బాలకృష్ణ – బోయపాటి కాంబినేషన్ పై ప్రేక్షకుల్లో భారీ అంచనాలు ఉన్నాయి. ఈ ఇద్దరి కాంబినేషన్లోని సినిమా సెట్ పై ఉండగానే, కలెక్షన్ల పరంగా అవి సాధించే రికార్డులను గురించి అభిమానులు మాట్లాడుకుంటారు. అందుకు కారణం గతంలో ఈ ఇద్దరి కాంబినేషన్లో వచ్చిన ‘సింహా’ .. ‘లెజెండ్’ సినిమాలు సంచలన విజయాలను నమోదు చేయడమే. యాక్షన్ సన్నివేశాలను బోయపాటి ఏ స్థాయిలో ఆవిష్కారించగలడనేది ఈ సినిమాలు నిరూపించాయి. బాలకృష్ణ కెరియర్లోనే ప్రత్యేకమైన సినిమాలుగా నిలిచాయి.
అలాంటి ఈ ఇద్దరి కాంబినేషన్లో ఓ భారీ యాక్షన్ ఎంటర్టైనర్ రూపొందుతోంది. ఇప్పటికే ఈ సినిమా కొంతవరకూ చిత్రీకరణను జరుపుకుంది. మే 28వ తేదీన ఈ సినిమాను విడుదల చేయనున్నట్టుగా చెప్పారు. అయితే అప్పటికి ఈ సినిమా విడుదల అనుమానమే అనే ఒక టాక్ ఫిల్మ్ నగర్లో వినిపిస్తోంది. ఈ సినిమాకి సంబంధించి ఇంకా నాలుగు షెడ్యూల్స్ షూటింగు జరపవలసి ఉందట. ఇంటర్వెల్ బ్యాంగ్ సీన్ ను చిత్రీకరించడానికే పది .. పదిహేను రోజులు పడుతుందని అంటున్నారు. ఈ నేపథ్యంలో ముందుగా చెప్పిన తేదీకి ఈ సినిమా థియేటర్లకు వస్తుందా? అనే సందేహాలు వ్యక్తమవుతున్నాయి.
అయితే లాక్ డౌన్ సమయంలో బోయపాటి ఈ సినిమాకి సంబంధించిన అన్ని పనులను పక్కాగా ప్లాన్ చేసుకుని ఉన్నాడనీ, అందువలన ఆ ప్రణాళిక ప్రకారమే ముందుకువెళుతున్నాడనే అభిప్రాయాలు కూడా వ్యక్తమవుతున్నాయి. ఈ ప్లానింగ్ కారణంగా మిగతా షెడ్యూల్స్ షూటింగును అనుకున్న సమయానికి పూర్తి చేస్తాడనీ, మే 28వ తేదీకి ఈ సినిమా థియేటర్లకు రావొచ్చునని మరికొంతమంది అంటున్నారు. చూడాలి మరి ఏం జరుగుతుందో.
Must Read ;- మోనార్క్ టైటిల్ ఫైనల్ అట!
