కరోనా సంగతేమో గానీ.. వైరస్ తగ్గుముఖం పట్టినా కూడా చాలామంది వర్క్ ఫ్రమ్ హోమ్కే మొగ్గు చూపుతున్నారు. దీని వల్ల తల్లిదండ్రులకు కొత్త చిక్కులు వచ్చిపడుతున్నాయి. అటు పిల్లలను సముదాయిస్తూ, ఆడిస్తూనే.. ఇటు ఆఫీస్ పని చేసుకోవాల్సిన పరిస్థితి ఏర్పడింది. ఇలా రెండింటినీ బ్యాలన్స్ చేయాలంటే ఎంతో చాకచక్యత, ప్రణాళిక అవసరం. ఈ నేపథ్యంలో ఓవైపు వర్క్ ఫ్రమ్ హోమ్ చేస్తూనే.. మరోవైపు పిల్లల ఆలనా పాలన చూసుకోవాలంటే తల్లులు ఎలాంటి టిప్స్ పాటించాలో ఇప్పుడు తెలుసుకుందాం..
ప్రణాళిక సిద్ధం చేసుకోండి..
రోజూ మీ ఆఫీస్ వర్క్ ప్రారంభం కాకముందే పిల్లల కోసం ఓ ప్రణాళిక సిద్ధం చేసి పెట్టుకోండి. అంటే వాళ్లు ఏ సమయంలో తింటారు? ఎప్పుడు ఆడుకుంటారు? మధ్యాహ్నం ఎప్పుడు పడుకుంటారు..? ఇలాంటివన్నీ ప్లానింగ్ చేసి పెట్టుకోవాలి. అలాగే మీరు ఇంట్లో చేసే పనుల్లో పిల్లలను భాగం చేయడం, అందరూ కలిసి ఒకేసారి భోజనం చేయడం.. వంటి చిన్న చిన్న పనుల వల్ల అటు మీ పనులు త్వరగా పూర్తవడంతో పాటు పిల్లల్లో మిమ్మల్ని మిస్ అయిన భావన కలగదు. అంతేకాదు.. ఇలా అందరూ కలిసి ఒకేసారి భోంచేయడం వల్ల మళ్లీ వాళ్ల కోసం అంటూ మధ్యలో మీ పనులకు అంతరాయం ఏర్పడకుండా జాగ్రత్తపడచ్చు.
Must Read ;- ‘వర్క్ ఫ్రమ్ సైకిల్’ యాత్ర..!
Also Read ;- ‘తల్లిపాల’ను పెంచే సూపర్ ఫుడ్స్
వారికి అర్థమయ్యేలా వివరించండి..
మీరు చెప్పే విషయాలు అర్థం చేసుకునే వయసున్న పిల్లలైతే.. వారికి మీ సమస్యను వివరించి చెప్పండి. మీరు ఇంటి నుండి పనిచేయడానికి ముందు ఆఫీస్కి వెళ్లి ఎలాగైతే సమయానుకూలంగా పనిచేసేవారో ఇప్పుడు ఇంటి నుంచి కూడా అవే సయమాలను పాటించాలని వారికి తెలియజేయండి. మీ పనివేళలు, వర్క్ గురించి వారికి అర్థం అయ్యేలా చెప్పి.. ఆ సమయంలో వారు మిమ్మల్ని ఇబ్బంది పెట్టకూడదని వివరించండి. అంతేకాదు.. పని పూర్తైన తర్వాత మనం కలిసి గడపవచ్చని వారికి భరోసా ఇవ్వండి. దీనితోపాటు.. మీ పిల్లల ఆలనా పాలన గురించి మీ పై అధికారులతో మాట్లాడడం వల్ల వారు మీకు కాస్త వెసులు బాటు కల్పించే అవకాశం ఉంటుంది. అలాగే ఉన్న సమయంలోనే మీ పనుల్ని త్వరత్వరగా ముగించేసుకుంటే అటు ఆఫీసు పనులు, ఇటు పిల్లల్ని.. ఎలా బ్యాలన్స్ చేయాలన్న ఒత్తిడి కూడా మీపై పడకుండా జాగ్రత్తపడచ్చు.
Also Read ;- నిద్రించే ముందు దంపతులు చేయకూడని పనులేమిటో తెలుసా?
పనిని విభజించుకోవాలి..
మనం చేసే ఆఫీస్ వర్క్లో భాగంగా కొన్ని పనులు త్వరగా, సులభంగా పూర్తయితే.. మరికొన్ని పూర్తి చేయడానికి ఎక్కువ సమయం పట్టచ్చు.. కాస్త బుర్ర పెట్టి ఆలోచించాల్సి రావచ్చు. అలాంటప్పుడు కాస్త తెలివిగా ఆలోచించి పనిని విభజించుకోవాలి. ఈ క్రమంలో మీ పిల్లలు ఆడుకుంటున్నప్పుడు, లేదా టీవీ చూడడం వంటివి చేస్తున్నప్పుడు త్వరగా పూర్తయ్యే పనులకు సమయం కేటాయించాలి. ఎందుకంటే వాళ్లు తమ పనుల్ని చేస్తూనే పదే పదే మీ వద్దకొచ్చే అవకాశం ఉంది.. కాబట్టి ఆ సమయంలో సులభంగా అయిపోయే పనులైతే మీకు ఎలాంటి ఒత్తిడీ కలగదు. అదే మీ పిల్లలు నిద్రపోయినప్పుడు కాస్త కఠినంగా, బుర్రకు పదును పెట్టి చేసే పనులపై దృష్టి పెట్టాలి. ఇలా రెండు పనుల్నీ బ్యాలన్స్ చేసుకోవడం వల్ల మీకు పనిపై ఏకాగ్రత పెరుగుతుంది. అలాగే అటు పిల్లల్నీ నిర్లక్ష్యం చేయకుండా ఉండచ్చు.
Also Read ;- తల్లిదండ్రులూ.. సందేహాలు మానండి.. వెన్ను తట్టి ప్రోత్సహించండి..
భాగస్వామి సాయం తీసుకోండి..
తల్లిదండ్రులిద్దరూ ఒకరు మాత్రమే పనిచేసే వారైతే.. పిల్లలను నియంత్రించడం అంత కష్టం కాకపోవచ్చు. కానీ తల్లిదండ్రులిద్దరూ ఇంటి వద్ద నుండే పని చేయాల్సిన పరిస్థితి ఉంటే మాత్రం పిల్లల ఆలనా పాలన విషయంలో ముందుగానే ఓ ప్లానింగ్ అవసరం. అంటే పిల్లలకు సంబంధించిన పనులను, ఇద్దరి ఆఫీస్ పనులను, ఇంటి పనులు, వంట పని.. ఇలా రోజూ చేసే పనులన్నింటినీ.. భార్యాభర్తలిద్దరూ వారికి అనుగుణంగా పంచుకోవాల్సి ఉంటుంది. తద్వారా అటు వర్క్, ఇటు పిల్లల ఆలనా పాలనా ఇద్దరూ చూసుకున్నట్లవుతుంది. ఇలా భార్యాభర్తలిద్దరూ పనుల్ని పంచుకోవడం వల్ల పనులన్నీ త్వరగా పూర్తవడంతో పాటు.. ఎవరి పనులూ వాయిదా వేసుకోవాల్సిన అవసరం ఉండదు. ఇలా కలిసి పనిచేసుకోవడం వల్ల దంపతుల మధ్య అనుబంధం దృఢమవుతుంది కూడా!
సో.. చూశారుగా! అమ్మో.. వర్క్ ఫ్రమ్ హోమ్.. ఇటు ఇంటి పనిని – పిల్లల్ని, అటు ఆఫీస్ పనిని ఎలా బ్యాలన్స్ చేయాలో ఏమో..? అంటూ తెగ టెన్షన్ పడిపోకుండా ఈ చిన్న చిన్న చిట్కాలు పాటించండి.. ఎంతో సౌకర్యవంతంగా పనులన్నీ సకాలంలో ముగించుకోండి.. సూపర్ మామ్ అనిపించుకోండి.