ఇప్పటికే విమానాల్లో ఎగురుతున్నాంగా.. అనుకుంటున్నారా! విమానాల్లో కాదండి.. ఇప్పుడు ఏకంగా కారులోనే వెళ్లిపోవచ్చు. ఆశ్చర్యంగా ఉందా..! నిజమేనండీ.. ఎగిరే కార్లకు అనుమతులు వచ్చేశాయి. ఇకపై కారులో రోడ్డుపైనే కాదు.. గాల్లో కూడా షి‘కారు’కు వెళ్లొచ్చు. భవిష్యత్తులో ఆకాశం కూడా ఎగిరే కార్లతో రద్దీగా మారిపోబోతోంది. 10 వేల అడుగుల ఎత్తులో గంటకు 100 మైళ్ల వేగంతో ప్రయాణించే ప్రపంచంలోని తొలి ఎగిరే కారు టేకాఫ్కు అధికారిక క్లియరెన్స్ లభించింది. ఈ మేరకు అమెరికాలోని ఫెడరల్ ఏవియేషన్ అథారిటీ (ఎఫ్ఏఏ) అనుమతులు మంజూరు చేసింది.
టెర్రాఫుజియా ట్రాన్సిషన్ ‘రోడబుల్ ఎయిర్క్రాఫ్ట్’కు ఎఫ్ఏఏ ప్రత్యేక లైట్-స్పోర్ట్ ఎయిర్క్రాఫ్ట్ ఎయిర్ వర్తీనెస్ సర్టిఫికెట్ జారీ చేసింది. విమానానికి ఉండాల్సిన అన్ని ప్రమాణాలూ ఈ ‘రోడబుల్ ఎయిర్ క్రాఫ్ట్‘లో ఉండడంతో సర్టిఫికెట్ జారీ చేసింది. కానీ, ఈ ఎగిరే కారుకు ఇంకా రహదారి అనుమతులు రాలేదు. అవి కూడా వచ్చాక ట్రయల్ రన్ నిర్వహిస్తారు. ఈ కారుకు 27 అడుగుల పొడవైన రెక్కలు ఉంటాయి. ఈ రెక్కలు ముడుచుకుంటే చిన్నపాటి కారుషెడ్డులో కూడా ఇట్టే అమరిపోతుంది. రెండు సీట్ల సామర్థ్యం కలిగి ఉంటుంది. ఈ ఎయిర్క్రాఫ్ట్ కొనాలని భావించే వారికి డ్రైవింగ్ లైసెన్స్తోపాటు పైలట్ సర్టిఫికెట్ కూడా ఉండాలని తయారీ సంస్థ టెర్రాఫుజియా స్పష్టం చేసింది. ఈ ఎగిరే కారు తయారీలో పాలు పంచుకున్న బృందానికి టెర్రాఫుజియా అభినందనలు తెలిపింది. ఇప్పటికే ఈ కారు 80 రోజుల ఫ్లైట్ టెస్టింగ్ పూర్తి చేసుకుందని సంస్థ జనరల్ మేనేజర్ కెవిన్ కోల్బర్న్ తెలిపారు.
ఈ ఫ్లయింగ్ కారు.. ప్రీమియం గ్యాసోలిన్తో కానీ, 100 ఎల్ఎల్ విమాన ఇంధనంతో కానీ పనిచేస్తుంది. కారు హైడ్రాలిక్ మోటార్పై పనిచేస్తుంది. నాలుగు చక్రాల హైడ్రాలిక్ డిస్క్ బ్రేకులు, కార్బన్ ఫైబర్ సేఫ్టీ కేజ్, ఎయిర్ఫ్రేమ్ పారాచూట్ వంటి ఫీచర్లు ఉన్నాయి. బరువు 590 కేజీలు ఉంటుంది. ఇది విమాన రూపం నుంచి ఒక్క నిమిషంలో కారుగా మారిపోతుంది.
Must Read ;- ఆ విమానం నడిపేది మహిళా పైలెట్లే..!
