యానిమల్.. సందీప్ రెడ్డి వంగా దర్శకత్వంలో అర్జున్ రెడ్డి సినిమా తర్వాత రూపొందిన చిత్రమిది. ప్యాన్ ఇండియా స్థాయిలో విడుదలైన ఈ చిత్రంలో బాలీవుడ్ హీరో రణ్ బీర్ కపూర్, రష్మిక జంటగా నటించగా విలన్ పాత్రను బాబిడియోల్ పోషించారు. భారీ అంచనాల నడుమ విడుదలైన ఈ సినిమా ఎలాంటి ఫలితాన్ని ఇచ్చిందో చూద్దాం.
కథలోకి వెళితే..
తండ్రీకొడుకుల సెంటిమెంట్ ఈ కథకు మూలం. 2056లో కథ ప్రారంభమవుతుంది. 70 ఏళ్ల వయసున్న విజయ్ సింగ్ (రణ్ బీర్ కపూర్) జరిపే పుట్టిన రోజు వేడుక అది. తన తండ్రి 100వ పుట్టిన రోజు సందర్భంగా ఫ్రెండ్స్ కు పార్టీ ఇవ్వడంతో ప్రారంభమై ఫ్లాష్ బ్యాక్ లోకి వెళుతుంది. చిన్నప్పటి నుంచి విజయ్ ఆటిట్యూడ్ వేరు. తండ్రి అంటే విపరీతమైన ప్రేమ. కానీ అలాంటి ప్రేమను తండ్రి నుంచి పొందలేక నిరాశనిస్పృహలకు లోనవుతుంటాడు.
అతని తండ్రి బల్బీర్ సింగ్ (అనిల్ కపూర్) ఓ స్టీల్ ఫ్యాక్టరీ యజమాని. మల్టీ మిలియనీర్ అని చెప్పాలి. విజయ్ లోని ఎక్స్ట్రీమ్ మెంటాలిటీ తండ్రికి నచ్చదు. విజయ్ కు ఓ అక్క, ఓ చెల్లి. గీతాంజలి (రష్మిక)ను ప్రేమించడం, తండ్రితో విభేదాలు తలెత్తడంతో గీతాంజలిని పెళ్లి చేసుకుని విదేశాల్లో స్థిరపడతాడు. ఆ తర్వాత అతని తండ్రిపై హత్యా ప్రయత్నం జరగడంతో తిరిగివస్తాడు. ఆ హత్యా ప్రయత్నం చేసింది ఎవరు? వారిని విజయ్ ఎలా అడ్డుకున్నాడన్నదే ప్రధాన కథ.
ఎలా తీశారు? ఎలా చేశారు?
విపరీతమైన వయొలెన్స్, అంతకుమించిన బూతు వెరసి యానిమల్ మూవీ అనే చెప్పాలి. ఇలాంటి కథను ప్రేక్షకులు ఎంతవరకు జీర్ణించుకోగలరనేది ప్రశ్న. యూత్ కు నచ్చే మసాలా అంశాలు ఎన్నో ఇందులో ఉన్నాయి. ఇందులోని కొన్ని డైలాగులకు సెన్సార్ అనుమతి ఎలా ఇచ్చిందన్నది అనుమానమే. నటన పరంగా రణ్ బీర్ కపూర్ కూ, రష్మికకూ, అనిల్ కపూర్ కూ మంచి పేరు తెచ్చే సినిమాగా మిగిలిపోతుంది. అర్జున్ రెడ్డి క్యారెక్టరైజేషన్ నుంచి దర్శకుడు సందీప్ బయటపడితే మంచిదేమో.
ఏ దర్శకుడైనా తన మొదటి సినిమాని మరచిపోయి రెండో సినిమాని తయారు చేయడం బెటర్. లేకుండా మొనాటనీ ఫీలయ్యే ప్రమాదం ఉంది. పైగా అత్యంత సంపన్న కుటుంబంలోని యువకుడినే హీరోగా చేయాలని సందీప్ రెడ్డి వంగా ఎందుకనుకుంటున్నారో కూడా అర్థం కాదు. ప్రధానంగా ఈ సినిమాకి నిడివి పెద్ద మైనస్. మూడు గంటల 29 నిమిషాలపాటు సినిమాని సాగదీయాల్సిన అవసరమైతే లేదు. తండ్రీ కొడుకుల మధ్య ఎమోషన్ పండించాలన్న తాపత్రయం మంచిదే గానీ అనవసరమైన బూతు సన్నివేశాలు, నగ్నప్రదర్శన, పచ్చి బూతులు యూత్ ఎంజాయ్ చేయవచ్చేమోగానీ ఫ్యామిలీ ఆడియన్స్ కాదు. నిడివిలో అరగంట సినిమాని తగ్గిస్తేపోయేదేమీ లేదు. ముఖ్యంగా సెకండాఫ్ లో లాగ్ ఎక్కువగా ఉంది.
హీరోయిన్ మైల్డ్, హీరో వైల్డ్.. డైలాగ్స్ బోల్డ్.. ఇలాంటివి ఈ సినిమాలో బోలెడు. సందర్భానుసారం వచ్చే పాటలు బాగున్నాయి. విలన్ పాత్రకు మూగ ఎందుకు పెట్టాలనుకున్నాడో దర్శకుడికే తెలియాలి. ఈ మూగ, చెవుడు గోల లేకుండా కూడా సినిమాని లాగించేయవచ్చు. పైగా సినిమాని ఇంతటితో ముగించేయకుండా మళ్లీ యానిమల్ పార్క్ అంటూ క్లూ వదలడం కూడా బాగుండలేదు. దర్శకుడు అతిని ప్రదర్శించకుండా సినిమాని సినిమాగా చూపిస్తే పెద్ద హిట్ అయి ఉండేది. బొమ్మరిల్లు లాంటి తండ్రీ కొడుకులను జనం చూడగలరు గానీ జంతుప్రవృత్తితో భావోద్వేగాలను చూపించడం, వాటిని ప్రభావ వంతంగా చూపలేకపోవడం ఈ సినిమాకి మైనస్.
నటీనటులు: రణ్ బీర్ కపూర్, రష్మిక, అనిల్ కపూర్, బాబీ డియోల్, సురేష్ ఒబెరాయ్, ప్రేమచోప్రా, చారు శంకర్, పృథ్విరాజ్, శక్తి కపూర్ తదితరులు.
సాంకేతికవర్గం: కెమెరా: అమిత్ రాయ్, సంగీతం: ప్రీతమ్-విశాల్ మిశ్రా-మనన్ భరద్వాజ్- శ్రేయస్ పురాణిక్- హర్షవర్ధన్ రామేశ్వర్- జానీ- ఆశిమ్- గురిందర్ సెగల్, స్క్రీన్ ప్లే: సందీప్ రెడ్డి వంగ-ప్రణయ్ రెడ్డి వంగ- సురేష్ బండారు
నిర్మాతలు: భూషణ్ కుమార్- ప్రణయ్ రెడ్డి వంగ- మురాద్ ఖేతాని- కృష్ణ కుమార్
దర్శకత్వం: సందీప్ రెడ్డి వంగా.
విడుదల తేదీ: 01-12-2023
ఒక్క మాటలో: వైల్డ్ యానిమల్
రేటింగ్: 2.75/5
– పామర్తి హేమసుందర్
