అమర్ నాథ్ యాత్రను మరోసారి నిలిపివేస్తున్నట్టు అక్కడి ప్రభుత్వం ప్రకటించింది.భారతదేశంలో ప్రధాన తీర్థ యాత్ర ప్రదేశమైన అమర్ నాథ్ లో మళ్లీ భారీ వర్షాలు మొదలవడంతో ప్రభుత్వం ఈ నిర్ణయం తెసుకున్నట్లు తెలుస్తోంది.గత నెల 30న అమర్ నాథ్ యాత్ర ప్రారంభమవగా ఇప్పటికే రెండు సార్లు యాత్ర నిలిచిపోయింది. కాగా తాజాగా మరోసారి యాత్రకు బ్రేక్ పడడంతో యాత్రికులు ఎక్కడికక్కడే నిలిచిపోయే పరిస్థితి నెలకొంది.
అమర్ నాథ్ లో ఒక్కసారిగా వర్షాలు పెరిగిపోవడంతో యాత్రకు ఆటంకాలు ఎదురవుతున్నాయి.దీంతో వర్షాలు తగ్గే వరకు తాత్కాలికంగా యాత్రను నిలిపివేస్తున్నామని ఇండో టిబెటన్ బోర్డర్ ఫోర్స్ (ఐటీబీపీ) అధికారులు ప్రకటించారు.ఇప్పటికే అమర్ నాథ్ యాత్రకు పహల్గాం, బల్తాల్ మార్గాల ద్వారా వెళ్లే యాత్రికులను నిలిపివేశామని.. వర్షాలు తగ్గాక అప్పటి పరిస్థితిని సమీక్షించి నిర్ణయం తీసుకుంటామని అధికారులు చెబుతున్నారు.
వాస్తవానికి యాత్ర మొదలైన 15 రోజుల్లో ఇప్పటి వరకు రెండు సార్లు యాత్ర నిలిచిపోయింది. కాగా, భారీ వర్షాల కారణంగా ఇప్పుడు మూడోసారి యాత్రకు బ్రేక్ పడింది. గత నెల 30 వ తేదీన యాత్ర ప్రారంభం అవగా తొలి యాత్రికుల బృందాలు ఆ రోజునే పహల్గాం, బల్తాల్ రెండు మార్గాల్లో అమర్ నాథ్ కు పయనమయ్యారు. అయితే జులై 5న తొలిసారి అధిక వర్షాల కూరవడంతో యాత్ర మొదటిసారి నిలిచిపోయింది. తర్వాత అకస్మాత్తుగా వరదల రావడంతో 8వ తేదీన అధికారులు మరోసారి యాత్రను తాత్కాలికంగా ఆపేశారు.
ఈ క్రమంలో తాజాగా యాత్ర తిరిగి ప్రారంభమైనా.. మళ్ళీ భారీ వర్షాల కారణంగా ఇప్పుడు మూడోసారి యాత్ర ఆగిపోయింది. ఇప్పటివరకు మొత్తం లక్ష 44 వేల మంది యాత్రికులు అమర్ నాథ్ లింగాన్ని దర్శించుకున్నట్టు అమర్ నాథ్ దేవస్థానం బోర్డు ప్రకటించింది. ప్రస్తుతం ఇంకా 16,457 మంది యాత్రికులు అమర్ నాథ్ యాత్రా మార్గంలో ఉన్నారని.. మరో 5,449 మంది జమ్మూలోని బేస్ క్యాంపు నుంచి బయలుదేరారని తెలిపింది.అయితే యాత్రకు బ్రేక్ పడడంతో వీరంతా ఎక్కడికక్కడే ఆగిపోయినట్టు అధికారులు వెల్లడించారు.
