‘మొండివాడు రాజు కంటే బలవంతుడు’ ఇది మనం చిన్నప్పటి నుంచి విన్న సామెత. మరి రాజే మొండివాడైతే?.. చుక్కలు చూపించకుండా ఎలా వదులుతాడు? అమెరికా అధ్యక్షుడు ట్రంప్ విషయంలో ఇప్పుడు అదే జరగబోతోందనిపిస్తోంది.
అమెరికా అధ్యక్ష పదవి అనే బాల్ ఇప్పుడు కోర్టు ఉన్నట్టే. ఆ బాల్ తో మహా జగమొండి అయిన ట్రంప్ ఓ ఆట ఆడకుండా ఎలా వదిలి పెడతాడు. ట్రంప్ ప్రయోగించబోతున్న ట్రంప్ కార్డ్ ఇదే. ట్రంప్ కార్డు అంటే తెలుగులో తురుపు ముక్క అంటారు.. అంటే ఆఖరి అస్త్రం అన్న మాట. యుద్ధ భూమిలోకి దిగాక ఆఖరి అస్త్రాన్ని ప్రయోగించకుండా ఎలా ఉంటారు. ట్రంప్ లాంటి వాడు అయితే అసలు వదిలిపెట్టడు. ఎన్నికల ఫలితాలు ఒక్కొటొక్కటిగా వెలువడుతుంటే పరిస్థితి ఎలా ఉండబోతోందో అర్థం కాని చిన్న పిల్లాడు కాడు ట్రంప్.. అందుకే నిన్నటి నుంచే ‘తూచ్.. నేనొప్పుకోను నేనొప్పుకోను’ అంటున్నాడు.
ఆ మ్యాజిక్ ఫిగర్ కోసమే ఇదంతా..
అమెరికా అధ్యక్ష ఎన్నికల్లో మ్యాజిక్ ఫిగర్ 270 ఎలక్టొరల్ ఓట్లు. ఇప్పటికే 264 ఓట్లు సాధించుకున్న డెమొక్రటిక్ అభ్యర్థి జోబైడెన్ ఇంకా 6 ఓట్ల దూరంలో ఉన్నారు. ట్రంప్ 214 ఓట్ల వద్ద ఆగిపోయారు. మెయిల్ ఇన్ బ్యాలెట్లు వల్ల తనకు ప్రమాదం ఉందని గ్రహించలేని అమాయకుడు కాదు ట్రంప్. అందుకే వాటి లెక్కింపు నిలిపివేయాలని డిమాండు చేస్తున్నారు. దీనికోసం కోర్టు మెట్టుక కూడా ఎక్కారు. పెన్సిల్వేనియా నుంచి 20, మిచిగాన్ నుంచి 16, జార్జియా నుంచి 16 లభించే ఓట్లు కీలకం కానున్నాయి. ఇప్పటికే బైడెన్ ముందుండంతో దీన్ని అడ్డుకోవాలన్నది ట్రంప్ వ్యూహం. పెన్సిల్వేనియా, మిచిగాన్ ఫలితాలపై ట్రంప్ అనుమానం వ్యక్తం చేస్తున్నారు.
దీని మీద స్థానికి కోర్టుల్లోనూ దావా వేశారు. అలాగే పోస్టల్ బ్యాలెట్ల ముగింపు తేదీపై సుప్రీం కోర్టులో ఇప్పటికే కేసు ఉంది. దీనిపై మోషన్ పిటిషన్ వేసేందుకు కూడా ట్రంప్ బృందం ప్రయత్నిస్తోంది. ఈ కేసుల గోల ఒక ఎత్తు.. తను ఆ సీటులో నుంచి కదలనని మొండికేయడం ఇంకో ఎత్తు. అప్పుడప్పుడు ఇలాంటి ఘటనలు కూడా జరగడం మనం చూస్తూనే ఉన్నాం. ఏదేమైనాగాని ట్రంప్ ఓడినా దాన్ని అంత తేలిగ్గా మనం తీసుకోలేం. ఆయన ఆ పదవి నుంచి తప్పుకోనంటే ఏం చేయాలన్న దాని మీద ఇంతవరకు స్పష్టత లేదు. ఇంతకుముందు ఎప్పుడూ ఇలాంటి పరిస్థితి కూడా రాలేదు మరి. అక్కడి రాజ్యాంగంలో కూడా అలాంటి నిబంధనలేవీ లేవని అంటున్నారు. దీన్ని ఆసరా చేసుకుని అల్లర్లు, అలజడులు జరగటానికి కూడా అవకాశం ఎక్కువగా ఉంది.
అమెరికాలో ‘సుప్రీం’ ఇలానా.. ఔర ఔర?
తుమ్మినా దగ్గినా కోర్టు మెట్లెక్కే పరిస్థితి నేడుంది. కోర్టుకు వెళ్లకుండా పదవులు కూడా దక్కే పరిస్థితులు లేవు. మన ఇండియానే అనుకుంటే అమెరికాది కూడా అదే దారి. ఓ పక్క ఎన్నికల ఫలితాలు వెలువడుతుంటే మరో పక్క ట్రంప్ కోర్టు కెళతానంటూ బెదిరింపులు. అనటమే కాదు అన్నంత పనీ చేసేశారు. అక్కడి న్యాయవ్యవస్థ తీరు చూస్తుంటే అమెరికా అధ్యక్షులు ఇక నుంచి దూరదృష్టితోనే వ్యవహరించాల్సి ఉంటుందేమో. ఎందుకంటే అక్కడ సుప్రీం కోర్టు జడ్జిలకు పదవీ విరమణ వయసు ఉండదట. అక్కడ జడ్జిలకు రిటైర్ మెంట్ ఉండదట. ఓ జడ్జి పోస్టు ఖాళీ అవ్వాలంటే ఒకరు రాజీనామా చేయడమో, మరణించడమో జరగాలి.
ఒక్కసారి ఆ కుర్చీలో కూర్చుంటే చనిపోయే వరకూ దాన్ని అంటిపెట్టుకుని ఉండాల్సిందే. అసలు విషయం ఏమిటంటే ఆ జడ్జిని నియమించే అధికారం కూడా అమెరికా అధ్యక్షుడికి మాత్రమే ఉంటుందట. ఆ అవకాశం అందరికీ రాదు.. దానికి కారణం మరణించే వారు ఉండాలి కదా. నాలుగేళ్లు అధికారంలో ఉన్న అమెరికా ప్రెసిడెంట్ తన పదవీ కాలంలో ఎంతమందిని నియమించగలరు? కొందరికి ఒక్కరిని నియమించే అవకాశం రావడమే గొప్ప. అయితే మన ట్రంప్ గారికి మాత్రం ముగ్గురిని నియమించే అవకాశం వచ్చిందంటే అంతకంటే అదృష్టం ఇంకేముంటుంది.
ఆయన హయాంలో ముగ్గురిని నియమించే అవకాశం ఎలా వచ్చిందో? ఆ పదవులు ఎలా ఖాళీ అయ్యాయో. ఇంతకీ ఇప్పుడు అమెరికా సుప్రీం కోర్టులో ఏ పార్టీ నియిమించిన జడ్జిలు ఎందరు ఉన్నారో చూద్దాం. డెమొక్రాట్ పార్టీ నియమించిన వారు నలుగురు, రిపబ్లికన్ పార్టీ నియమించిన వారు ఐదుగురు ఉన్నారట. అంటే ఈ విషయంలో రిపబ్లికన్ పార్టీ ఒక ఆకు ఎక్కువే చదివిందన్న మాట. ఆ ఒక్క వ్యక్తి ట్రంప్ కార్డు కావచ్చు. ఈసారి ఎన్నికల్లో జడ్జిల నిర్ణయం కీలకం అయితే మాత్రం అమెరికా అధ్యక్షులైన ప్రతి ప్రెసిడెంటు కూడా ఈ అవకాశాన్ని దుర్వినియోగం చేసే ప్రమాదం లేకపోలేదు.
-హేమసుందర్ పామర్తి
