తెలుగు తెరను ఆయన ప్రేమించాడు .. తెలుగు కథను ఆయన నడిపించాడు .. తెలుగు సినిమాను ఆయన గెలిపించాడు. తెలుగు తెరపై కళాత్మకమైన కథలకు ఆయనే నాయకుడు .. నావికుడు. తెలుగు కథకు సంగీత సాహిత్య నృత్యాలను నేర్పిన సేవకుడు .. ప్రేక్షకుల హృదయ సామ్రాజ్యం వరకూ ముందుండి నడిపించిన సైనికుడు .. కె.విశ్వనాథ్ .. ఈ రోజున ఆయన పుట్టినరోజు.
విశ్వనాథ్ పూర్తి పేరు .. కాశీనాథుని విశ్వనాథ్. గుంటూరు జిల్లా ‘పెదపులివర్రు’ గ్రామంలో ఆయన జన్మించారు.గుంటూరులోనే కళాశాల విద్యను అభ్యసించిన ఆయన, ఆ తరువాత సినిమాలపట్ల గల ఆసక్తితో చెన్నైకి చేరుకున్నారు. అక్కడ ఓ స్టూడియోలో సౌండ్ రికార్డిస్టుగా చేరిన ఆయన, దర్శకత్వ విభాగంలో చేరే అవకాశం కోసం ఎదురుచూస్తూ రోజులు నెట్టుకు రాసాగారు. ఆ సమయంలోనే ఆయనకి దర్శకుడు ఆదుర్తి సుబ్బారావుగారితో పరిచయం ఏర్పడింది. అప్పటి నుంచి ఆయన ఆదుర్తివారి దగ్గర సహాయ దర్శకుడిగా పనిచేస్తూ అనుభవాన్ని సంపాదించారు.
అప్పట్లో ఆదుర్తి సుబ్బారావుగారు .. అక్కినేని నాగేశ్వరరావుతో వరుస సినిమాలను తెరకెక్కిస్తూ ఉండేవారు. దాంతో విశ్వనాథ్ కి అక్కినేనితో సాన్నిహిత్యం ఏర్పడింది .. విశ్వనాథ్ ప్రతిభా పాటవాలను అక్కినేని దగ్గరగా చూసే అవకాశం లభించింది. దాంతో అక్కినేనిని దృష్టిలో పెట్టుకుని విశ్వనాథ్ ఒక కథను సిద్ధం చేసి వినిపించడం .. ఆ కథకు ఆయన గ్రీన్ సిగ్నల్ ఇవ్వడం జరిగిపోయాయి. అలా విశ్వనాథ్ ను దర్శకుడిగా పరిచయం చేస్తూ వచ్చిన చిత్రమే ‘ఆత్మ గౌరవం’. 60వ దశకంలో వచ్చిన ఈ సినిమా .. విజయంతో పాటు విశ్వనాథ్ కి రాష్ట్రప్రభుత్వం నుంచి నంది అవార్డును కూడా తెచ్చిపెట్టింది.
ఇక ఆ తరువాత దర్శకుడిగా విశ్వనాథ్ తన ప్రయాణాన్ని కొనసాగించారు. ఆదుర్తివారి స్కూల్ కావడంతో, బలమైన కథతోనే విశ్వనాథ్ బరిలోకి దిగేవారు. పాత్రలను తీర్చిదిద్దడంలో తనదైన ప్రత్యేకతను కనబరిచారు. 70వ దశకంలో ‘చెల్లెలి కాపురం’ .. ‘కాలం మారింది’ .. ‘శారద’ .. ‘ఓ సీతకథ’ .. ‘జీవన జ్యోతి’ వంటి వైవిధ్యభరితమైన కథలను ఆయన ప్రేక్షకుల ముందుకు తీసుకొచ్చి, విశేషమైన ఆదరణను .. విజయాలను కలిపి అందుకున్నారు. ఆ తరువాత ఆయన చేసిన ‘సిరి సిరి మువ్వ’ సినిమా ఓ సంచలనమే సృష్టించింది. ఒక బలమైన కథ .. ప్రేక్షకుడిని తనలోకి ఎంత బలంగా ఐక్యం చేసుకుంటుందనేది ఈ సినిమా నిరూపించింది.
‘సీతామాలక్ష్మీ’ సక్సెస్ తరువాత విశ్వనాథ్ చేసిన ‘శంకరాభరణం‘ .. దర్శకుడిగా ఆయన విశ్వరూపాన్ని ఆవిష్కరించింది. అప్పటికి ఎలాంటి గుర్తింపులేని సోమయాజులును ప్రధానమైన పాత్రకి తీసుకుని ఆయన ఓ ప్రయోగమే చేశారు .. అందరూ ఆశ్చర్యపోయే సాహసమే చేశారు. సంగీత ప్రధానమైన ఒక సినిమాకి ప్రేక్షకులను రప్పించడంలో .. మెప్పించడంలో ఆయన సఫలీకృతులయ్యారు. ఈ రోజుకీ ఈ సినిమా ఒక అద్భుతమే .. అంతరంగ సంద్రాన దాచుకునే ఆణిముత్యమే.
‘శంకరాభరణం’ తరువాత .. అంటే 80వ దశకంలో, విశ్వనాథ్ సినిమాలు సకారంతో మొదలుకావడమనేది ఒక సెంటిమెంట్ గా మారింది. సంగీత .. సాహిత్య .. నృత్యాలు ఆయన కథలను పెనవేసుకుపోయాయి. సామాజిక పరమైన సందేశాలు ఆ కథల్లో అల్లుకుపోయాయి. వరుస విజయాలతో ఈ దశకం నాది అని విశ్వనాథ్ నిరూపించారు. తెలుగు ప్రేక్షకులు కూడా ఈ సమయాన్ని ఒక స్వర్ణయుగంగానే చెప్పుకున్నారు. అలా ఈ దశకంలో వచ్చిన చిత్రాల జాబితాలో ‘సాగర సంగమం’ .. ‘స్వాతిముత్యం’ .. ‘సిరివెన్నెల’ .. ‘శ్రుతిలయలు’ .. ‘స్వర్ణకమలం’ .. ‘స్వయంకృషి‘ .. ‘సూత్రధారులు’ కనిపిస్తాయి.
90వ దశకంలోనూ ఆయన ‘స్వాతికిరణం’ .. ‘శుభసంకల్పం‘ వంటి గొప్ప చిత్రాలను ప్రేక్షకుల మనసు తెరపై ఆవిష్కరించారు. తనదైన మార్కు కథలతో ప్రశంసలు అందుకున్నారు. విశ్వనాథ్ కథా వస్తువును ఎంచుకునే తీరు .. దానిని నడిపించే విధానం ఎంతో అద్భుతంగా ఉండేది. ప్రతి సన్నివేశంలోను నటించి చూపించడం ఆయన ప్రత్యేకత. లోతైన మాటలకు .. పరిమళించే పాటలకు ఆయన ఎక్కువగా ప్రాధాన్యతను ఇచ్చేవారు. ఆయన సినిమాల్లో చాలావరకూ ‘ప్రేమతో ముడిపడిన మనసులు .. కళతో కలిసి నడిచే జీవితాలు’ అనే కాన్సెప్టుతోనే కొనసాగాయి. ప్రేమకీ .. పెళ్లికి ఆ రెండింటితో అనుసంధానం చేయబడిన ‘కళ’కు పవిత్రమైన అర్థాలు చెప్పాయి.
విశ్వనాథ్ తాను చేస్తున్నది దర్శకత్వమని కాకుండా ఒక తపస్సు చేస్తున్నట్టుగా భావించేవారు. అందువల్లనే కళాత్మక చిత్రాలను కమర్షియల్ హిట్లుగా నిలబెట్టగలిగారు. తెలుగులో ఆణిముత్యాలవంటి సినిమాలను .. విశిష్టమైన చిత్రాలను ఏరుకునే ప్రయత్నం చేస్తే, ముందుగా చేతికి తగిలేది విశ్వనాథ్ వారి సినిమాలే. ఆయన సినిమాల ప్రస్తావన లేకుండా తెలుగు సినిమా వైభవాన్ని చెప్పడం సాధ్యం కాదు. దర్శకుడిగానే కాదు నటుడిగా కూడా ఆయన తన స్థాయికి తగిన పాత్రలను పోషించారు .. హుందాతనంతో కూడిన నటనతో మెప్పించారు.
తెలుగు సినిమాకి విశ్వనాథ్ గౌరవాన్ని తెచ్చారు .. వైభవాన్ని పెంచారు .. కథను కళను మేళవించి అపురూప దృశ్యకావ్యాలను ఆవిష్కరించారు. సహజత్వంతో కూడిన కథాకథనాలతో సహజ సుగంధాలను వెదజల్లారు. ఆయన చేసిన సేవకిగాను పద్మశ్రీ .. దాదాసాహెబ్ ఫాల్కే .. రఘుపతి వెంకయ్య పురస్కారాలు పలకరించాయి .. పులకరించాయి. ఈ రోజు పుట్టినరోజు జరుపుకుంటున్న ఆ కళా ప్రవాహానికి ‘ది లియో న్యూస్’ టీమ్ శుభాకాంక్షలు అందజేస్తోంది.
— పెద్దింటి గోపీకృష్ణ
Must Read ;- తన సినిమాని తానే కాపీ కొట్టిన విశ్వనాథ్
