ప్రపంచ వ్యాప్తంగా ఓటీటీ సంస్థల మధ్య తీవ్ర పోటీ నెలకొంది. వ్యాపారంలో ఈ సంస్థలు నువ్వా నేనా అన్నట్లుగా పోటీపడుతున్నాయి. తాజా నివేదికల ప్రకారం డీస్నీ ప్లస్ 100 మిలియన్ సబ్ స్క్రైబర్స్ మైలు రాయిని అధిగమించింది.
ప్రధానంగా మూడు సంస్థ మధ్య తీవ్ర పోటీ నెలకొంది. నెట్ ఫ్లిక్స్ ఇప్పటికీ అగ్రస్థానంలోనే ఉంది. గత ఏడాది అక్టోబరు నాటికే నెట్ ఫ్లిక్స్ 205 మిలియన్లకు చేరువైంది. రెండో స్థానంలో అమెజాన్ ప్రైమ్ ఉంది. 150 మిలియన్ సబ్ స్క్రైబర్స్ మైలు రాయిని గత ఏడాదే అధిగమించిన అమెజాన్ ప్రైమ్ 200 మిలియన్ మైలు రాయిని చేరుకునేందుకు తాపత్రయపడుతోంది. ఇక మూడో స్థానంలో ఉన్న డిస్నీ ప్లస్ ఇప్పుడు 100 మిలియన్ దాటింది. డిస్నీ సీఈఓ బాబ్ చాపెక్ అధికారికంగా ఈ విషయాన్ని ప్రకటించారు. మంచి కంటెంట్ అందిస్తూ తాము ఇతర సంస్థల కన్నా ముందుండానికే ప్రయత్నిస్తున్నామని ఆయన వెల్లడించారు.
2024 నాటికి 230 నుంచి 260 మిలియన్ల సబ్ స్క్రైబర్స్ ను సాధించాలన్నది వారి టార్గెట్. ప్రస్తుతం ఓటీటీ వార్ నెట్ ఫ్లిక్స్, అమెజాన్ ప్రైమ్ సంస్థల మధ్యే ఉంది. ఈ రెండూ నువ్వానేనా అన్నట్లు పోటీపడుతున్నాయి. డిస్నీ టార్గెట్ 2024తో ఉన్నా దాన్ని తక్కువ అంచనా వేయడానికి వీల్లేదు. ఎందుకంటే మార్వెల్, నేషనల్ జియోగ్రఫిక్ లాంటి సంస్థల్ని కలుపుకుని ఇది ముందుకుపోతోంది. ఖర్చుకు వెనకాడకుండా జనాన్ని ఆకర్షించేందుకు భారీ ప్రాజెక్టులు చేపట్టింది. హాలీవుడ్ సినిమా తరహాలోనే కంటెంట్ రూపొందించే ప్రయత్నాల్లో ఉంది. దీని కోసం పెద్ద సంస్థలతో ఒప్పందాలను కూడా కుదుర్చుకుంది.
కరోనా ఓటీటీలకు వరం
ఓటీటీ సంస్థలకు కరోనా అనేది ఓ వరంగా మారిందనాలి. 2019 వరకూ అమెజాన్ కు ఉన్న సబ్ స్క్రైబర్స్ 100 మిలియన్లు మాత్రమే. కరోనా వచ్చాక అమాంతం ఈ సబ్ స్క్రైబర్స్ పెరిగిపోయారు. అందుకే 2020 కరోనాకు కలిసొచ్చిన సంవత్సరంగా చెప్పాలి. ఈ సంస్థల వ్యాపారం భారీగా పెరిగిపోయింది. లాక్ డౌన్ కారణంగా థియేటర్లు మూతపడటం, స్మార్ట్ ఫోన్ల వినియోగం విపరీతంగా పెరిగిపోవడం, ఇంటర్ నెట్ ఛార్జీలు కూడా బాగా తగ్గడం, కొత్త సినిమాలు నేరుగా ఓటీటీల్లో విడుదల కావడం లాంటి కారణాల వల్ల ఓటీటీ సబ్ స్క్రైబర్లు భారీగా పెరిగారు. ఇప్పుడు మన దేశంలో 30కి పైగా ఓటీటీ సంస్థలు ఉన్నాయి.
ఈ వ్యాపారం 2017లో 2019 కోట్లు ఉండగా ఇప్పుడు 5000 కోట్లకు చేరువైంది. 2019లో పోలిస్తే ఓటీటీలో చూసేవారి సంఖ్య 2020లో 35 శాతం పెరిగినట్లు ఫక్కీ అంచనా వేసింది. ఆహా లాంటి ప్రాంతీయ ఓటీటీలు కూడా తమ వ్యాపారాన్ని బాగా విస్తరించాయి. నెల రోజుల వ్యవధిలోనే కొత్త సినిమాలను ఓటీటీల ద్వారా అందించడంతో థియేటర్ల కలెక్షన్ల పై తీవ్ర ప్రభావం పడుతోంది. మున్ముందు ఈ నెల రోజుల గ్యాప్ కూడా లేకుండా సినిమాలు నేరుగా ఓటీటీల్లో విడుదలైనా ఆశ్చర్యపోవాల్సిన పనిలేదు. ఖర్చుకు వెనకాడకుండా కంటెంట్ ను పెంచుకునే ప్రయత్నాల్లో ఓటీటీ సంస్థలు ఉన్నాయి. దాంతో పోటీ రసవత్తరంగా మారింది. దాదాపు మన దేశంలో 30 ఓటీటీ సంస్థలకు సబ్ స్క్రైబర్స్ ఉన్నారు. గడిచిన రెండేళ్లలో వీటి ఆదాయం గణనీయంగా పెరిగింది.
-హేమసుందర్ పామర్తి
Must Read ;- ‘సలార్’ మూవీకి అమెజాన్ ప్రైమ్ మైండ్ బ్లోయింగ్ ఆఫర్
