రాజకీయాల్లో రజినీకాంత్ వెనకడుగు ఖాయమా?

రాజకీయాల విషయంలో సూపర్ స్టార్ ది మొదటి నుంచీ ద్వంద్వ వైఖరే. దేవుడు ఎప్పుడు శాసిస్తాడో రజనీకాంత్ ఎప్పుడు పాటిస్తాడో కూడా ఎవరికీ అర్థం కాదు. డిసెంబరు 12న ఆయన పుట్టిన రోజు.

ఈ పుట్టిన రోజు నాటికి ఆయన రాజకీయ ప్రవేశం పై స్పష్టత వస్తుందని అందరూ భావించారు. సినిమాల్లో ఆయన మాస్ హీరోయే గానీ రాజకీయాల్లో మాత్రం జీరో అనే ముద్రను ఆయన సంపాదించుకుంటున్నారు. సినిమాల విషయంలో ఆయన ఒక్కసారి చెబితే వందసార్లు చెప్పినట్టేగానీ రాజకీయాల్లో మాత్రం ఆయన వందసార్లు చెప్పినా ఒక్కసారి కూడా స్పష్టత రాదు.

వచ్చే డిసెంబరు 12 నాటికి ఆయన వయసు 70 ఏళ్లు. రజనీకాంత్ రాజకీయాల నుంచి తప్పుకోవాలనకుంటున్న ప్రచారం సాగడం, దానిపై వివరణ ఇస్తూ ఆయన అభిమానులకు లేఖ రాయడం వైరల్ గా మారింది. రాజకీయాల విషయంలో అందరినీ మెంటల్ గా ప్రిపేర్ చేయాలని వ్యూహాత్మకంగా రజనీకాంత్ అడుగులు వేస్తున్నారా అన్న సందేహాలు వ్యక్తమవుతున్నాయి.

ఓ పక్క తమిళనాడు ఎన్నికలు సమీపిస్తుండటం, ఇంకో పక్క జైలులో ఉన్న శశికళ త్వరలో విడుదల కానుండటం లాంటి పరిణామాల నేపథ్యంలో రజనీ ఇలాంటి లేఖ రాయడం కొత్త ఆలోచనలు రేకెత్తున్నాయి. శశికళ జైలు నుంచి విడుదలైన మరుక్షణం తమిళనాడు మరోసారి రాజకీయ సంక్షోభానికి తెరలేచే అవకాశం లేకపోలేదు. ఇది కొత్త తలనొప్పులకు దారితీయవచ్చు. ఇంత గందరగోళ పరిస్థితుల నేపథ్యంలో రాజకీయాలు అవసరమా అన్న ఆలోచన రజినీకి వచ్చినా ఆశ్చర్యపోవాల్సిన పనిలేదు.

ఆయన ఆరోగ్యంపై వదంతులు

రజినీ కాంత్ పై వదంతులు ఇప్పుడు వెల్లువెత్తుతున్నాయి. అందులో రాజకీయాలు ఒక అంశం అయితే, ఇంకోటి ఆయన ఆరోగ్య పరిస్థితి. ఈరోజు ఆయన అభిమానుల కోసం విడుదల చేసిన లేఖలో కూడా ఇదే విషయాన్ని ఆయన ప్రస్తావించారు. 2011లో ఆయన అనారోగ్యానికి గురయ్యారు. సింగపూర్ లో చికిత్స చేయించుకున్నారు. 2016లో కిడ్నీ మార్పిడి కూడా చేయించుకున్నారు. ఈరోజు ఆయన బయట పెట్టిన కొత్త విషయం ఇది. కిడ్నీ మార్పిడి వల్ల తనకు రోగ నిరోధక శక్తి బాగా తక్కువ ఉంటుందని ఆయన పేర్కొన్నారు. తనకు ప్రాణభయం లేకపోయినా తనను నమ్ముకున్నా వాళ్లకోసం వెనకడుగు వేయాల్సి వస్తోందని ఆయన పేర్కొన్నారంటేనే ఆలోచించాల్సి వస్తోంది.

రాజకీయాల్లోకి ఆయన రాదలచుకోలేదన్న భావన ఆ లేఖ ద్వారా వ్యక్తమవుతోంది. ఆ ప్రకారం చూస్తే రాజకీయాలకు రజనీ వెనకడుగు వేసినట్టే కనిపిస్తోంది. మరో పక్క ఆయన ఆరోగ్య పరిస్థితులపై అభిమానల్లోనూ ఆందోళన వ్యక్తమవుతోంది. ఆయన తాజా చిత్రం షూటింగ్ కూడా ఈ నెలలో హైదరాబాద్ లోని రామోజీ ఫిలింసిటీలోనే జరగాల్సి ఉంది. అది కూడా వాయిదా పడుతూ వస్తోంది. మరో పక్క ఆయన ఇంకో సినిమా కూడా చేయాల్సి ఉన్నా అన్నాత్తే సినిమానే ఆఖరి సినిమా అయ్యే అవకాశాలు ఎక్కువగా కనిపిస్తున్నాయి.

‘ఒకే ఒక్కడు’ తరహాలోనే..

ఎవరైనా రాజకీయాల్లో క్రియాశీలక పాత్ర పోషించాలనుకుంటే తెరవెనుక రకరకాల శక్తులు పనిచేస్తుంటాయి. అర్జున్ ‘ఒకే ఒక్కడు’ సినిమాలో దర్శకుడు శంకర్ కళ్లకు కట్టినట్టు చూపించాడు. రజనీ విషయంలోనూ ఇలాగే జరిగిందా అన్న అనుమానాలూ మరో పక్క ఉన్నాయి. రజనీకి చెన్నైలోని కొడంబాకంలో రాఘవేంద్ర కళ్యాణమండపం ఉంది. దానికి రూ. 6.5 లక్షల ఆస్తి పన్ను చెల్లించాలంటూ గ్రేటర్ చెన్నై కార్పొరేషన్ నోటీసులు పంపించింది. దీనిపై ఆయన హైకోర్టును ఆశ్రయించారు. అక్కడా ఆయనకు చుక్కెదురైంది. దానికి కోర్టు ఆయనపై ఆగ్రహం వ్యక్తం చేసింది. ఇలాంటి విషయాల్లో కోర్టును ఆశ్రయిస్తే జరిమానా విధించాల్సి ఉంటుందని హెచ్చరించింది. ఆయన రాజకీయాల్లోకి వస్తే మున్ముందు ఇలాంటి ఒత్తిళ్లు మరింత పెరిగే అవకాశం కూడా ఉంది.

రిస్క్ అవసరమా?

రాజకీయాల్లోకి వస్తే ఎన్నో తలనొప్పులు వస్తాయన్నది రజనీకి తెలయిని విషయం కాదు. ఆయన మొదట్నుంచీ వెనకడుగు వేస్తున్నది అందుకే. చాలా రకాల ఒత్తిళ్ల కారణంగానే ఆయన రాజకీయాలకు సుముఖత చూపారు. మరోపక్క ఆయన వయసు కూడా 70 ఏళ్లకు చేరువైంది. పైగా ఆయన స్థానికుడు కాదనే విమర్శలు కూడా ఆయనను ఇబ్బంది పెట్టవచ్చు. మరో పక్క ఆయన జాతక పరిస్థితులు కూడా ఏమీ బాగోలేవని కూడా కొందరు పండితులు హెచ్చరిస్తున్నారు. ప్రస్తుతం ఆయనకు ఏలినాటి శని నడుస్తోంది. ఇంకో రెండేళ్లు ఆయనకు శని నెత్తి మీద ఉంటుందని జ్యోతిష పండితులు చెబుతున్నారు. ఇలాంటి సమయంలో ప్రశాంతంగా ఉండటం మేలని ఆయన ఇప్పటికే నిశ్చయించకున్నట్లు సమాచారం.

– హేమసుందర్ పామర్తి