశాడా?
